Ĩyũmbanyʼe Kũthokya Aeni

Matukũ 23, andũ vakuvĩ milioni 12, kana aingĩ kũte asu makoombana kũlilikana kĩkwʼũ kya Yesũ vamwe naitũ. Makatetheka mũno nĩ ũvoo ũla ũkethĩwa ũineenea ĩũlũ wa mũthĩnzĩo wa wovosyo ũla Yeova waumisye, na moathimo ala tũkakwata ĩvinda yũkĩte! (Isa 11:6-9; 35:5, 6; 65:21-23; Yoa 3:16) Ĩndĩ ti o mumya wa ũvoo e weka ũkaumya ũkũsĩ ũmbanonĩ ũsu wa vata. Ithyonthe tũkeethĩwa na mwanya wa kwĩka ũu kwa kũthokya aeni maitũ. (Alo 15:7) Vaa nĩvonanĩtwʼe maũndũ amwe tũtonya kwĩka.

• Vandũ va kwĩkala nthĩ na kweteela ũmbano wambĩĩe, thokya aeni na ala mavoie wĩ mũtanu

• O na kau no wendeewʼe mũno nĩ kũthokya ala wathokisye, ndũkolwe nĩ ala angĩ methĩwa mokie ũmbanonĩ ĩtina wa kũthokwʼa nĩ atavanyʼa ala angĩ. Mathokye mwĩkale ĩmwe na mũitũmĩanĩa Mbivilia na ĩvuku ya mbathi

• Ĩtina wa ũvoo, ĩthĩwa vakuvĩ nĩ kana ũmũsũngĩe makũlyo ala ũtonya kũkũlya. Ethĩwa vatiele ndatĩka nini mumaale nĩ kana kĩkundi kĩla kĩatĩĩe kĩlike, ĩka mũvango ũthi kwake mĩthenya mĩvũthũ ĩtina wa ũmbano ũsu. Ethĩwa ndwĩ na namba yake ya simũ kana ndwĩsĩ kwake, no ũmwĩe kana nũkwenda kwĩwʼa woni wake ĩũlũ wa ũmbano ũsu, na ũimũkũlya aũnenge namba yake ya simũ kana akwathĩĩe kwake