Ũndũ Tũtonya Kwĩthĩwa Atavanyʼa Aseo—Kwĩka Mũvango wa Kĩla Mwĩneenea Wasyoka

Nĩkĩ Nĩ Ũndũ wa Vata?: Ĩla twakomana na mũndũ ũkwendeewʼa, twaĩle kũsyoka ĩvinda yĩla ũtonya kũkwatĩkana nĩ kenda tũngʼithye mbeũ sya Ũsumbĩ ila twavanda. (1 Ako. 3:6) Nĩ kenda twĩke ũu, tũtanamba kuma kwa mwene nyũmba twaĩlĩte kũvanga ĩla twĩmũsyokea. Ũndũ ũngĩ mũseo nĩ kũmũkũlya ĩkũlyo yĩla twĩsũngĩa twasyoka. Kwĩka ũu kũkatuma ethĩwa na mea ma kũtweteela ĩla ĩngĩ. Ethĩwa ĩkũlyo yĩla twamũkũlya nĩyĩsũngĩĩtwe ĩvukunĩ yĩla twamũtiĩa, nĩvatonyeka akendeewʼa nĩ kũyĩsoma. Kũvangĩĩa ũndũ ũla mwĩneenea wasyoka nĩkũtumaa wĩthĩwa wĩ ũndũ wĩ laisi kũsyoka nũndũ nĩmwanyuva kĩla mwĩneenea, na mwene nyũmba nĩwĩsĩ mũkaneenea kyaũ. Twamũsyokea, no tũmũelesye twooka kũmũsũngĩa ĩkũlyo yĩla twatiie ĩvinda ya mbee na ĩndĩ tũiendeea na ũneenanyʼa.

Ũtonya Kwĩka Ũu Ata?:

Ĩla ũkwĩyũmbanĩsya maũndũ ala ũũthi kũneenea ũtavanyʼanĩ, ndũkalee kwĩyũmbanĩsya ĩkũlyo yĩla ũũthi kũkũlya mwene nyũmba nĩ kana wĩyĩsũngĩa wasyoka. Ĩkũlyo yĩu no yĩthĩwe yĩsũngĩĩtwe ĩvukunĩ yĩla ũũmũtiĩa, kana yĩsũngĩĩtwe nthĩnĩ wa yĩmwe ya mavuku ala tũtũmĩaa kũmanyĩsya andũ Mbivilia, na no ũmwonyʼe ĩvuku yĩu wasyoka.
Ũtanamba kũmina kũneena na mũndũ wendeewʼa, mũtavye kana no wende kũmũsyokea ĩngĩ na ũimũtavya ĩkũlyo yĩla mũkasũngĩa wasyoka. Isionĩ imwe, andũ methĩawa makwatene mũno na no mewʼe ũtulu wa kũtũthokya ĩngĩ. Ethĩwa vailyĩ ũu, no ũmũkũlye atĩĩ: “Ũũ nĩwʼo mũthenya mũseo kwaku tũtonya kũkwĩthĩa? [Eteela asũngĩe.] Kyumwa kyu kyũkĩte ngatana mũno kwĩsĩla kũũ kwaku nĩ kenda ngũsũngĩe ĩkũlyo yĩĩ . . . Neethĩa ũkwatene mũthenya ũsu, wĩndavya.”
Weea mwene nyũmba ũkasyoka, waĩle kũsyoka saa ila mwavanga. (Mt. 5:37) Wasyoka, ĩka mũvango wa kĩla mwĩneenea ĩla ĩngĩ ũiminĩĩa kũneena nake.

Tata Kwĩka Ũndũ Ũũ Mweinĩ Ũũ:

Ĩla ũũvanga kĩla ũũthi kũneenea ũtavanyʼanĩ, sũanĩa ĩkũlyo yĩla ũtonya kũkũlya mwene nyũmba wĩmũsũngĩa wasyoka. Tavya ũla ũũtavanyʼa nake ĩkũlyo yĩu.