Ndũkaleele Ũtavany’anĩ

KŨTAVANY’A ũvoo mũseo nĩw’o wĩa ũla wa vata ũendeee kũtethw’a ĩũlũ wa nthĩ. Nũndũ wĩ mũthũkũmi wa Yeova no nginya wĩthĩwe wonaa kũtw’ĩkĩthya andũ amanyĩw’a ne kĩanda kya mwanya. Ĩndĩ nĩwĩsĩ nesa ki kana mavainia na atavany’a nĩmakwatawa nĩ maũndũ matonya kũtuma maleela ũtavany’anĩ.

Atavany’a amwe nĩmaĩawa nĩ mũndũ matonya kũtavya ũvoo ĩla meũtavany’a nyũmba na nyũmba. Nĩkĩ? Nũndũ andũ aingĩ nĩmatonya kwĩthĩwa mate mũsyĩ. Na ĩla meethĩa amwe mũsyĩ na maneena namo, nĩmatonya kũlea kwendeew’a nĩ ũvoo wa Ũsumbĩ kana o makalea kũmathokya. Namo atavany’a angĩ nĩmatonya kwĩw’a maiemeewa nĩ kũmina kũtavany’a kĩsio kyoo nĩkwĩthĩwa nĩ kĩnene na andũ nĩmethukĩĩasya. Na ĩndĩ angĩ nĩmakw’ĩte ngoo nũndũ matavanĩtye ĩvinda ĩasa, na mayambĩĩa meesĩ mũthya wĩ vakuvĩ.

Yo nĩtwaĩlĩte kũseng’a nũndũ andũ onthe ma Yeova nĩmakwatawa nĩ mawetu matonya kũtuma maleela ũtavany’anĩ? Aiee. Nĩkĩ? Nũndũ vai ũmwe witũ ũtonya kũsũanĩa aĩ nĩtũtonya kũtavany’a ũvoo mũseo tũteũkwatwa nĩ mathĩna twĩ nthĩ ĩno ĩsumbĩkĩtwe nĩ “ũla mũthũku,” Satani, kana kwa ĩsyĩtwa yĩngĩ, Ndevili.—1 Yoa. 5:19.

O na ethĩwa ũkwatawa nĩ mawetu meva ĩla ũũtavany’a ũvoo mũseo, ĩthĩwa wĩsĩ kana Yeova nũtonya kũũtethya ũmakĩlye vinya. Ĩndĩ ũtonya kwĩka ata nĩ kana wongele kĩthito kyaku ũtavany’anĩ? Eka tũsũanĩe maũndũ amwe matonya kũũtethya.

TETHEESYA ALA MATE NA ŨMANYI MWINGĨ

Kĩla mwaka andũ ngili mbingĩ nĩmavatisawa makatw’ĩka Ngũsĩ sya Yeova. Ethĩwa ũnavatisiwe o mĩtũkĩ, no wende mũno kũtetheew’a nĩ ala me na ũmanyi mwingĩ wa kũtavany’a nũndũ methĩĩtwe me atavany’a kwa ĩvinda ĩasa mbee waku. Naku ethĩwa wĩthĩĩtwe wĩ mũtavany’a wa Ũsumbĩ kwa myaka mingĩ, tyo nginya wĩthĩwe wĩw’aa mũyo kũtetheesya ala mate na ũmanyi mwingĩ?

Yesũ nĩweesĩ yaĩ no nginya amanyĩw’a make matongoew’e nĩ kana methĩwe me atavany’a aseo, na nĩwoonanisye ũndũ wĩa ũsu waĩlĩte kũtethw’a. (Luka 8:1) O na ũmũnthĩ kwĩ na vata wa kũmanyĩsya angĩ methĩwe atavany’a aseo.

Tũyaĩle kũsũanĩa mũtavany’a mweũ akamanyĩa kũmanyĩsya ala angĩ atĩ nũndũ nũendaa ũtavany’a. Aĩlĩte kũmanyĩw’a nesa nĩ mũndũ wĩ na tei na wendo. Mũtavany’a mweũ aĩlĩte kũmanyĩw’a maũndũ ta ũndũ ũtonya (1) kwĩyũmbanĩsya kĩla ũkũthi kũweta athi kũtavany’a, (2) kwambĩĩa kũneena na mwene nyũmba kana na mũndũ ũvĩtĩte, (3) kũnengane mavuku, (4) kũsyokea ala mendeew’a, na (5) kwambĩĩa kwĩmanyĩsya Mbivilia na andũ. Nĩvatonyeka mũno mũtavany’a ũsu mweũ akethĩwa e mũtavany’a mũseo ethĩwa akasisya na aiatĩĩa nzĩa sya kũtavany’a ila ũkwonw’a nĩ ũla ũkũmũtetheesya. (Luka 6:40) Vate nzika mũtavany’a ũsu mweũ ndalea kwĩw’a mũyo nũndũ wa kwĩthĩwa na mũndũ ũtonya kũmwĩthukĩĩsya na kũmũtetheesya ĩla ve na vata. O na ĩngĩ, mũtavany’a ũsu ũte na ũmanyi mwingĩ no atetheke mũno nũndũ wa kũkathwa na kũnengwa motao.—Mũta. 4:9, 10.

