Endeea Kwĩka Maendeeo wĩ Mũtavanyʼa
1. Nĩ ngelekanyʼo syĩva sya ĩvinda ya atũmwa syĩkwonanyʼa kana nĩtwaĩle kũendeea kwĩka maendeeo wĩanĩ witũ wa kũtavanyʼa?
1 Aklĩsto nĩmaĩle kwĩka maendeeo wĩanĩ woo wa kũtavanyʼa. Kĩu nĩkyo kĩtumi Yesũ waendeeie kũmanyĩsya aatĩĩi make. (Luka 9:1-5; 10:1-11) O na nokyo kĩtumi Akwila na Vilisila mamwosie Avolo na “mamũvuanĩsya nzĩa ya Ngai nesa mbee wa vala wesĩ.” (Meko 18:24-26) Na nũndũ wa kĩtumi o kĩu, o na kau Timotheo aĩ na ũmanyi wa kũtavanyʼa, Vaulo nĩwamũthangaaisye aendeee kwĩka maendeeo kũmanyĩsyanĩ kwake nĩ kenda maendeeo make methĩwe me ‘moneku kwa onthe.’ (1 Tim. 4:13-15) O na ethĩwa twĩthĩĩtwe tũimũthũkũma Mwĩaĩi kwa ĩvinda ĩasavĩte ata twĩ atavanyʼa ma ũvoo mũseo, nĩtwaĩle kũendeea kũseũvĩĩsya nzĩa sitũ sya kũtavanyʼa.
2. Twaĩle kwĩka ata nĩ kana twĩmanyĩsye kumana na ala angĩ?
2 Ĩmanyĩsye Kumana na Ala Angĩ: Nzĩa ĩmwe ya kwĩka maendeeo ũtavanyʼanĩ witũ nĩ kwa kwĩmanyĩsya kuma kwa ala angĩ. (Nth. 27:17) Kwoou, ĩthukĩĩsye nesa ĩla mũtavanyʼa ũla wĩ nake ũkũneena na mwene nyũmba. Kũlya atavanyʼa ala me na ũmanyi mwingĩ makũelesye maũndũ mana ala matonya kũũtetheesya, na ũyĩthukĩĩsya nesa ũndũ meũkwĩa. (Nth. 1:5) Nĩwĩthĩwa wĩ na nzika ĩũlũ wa ũndũ ũtonya kũsyokea mũndũ, kwambĩĩa kwĩmanyĩsya Mbivilia na mũndũ, kana kũtavanyʼa kwa nzĩa ingĩ? Osa ĩtambya ya mbee, na ũikũlya mũsyaĩĩsya wa kĩkundi kyaku kya ũtavanyʼa kana mũtavanyʼa ũngĩ wĩ na ũmanyi aũtetheesye. O na ĩngĩ, lilikana kana veva wa Yeova no ũkũtetheesye. Kwoou mũvoyae Yeova kĩla ĩvinda aũnenge veva wake.—Luka 11:13.
3. Twaĩle kwĩka ata ĩla twatavwʼa ũndũ ũtonya kũtũtetheesya o na tũtakũlĩtye?
3 Ĩla watavwʼa ũndũ ũtonya kũũtetheesya o na ũtakũlĩtye, ndũkathate. (Mũta. 7:9) O tondũ Avolo weekie, ĩtĩkĩla ũtethyo wĩnyivĩtye na ũitũnga mũvea. Kwĩka ũu kwonanasya wĩ mũĩ.—Nth. 12:15.
4. Yesũ awetie kĩtumi kĩva kya vata kĩla kyaĩle kũtuma twĩka maendeeo wĩanĩ wa kũtavanyʼa?
4 Ngai Nũtaĩawa Ĩla Tweeka Maendeeo: Yesũ nĩwatũmĩie ngelekanyʼo kwĩkĩa vinya amanyĩwʼa make meke maendeeo wĩanĩ wa kũtavanyʼa. Eeyĩelekanilye na mũsavivũ na aelekanyʼa Aklĩsto etĩkĩwʼa mauta na tũũvonge. Aisye kana Ĩthe wake nũtheasya kĩla kaũvonge kasyaa “nĩ kana kongeleke ũsyaa.” (Yoa. 15:2) O tondũ mwene mũũnda wa mĩsavivũ wendaa tũũvonge twa mĩsavivũ yake tũsyae mũno, nowʼo Yeova wendaa twĩke maendeeo nĩ kana twongele “ũsyao wa ilomo sitũ.” (Aevl. 13:15) Nĩ ũndũ mwaũ wa vata twĩanĩasya ĩla tweeka maendeeo wĩanĩ wa kũtavanyʼa? Yesũ asũngĩĩte ta ũũ: “Asa wakwa nũtaĩawa ũndũnĩ ũũ wa inywʼĩ kũsyaa ũsyao mwingĩ.”—Yoa. 15:8.