Ũndũ Tũtonya Kwĩthĩwa Atavanyʼa Aseo—Tetheesya Ũla Ũũtavanyʼa Nake

Nĩkĩ Nĩ Ũndũ wa Vata?: Yesũ nĩweesĩ nĩ ũndũ wa vata andũ kũtavanyʼa me elĩ. Nĩkyo kĩtumi ĩla watũmie amanyĩwʼa make 70 mathi makatavanyʼe, amatũmie elĩ elĩ. (Luka 10:1) Ĩla andũ meũtavanyʼa me elĩ, ũmwe nũtonya kũtetheesya ũla ũngĩ ĩla vaumĩla thĩna kana ethĩwa ndesĩ nesa ũndũ ũtonya kũsũngĩa mwene nyũmba. (Mũta. 4:9, 10) Mũtavanyʼa ũsu nũtonya kũtavya ũla wĩ nake ũndũ we wĩkaa, na mavinda amwe no aumye woni ũtonya kũtetheesya ũla meũtavanyʼa ĩmwe ethĩwe mũtavanyʼa mũseo. (Nth. 27:17) O na ĩngĩ nũtonya kwĩkĩa mũtavanyʼa ũsu vinya kwa kũneenea maũndũ ma kwaka ĩla mauma nyũmba ĩmwe maendete ĩla ĩngĩ.—Avi. 4:8.

Ũtonya Kwĩka Ũu Ata?:

Ĩthukĩĩsye nesa ũla ũngĩ aineena. (Yak. 1:19) Ĩla ũkũsomea mwene nyũmba ĩandĩko, o naku yĩsome Mbivilianĩ yaku. Weeka ũu, ĩkeethĩwa laisi kũmũtetheesya ethĩwa ve vata.
Tũmĩa ũĩ ũmanye ethĩwa nĩwaĩle kũneena na nĩ ĩndĩĩ waĩle kwĩka ũu. (Nth. 25:11) Ĩla watwaa mũtavanyʼa akemanyĩsye na mũmanyĩwʼa wake wa Mbivilia, no atane mũno waumya maelesyo mavinda kwa mavinda. Ĩndĩ, ĩla mũũtavanyʼa nyũmba na nyũmba, ũla wĩ nake no ende aneene ateũlikĩlĩĩlwa ĩvinda yake yavika. Ethĩwa nĩ mũtavanyʼa mweũ kana ethĩwa ndesĩ ũndũ ũtonya kũsũngĩa ĩkũlyo kana ũndũ ũtonya kwĩka avĩngwa, no atane wamũtetheesya. Ĩndĩ o na ethĩwa mwĩtavanyʼa nyũmba na nyũmba, mwĩ masyokeonĩ, kana mwĩĩmanyĩsya Mbivilia na mũndũ, ndũkalikĩlĩĩle ũla ũngĩ aineena kana wambĩĩe kũneenea maũndũ me kĩvathũkanyʼo.
Elesya we wĩkaa ata. Ethĩwa mavinda amwe nũkwĩwʼa ũtonya kũnenga mũtavanyʼa ũla wĩ nake woni wa kũmũtetheesya ethĩwe e mũtavanyʼa mũseo, ndũkaeme kwĩka ũu. (Nth. 3:27) Wakwata mwanya mũseo wa kũmũtetheesya, no ũmũkũlye: “Woona mwene nyũmba ũsu ata?” kana “No nĩwete nzĩa ĩngĩ tũtonya kũtũmĩa?” kana no ũmwĩe, “Kwaeka ngũelesye ũndũ nyie nĩkaa.” Nũseo kũlilikana kana, o na kũtwʼĩka atavanyʼa amwe no matane wamanenga woni mavinda kwa mavinda, nĩmatonya kũtũlĩka ngoo ethĩwa ũkamalũngaa kĩla ĩvinda mavĩtya.

Tata Kwĩka Ũndũ Ũũ Mweinĩ Ũũ:

Ĩla mwamina kũtavanyʼa, tavya ũla ũũtavanasya nake ũndũ ũkũtetheeisye.