MŨIKAKILANĨLYE ĨLA MWĨ ŨTAVANY’ANĨ

O na kau no ũtate mũno kũea ngewa na ene nyũmba, mĩthenya ĩmwe ngewa sya kwaka ila wĩsaa kwĩthĩa ũneenie ĩla ũũtavany’a, wĩthĩaa ũneenie na ũla ũũtavany’a nake. Lilikana kana Yesũ atũmie amanyĩw’a make makatavany’e “elĩ na elĩ.” (Luka 10:1) Maitavany’a vamwe maĩ matonya kwĩkĩana vinya. Kwoou, ĩla andũ meũtavany’a ĩmwe nĩmakwataa mwanya wa ‘kũthangaany’a.’—Alo. 1:12, The Holy Bible in Current Kikamba Language.

Nĩ maũndũ ta meva mũtonya kũneenea? Ve ũmwe wenyu ũtonya kũelesya ũndũ ũneekĩkie wa kwaka? Nũtonya kwĩthĩwa ũnoonie kaũndũ ka kwendeesya ũyĩmanyĩsya Mbivilia wĩ weka kana wĩ na andũ ala angĩ ma mũsyĩ? Nũtonya kwĩthĩwa ũnaakiwe nĩ kaũndũ ũneewie ũmbanonĩ? Mavinda angĩ nũtonya kwĩthĩa mũndũ ũla ũũtavany’a nake ti we ũtavanasya nake kĩla ĩvinda. Kwoou ĩkũlyo nĩ: Nĩwĩsĩ ũndũ wamanyie ũla w’o? Nĩ kyaũ kyamũĩkĩĩthisye kana ũũ nĩw’o ũseũvyo wa Yeova? Akwatĩte ianda syĩva na nĩ maũndũ meva wĩyoneete? O naku no ũmũelesye maũndũ ala wĩyoneete. O na kau andũ nĩmatonya kwendeew’a kana makalea kwendeew’a nĩ ũla w’o, kũtavany’a na mũndũ ũngĩ nĩkũtetheeasya ‘kĩla ũmwe kwaka ũla ũngĩ.’—1 Ath. 5:11.

NDŨKAEKE KWĨMANYĨSYA NESA O ŨNDŨ WĨKAA

Ũndũ ũmwe ũtonya kũtũtetheesya tũikaleele ũtavany’anĩ nĩ kũendeea kwĩmanyĩsya nesa. “Ngombo yĩ na kĩthito na mbũĩ” nĩyandĩkaa maũvoo maneeneete maũndũ me kĩvathũkany’o. (Mt. 24:45) Kwoou maũndũ ala ũtonya kwĩmanyĩsya nĩ kana wĩyĩĩthye kĩ-veva nĩ maingĩ mũno. Kwasũanĩa ũndũ ũũ mũseo ũtonya kwĩmanyĩsya: Nĩkĩ kũtavany’a ũvoo ĩũlũ wa Ũsumbĩ nĩ kwa vata mũno? Ĩsandũkũ yĩla yĩ na kyongo, “Nĩkĩ Tũtaĩle Kũleela Ũtavany’anĩ?” nĩyĩwetete itumi imwe.

Kũsũanĩa itumi ila iwetetwe ĩsandũkũnĩ yĩu nĩkũtonya kũtuma ũendeea kũtavany’a na kĩthito. No ũtũmĩe ĩvinda yĩla wĩmanyĩasya kũmantha itumi ingĩ eka isu. Ĩtina wa vau no ũsũanĩe itumi isu vamwe na maandĩko ala maikwete mbau. Kwĩka ũu kũkaũtetheesya wongele kĩthito kyaku ũtavany’anĩ.

ATĨĨA NZĨA SYA KŨTAVANY’A ILA TWONAW’A

Mavinda kwa mavinda ũseũvyo wa Yeova nũtũnengae motao ma kũtũtetheesya kwaĩlangya ũtavany’a witũ. Kwa ngelekany’o, eka kũtavany’a nyũmba na nyũmba, no tũtavany’e tũitũmĩa valũa, simũ, o na no tũtavany’e malelũnĩ kana kũndũ kũla kwĩthĩawa na andũ aingĩ. O na ĩngĩ no tũtavany’e ũvoo mũseo ĩla twĩ maũndũnĩ maitũ na isionĩ sya viasala. Ũndũ ũngĩ tũtonya kwĩka nĩ kwĩvanga nesa nĩ kana tũthi tũkatavany’e isio ila itatavanaw’a mũno.

We nĩwĩtĩkĩlanaa na maũndũ ala tweewa nĩtwĩke makonetye ũtavany’a? Nũtatĩte kũtũmĩa maũndũ amwe ta asu ĩla ũũtavany’a? Andũ amwe nĩmekĩte ũu na makatanĩa mũno. Sũanĩa ngelekany’o ii itatũ.

