Yeova Nũathimaa Ala Maumasya na Ngoo ya Kwenda

MŨMBI witũ nĩwoonanisye kana nũnengete andũ ndaĩa kwa kũmanenga mũthĩnzĩo mataĩ mathooekya, naw’o nĩ ũthasyo wa kũnyuva. O na ĩngĩ, nũmaathimaa mũno ala matũmĩaa nesa ũthasyo woo wa kũnyuva, na ala mekĩaa kĩthito kũthesya syĩtwa yake na kũkwata mbau kĩeleelo kyake nĩ kana maendeesye ũthaithi waw’o. Yeova ndatũlasimĩthasya kũmwĩw’a. Vandũ va ũu, endaa tũmwĩw’e nũndũ nĩtũmwendete na nĩtwendeeaw’a nĩ ũndũ ũtwĩkĩte.

Kwa ngelekany’o, ĩla Aisilaeli maĩ weũnĩ wa Sinai, Yeova nĩwameĩaĩe make vandũ va kũthaithĩa. Ameie atĩĩ: “Mumĩsyei Yeova nthembo kuma kwenyu; o ũla wĩ na ngoo ya kwenda, namĩete, nthembo ya Yeova.” (Kuma 35:5) Kĩla Mũisilaeli aĩ atonya kumya kwa ngenda kĩla waĩ nakyo, na mĩvothi ĩsu o na ethĩwa yĩana ata, yatũmĩkaa nesa wĩanĩ wa Ngai. Aisilaeli meekie ata?

“Kĩla ũmwe ũla ngoo yake yamũthangaasya” na “kĩla ũmwe ũla veva wake watumaa enda” nĩwaumisye ‘na ngoo ya ngenda.’ Aũme na aka nĩmaumisye syĩndũ syoo kwa ngoo ya kwenda kwondũ wa wĩa wa Yeova. Maumisye syĩndũ ta mavĩnĩ, ngome sya matũ, ngome sya ũvana ũsiĩlo, thaavu, vetha, ũthuku, ndii sya vuluu, wia ũilyĩ ta mũtune, itambaa ndune mũno, katane nzeo, maw’ĩa ma mbũi, mbũa sya ndũũme syĩkĩĩtwe langi mũtune, mbũa sya vomboo, mĩtĩ ya mũea, tũvila twa nzumalati, mĩtĩ ĩla ĩnyungaa nesa, na mauta. Ĩtina, ‘syĩndũ ila maĩ nasyo nĩsyeanĩe kũtethya wĩa ũsu w’onthe, o na syathonoka.’—Kuma 35:21-24, 27-29; 36:7.

Kĩla kyamũtanĩthisye Yeova ti syĩndũ ila maumisye, ĩndĩ nĩ ngoo ya kwenda ya ala matetheeisye ũthaithi wake mũtheu. O na nĩmatũmĩie ĩvinda na vinya woo kũtetheesya wĩa ũsu. Mbivilia yaĩtye atĩĩ: “Aka onthe ala maĩ na ngoo syĩ na ũĩ mokothaa na moko moo.” Ĩĩ, “aka onthe ala ngoo syoo syamathangaasya methĩwe oĩ mokothaa maw’ĩa ma mbũi.” O na ĩngĩ, Yeova nĩwamũnengie Mbesaleli ‘ũĩ, ũmanyi, na ũmanyĩsyo wĩanĩ wa mĩthemba yonthe.’ Ngai nĩwanengie Mbesaleli na Ooliavu ũmanyi ũla wendekaa nĩ kana matethye wĩa w’onthe ũla wamanengete.—Kuma 35:25, 26, 30-35.

Ĩla Yeova weeie ana ma Isilaeli mamumĩsye syĩndũ, nĩweesĩ nesa vyũ kana ala ‘maĩ na ngoo ya kwenda’ nĩmeũkwata mbau ũthaithi wake. Nũndũ wa kwĩka ũu, Yeova nĩwamaathimie mũno kwa kũmatongoesya na meethĩwa na ũtanu mwingĩ mũno. Na ũu woonany’a kana ĩla Yeova waathima ala maumasya na ngoo ya kwenda aĩkĩĩthasya kana vai kĩndũ o na kĩmwe kĩte vo, kana ũmanyi ũla ũkwendeka nĩ kana eanĩsye kwenda kwake. (Sav. 34:9) Weeyumya kũmũthũkũma Yeova kuma ngoonĩ, vate ndĩi akakũathima.

ŨNDŨ AMWE MAUMASYA MĨVOTHI KWONDŨ WA WĨA WA KŨTAVANY’A NTHĨ YONTHE

O tondũ Aklĩsto ma ĩvinda ya Vaulo meekaa, ũmũnthĩ Aklĩsto aingĩ ‘nĩmaiaa’ kĩndũ kana makavangĩĩa mbesa siana ũndũ mũna na maisyĩkĩa ĩsandũkũnĩ yĩla yĩthĩawa kĩkundinĩ yĩandĩkĩtwe, “Kazi ya Ulimwenguni Pote.” (1 Ako. 16:2) Kĩla mwei, ikundi nitũmaa mbesa isu ovisinĩ wa ũvonge. O na no ũtũme mĩvothi yaku mwene ovisinĩ wa ũvonge wa Ngũsĩ sya Yeova. Ethĩwa nũkwenda kũmanya vala waĩle kũtũma mĩvothi ĩsu, neena na ovisi wa ũvonge. No ũkwate namba sya ovisi wa ũvonge nthĩnĩ wa www.jw.org. Mĩvothi ĩla ũtonya kũtũma ĩmwe kwa ĩmwe ovisinĩ wa ũvonge nĩ:

MĨVOTHI ĨLA YUMAW’A VATE MŨVANGO WA KŨTŨNGĨWA

Ĩĩ nĩ mĩvothi ĩla mũndũ ũtonya kumya atũmĩĩte kaati sya vengi. Maovisinĩ amwe ma ũvonge andũ nĩmaumasya mĩvothi ĩsu kwĩsĩla Kĩsese kya jw.org kana Kĩsese kĩngĩ kĩla kĩtĩkĩlĩtw’e.
Mĩvothi ya mbesa na syĩndũ ingĩ ta mbete, mbangili kana syĩndũ ingĩ sya thooa mũnene. Andĩka valũa ũeleetye kana waumya mĩvothi ĩsu ũte na mũvango wa kũtũngĩwa ĩngĩ.

