Mathokye!
1. Nĩ ĩvindanĩ yĩva twĩthĩawa na mwanya mũseo wa kumya ũkũsĩ, na nĩkĩ?
1 Ĩvindanĩ ya kũlilikana kĩkwʼũ kya Yesũ, twĩthĩawa na mwanya mũseo mũno wa kumya ũkũsĩ. Kwa ngelekanyʼo, mwaka ũũ twĩĩkwatya aeni mbee wa milioni ĩkũmi nĩmatonya kũka ũmbanonĩ wa kũlilikana kĩkwʼũ kya Yesũ, na maitetheewʼa kwona wendo mũnene ũla Yeova na Yesũ matwonisye kwĩsĩla nthembo ya wovosyo. (Yoa. 3:16; 15:13) Makeemanyĩsya ĩũlũ wa moathimo ala maumanaa na nthembo ya wovosyo. (Isa. 65:21-23) O na ũu, ti mumya wa ũvoo e weka ũkaumya ũkũsĩ ĩvindanĩ yĩĩ. Ithyonthe tũkeethĩwa na mwanya wa kumya ũkũsĩ kwa kũthokya aeni maitũ twĩ na ũtanu.—Alo. 15:7.
2. Tũtonya kũmathokya aeni ata?
2 Vandũ va kwĩkala nthĩ weteele ũmbano wambĩĩe ũkilĩtye, nĩ ũseo kũmanyana na ala mailyĩ vakuvĩ naku. Nĩkwĩthĩwa aeni no methĩwe na wʼĩa na matesĩ kĩla meteele, kũmakethya twĩ na ũtanu kũkamatetheesya kwĩwʼa me eanĩe. Nĩ kana ũmanye ethĩwa mũndũ eemũthokye, nũtonya kũmũkũlya kana nĩyo ya mbee kũka maũmbanonĩ, na kana nĩwĩsĩ mũndũ o na ũmwe kĩkundinĩ. Vatonyeka nũtonya kũmũthokya mwĩkale ĩmwe na mũitũmĩanĩa Mbivilia na ĩvuku yaku ya mbathi. Ethĩwa mũmbanĩe Nyũmbanĩ ya Ũsumbĩ, no ũmũtembesye. Mwamina ũmbano, ĩyumye ũsũngĩe makũlyo make. Ethĩwa kĩkundi kyenyu kĩuma mĩtũkĩ nĩ kana kĩngĩ kĩlike, no ũmũkũlye ũndũ woona ũmbano ũilyĩ na ũndũ mũtonya kwonana ĩngĩ. Vanga ũmũsyokee. Atumĩa ma kĩkundi maĩle kwĩthĩwa me metho nĩ kana mamekĩe vinya ala mavoie mokie ũmbanonĩ ũũ.
3. Nĩkĩ twaĩle kwosa ĩtambya ya kũmathokya aeni mooka ũmbanonĩ wa kũlilikana kĩkwʼũ kya Yesũ?
3 Kwa aeni aingĩ, yĩĩ ĩkeethĩwa yĩ ĩvinda ya mbee kwona ngwatanĩo ya andũ ma Yeova, mũuo, na ũtanu ũla methĩawa nawʼo. (Sav. 29:11; Isa. 11:6-9; 65:13, 14) Nĩ kyaũ kĩkatiwa ilĩkonĩ sya aeni maitũ ĩtina wa ũmbano ũũ? Ũu ũkoosana na ũndũ tũkamathokya.