Ngelekany’o ya mbee ĩkonetye ũndũ wawetetwe nthĩnĩ wa Ũthũkũmi wa Ũsumbĩ ĩũlũ wa ũndũ tũtonya kwambĩĩa kwĩmanyĩsya Mbivilia na andũ. Ũndũ ũsu nĩwathangaaisye mwĩĩtu-a-asa wĩtawa April akũlya andũ atatũ ala ũthũkũmaa namo kana nĩmekwenda kwĩmanyĩsya Mbivilia. Nĩwaseng’ie na atana mũno ĩla onthe me atatũ meetĩkĩlile kwĩmanyĩsya Mbivilia na mambĩĩa kũthi maũmbanonĩ.

Ngelekany’o ya kelĩ ĩkonetye kũnengane makaseti. Nĩtweekĩiwe vinya tũmanthae andũ ala matonya kwendeew’a nĩ maũvoo mana makasetinĩ maitũ. Mũsyaĩĩsya ũmwe wa mũthyũlũlũko nthĩ ya Amelika aisye kana nĩwatũmĩie ũvoo ũla waneeneete taili. Aũtũmĩie kũnenga anene ma viasala sya kũthoosya taili ĩkaseti ya Amkeni! kĩsionĩ kĩna. O na ĩngĩ, we na mũka nĩmatwaie makaseti ala maĩ na ũvoo wĩ na kyongo “Kuwaelewa Madaktari” movisinĩ mbee wa 100 ma matakĩtalĩ ala maĩ mũthyũlũlũkonĩ woo. Aĩtye atĩĩ: “Kwĩka ũu kwatũtethisye mũno tũmanyĩke na tũinengane mavuku maitũ. Ĩla twamanyĩanĩie na andũ ala twamanengae makaseti, nĩtwambĩĩe kũmathokea mũnango.”

Nayo ngelekany’o ya katatũ ĩkonetye kũtavany’a na simũ. Mwĩĩtu-a-asa wĩtawa Judy nĩwaandĩkĩie ovisi mũnene wa Ngũsĩ sya Yeova atũngĩte mũvea nũndũ wa motao ala tũnengawe maitũthangaasya tũtavany’e tũitũmĩa simũ. Aisye kana inyia wake, ũla wĩ na myaka 86 na ũla wĩ mathĩna maingĩ ma mwĩĩ, nĩwatavanasya mavinda maingĩ aitũmĩa simũ na nĩwatanĩaa mũno kũmanyĩsya mũndũ mũka wĩ na myaka 92 Mbivilia!

Motao ma kũtavany’a ala me mavukunĩ maitũ nĩmatethasya mũno. Matũmĩe! Nĩmatonya kũũtetheesya ũendeee kwĩthĩwa wĩ mũtanu na ndũkaleele ũtavany’anĩ.

VANGĨĨA MAŨNDŨ ALA ŨTONYA KWĨANĨSYA

Mũndũ ndatw’ĩkaa aendeee nesa ũtavany’anĩ aĩ nũndũ nũnenganae mavuku maingĩ, e na amanyĩw’a aingĩ ma Mbivilia, kana nũtetheesye aingĩ makatw’ĩka athũkũmi ma Yeova. Kwa ngelekany’o, Noa aatetheesya mũndũ o na ũmwe atw’ĩke mũthũkũmi wa Yeova eka andũ make? Ĩndĩ tũyasya kana ndaĩ mũtavany’a mũseo. Kĩla kya vata nĩ kũmũthũkũma Yeova twĩ aĩkĩĩku.—1 Ako. 4:2.

Atavany’a aingĩ ma Ũsumbĩ nĩmamanyĩte kana no nginya mavangĩĩe kwĩanĩsya maũndũ ala matonya nĩ kana matanĩe wĩa wa kũtavany’a. Maũndũ ta meva? Amwe mamo nĩmawetetwe ĩsandũkũnĩ yĩla yĩ na kyongo “Vangĩĩa Maũndũ Ala Ũtonya Kwĩanĩsya.”

Voya Yeova akũtetheesye na ũimantha nzĩa sya kũtanĩa na kwaĩlangya ũthũkũmi waku nĩ kana wĩthĩwe na mosyao. Weanĩsya maũndũ ala ũvangĩĩe, ũkatana na ũkeew’a wĩ mwĩanĩe nũndũ wa kũmanya kana nĩwĩkaa kĩla kyonthe ũtonya ũtavany’e ũvoo mũseo.

Vate nzika kũtavany’a ũvoo mũseo kwĩ o mawetu makw’o. Ĩndĩ ve maũndũ ũtonya kwĩka nĩ kana wĩthĩwe mũtavany’a wa Ũsumbĩ wĩ kĩthito. Maũndũ amwe nĩ ta, kwakana na ũla ũũtavany’a nake, kwĩmanyĩsya nesa, kũatĩĩa motao ma ngombo yĩ na kĩthito na mbũĩ, na kũvangĩĩa kwĩanĩsya maũndũ ala ũtonya. Na eka ũu, lilikana kana Ngai nũkũnengete kĩanda kya mwanya mũno kya kũtavany’a ũvoo mũseo wĩ ũmwe wa Ngũsĩ syake. (Isa. 43:10) Ũkakwata ũtanu mwingĩ mũno waendeea kũtavany’a ũteũleela!