MĨVOTHI ĨTONYA KŨTŨNGĨWA ŨLA UMĨTYE

Ĩĩ nĩ mĩvothi ya mbesa ĩtonya kũtũngĩwa ũla waumya ethĩwa nũkwenda.
Andĩka valũa ũeleetye kana no ũtũngĩwe mĩvothi ĩsu waumya wamyenda.

NZĨA INGĨ SYA KUMYA MĨVOTHI

O vamwe na kumya mĩthĩnzĩo ya mbesa na syĩndũ ingĩ sya thooa mũnene, ve nzĩa ingĩ ũtonya kũtũmĩa nĩ kana ũtetheesye wĩa wa Ũsumbĩ. Nzĩa isu nĩsyonanĩtw’e vaa ĩtheo. Ũtanamba kũtw’a nzĩa ĩla ũkwenda kũtũmĩa kumya mĩvothi, neena na ovisi wa ũvonge nĩ kana ũmanye nĩ nzĩa syĩva itũmĩawa nthĩ yenyu. Nũndũ kĩla nthĩ yĩ mĩao yĩ kĩvathũkany’o na nzĩa syĩ kĩvathũkany’o sya kumya koti, nĩ ũseo ũkamba kũneena na andũ ala me na ũtũĩka ĩũlũ wa mĩao na ĩũlũ wa kumya koti ũtambĩte kũnyuva nzĩa ĩla ũũtũmĩa kumya mĩvothi.

Inisualenzi (Insurance): Ii nĩ mbesa sya litaya, venzeni (pension) kana sya inisualenzi ila mũndũ ũandĩkaa onanĩtye ikanengwa ovisi wa ũvonge wa Ngũsĩ sya Yeova, ĩtina wa kũlitaya kana kũkw’a.

Mbesa syĩ Akaondinĩ (Bank Accounts): Ii nĩ mbesa syĩ akaondinĩ ila mũndũ ũtonya kũandĩkĩthya syĩnengwa ovisi wa ũvonge wa Ngũsĩ sya Yeova kwosana na mĩao ya vengi sya kwoo.

Nyũmba Kana Kĩtheka: Ĩĩ nĩ mĩvothi ĩla mũndũ ũtonya kumya ya syĩndũ itonya kũthoow’a ta nyũmba kana kĩtheka na iinengwa ovisi wa ũvonge wa Ngũsĩ sya Yeova. No avange kumya ate na mũvango wa kũtũngĩwa ĩngĩ, kana ethĩwa nĩ nyũmba ya kwĩkala, no aandĩke onanĩtye kana akw’a, ĩkeethĩwa yĩ ya ovisi wa ũvonge wa Ngũsĩ sya Yeova.

Wĩlũ (Wills and Trusts): Malĩ kana mbesa nitonya kũandĩkĩthw’a syĩnengwa ovisi wa ũvonge wa Ngũsĩ sya Yeova. Mũndũ no eke ũu kwa kũandĩka valũa wosanĩte na mĩao wonanĩtye kana ovisi wa ũvonge nĩw’o ũkatiĩwa malĩ ĩtina wa kũkw’a. Mũvango ũũ no ũolange koti ũla mũndũ waĩle kũĩva.

Nĩ kana mũndũ aumye mĩvothi atũmĩĩte nzĩa isu, nĩ ũndũ wa vata akavangĩĩa tene kĩla ũkaumya. Nĩ kana andũ mamanye ũndũ matonya kumya mĩvothi matũmĩĩte nzĩa ingĩ, mbulosua yĩtawa Charitable Planning to Benefit Kingdom Service Worldwide nĩyumĩtw’e kwa kĩthyomo kya Kĩsũngũ na kya Spanish. Kĩeleelo kya kumya mbulosua ĩno nĩ kwony’a andũ nzĩa syĩ kĩvathũkany’o ila matonya kumya mĩthĩnzĩo kana makonany’a ũndũ syĩndũ syoo syĩtũmĩwa makw’a. Ũvoo ũla wĩ nthĩnĩ wa mbulosua ĩno no wĩthĩwe ũtatonya kũtũmĩwa vyũ nthĩ yenyu nũndũ kĩla nthĩ yĩthĩawa na mĩao yayo ya kumya koti. Kwoou, ĩtina wa kũsoma mbulosua ĩno waĩlĩte kũneena na ala mesene na mĩao kana maũndũ ma kũĩva koti. Andũ aingĩ nĩmatũmĩĩte nzĩa ila syonanĩtw’e mbulosuanĩ ĩsu kũtetheesya wĩa wa kũtavany’a na wa kumya ũtethyo ĩla kweethĩwa na mĩisyo, na ũu nũtumaa maolangwa koti. Ethĩwa mbulosua ĩsu yĩ vo na nũkwenda kũmĩsoma kũlya mũandĩki wa kĩkundi kyenyu aũnenge.

Nĩ kana ũkwate ũvoo mwingangĩ, no ũneene na ovisi wa ũvonge ũla ũũngamĩe nthĩ yenyu.