Ĩsandũkũ ya Ĩkũlyo

◼ Twaĩle kũlilikana kyaũ ethĩwa nĩtũkwenda ĩmwe ya malĩ yitũ kana yonthe yayo ĩtiĩwe ũseũvyo wa Yeova twakwʼa?

Ĩla mũndũ wakwʼa, ndethĩawa atonya kũũngamĩa malĩ yake ĩngĩ. (Mũta. 9:5, 6) Kwoou matanakwʼa, aingĩ nĩmaandĩkaa maandĩko masiĩle ala maeleetye ũndũ mekwenda malĩ yoo yĩawa. (2 Asu. 20:1) Ĩngĩ, ũla ũandĩkĩte maandĩko asu masiĩle nĩwĩthĩawa aeleetye ũla ũkwenda eũngamĩa kũawa kwa malĩ yake. Nthĩnĩ wa nthĩ mbingĩ, ethĩwa maandĩko masiĩle mai vo, silikalĩ nĩyĩũngamĩaa kũawa kwa malĩ ya mũkwʼũ. Kwoou, ethĩwa twĩ na wendi mũna ĩũlũ wa malĩ yitũ, kwa ngelekanyʼo ethĩwa twĩenda yonthe kana ĩmwe yayo yĩtiĩwa ũseũvyo wa Yeova, nĩ ũndũ wa vata twĩthĩwe na maandĩko masiĩle ala monanĩtye ũu na tũinyuva nesa mũndũ ũla tũkwenda eũngamĩa kũawa kwa malĩ ĩsu.

Mũndũ ũla ũnyuvĩtwe eũngamĩa kũawa kwa malĩ ya mũkwʼũ e na wĩa mũito. Kwosana na wingĩ wa malĩ, nĩvatonya kũtũmĩka ĩvinda yingĩ na vakethĩwa na maũndũ maingĩ ma kwĩka nthĩnĩ wa kũmbanyʼa na kũaa malĩ ĩsu. Ĩngĩ, mavinda maingĩ silikalĩ nĩyĩthĩawa na mĩao ĩla no nginya ĩatĩĩwe. Ti onthe kĩkundinĩ matonya kũũngamĩa kũawa kwa malĩ nesa. Mũndũ ũla tũũnyuva aĩle kwĩthĩwa ne mũndũ twĩsĩ nũtonya wĩa ũsu, nĩ mũĩkĩĩku, na nũkwenda kwĩanĩsya ũndũ twĩyĩaĩte.—Sisya ĩkaseti ya Amkeni! ya Ndiisemba 8, 1998, ungu wa kyongo “Hekima na Manufaa za Kupanga Urithi wa Mali.”

Wakũlwʼa Wĩũngamĩa Kũawa kwa Malĩ: Wakũlwʼa ethĩwa nũkwenda wĩũngamĩa kũawa kwa malĩ mwene akwʼa, amba kũtala ngalama na ũivoya ũtanatwʼa ethĩwa nũtonya kwĩanĩsya wĩa ũsu. (Luka 14:28-32) Mũndũ ũla ũkũnyuvĩte akwʼa, waĩle kũmanyĩthya onthe ala matiĩwe malĩ. Na ĩndĩ ĩvinda yavika ya kũaa malĩ, nĩ wĩa waku kũmĩaa kwosana na mĩao na ũndũ maandĩko masiĩle ma mũkwʼũ maĩtye. Ũla ũnyuvĩtwe eũngamĩa kũawa kwa malĩ aĩle kũmanya kana, malĩ ĩsu yĩthĩwe nĩ mbingĩ kana nĩ nini, aĩle kũatĩĩa kyonthe kĩla kĩandĩke. Malĩ ĩla ĩtiĩwe mũvea wa Ngũsĩ sya Yeova mũandĩkĩthye silikalĩnĩ nĩ malĩ mbathe yaĩle kũnengwa ũseũvyo wa Yeova.—Luka 16:10; 21:1-4.