Ũndũ Mũmbi Witũ wĩ Wendo Ũtũvuanĩsye Mawatho Make

Kuma yĩla andũ moombiwe, Mũmbi witũ ethĩĩtwe aineena naitũ kwĩsĩla alaĩka na athani. O na ĩngĩ, nĩwaandĩkĩthisye ũtũmane wake na mawatho make. Ngai nĩwathanĩte kana ĩvinda yũkĩte kĩla mũndũ akekalaa e mũtanu. Kwoou, ũmũnthĩ nĩ va ũtonya kũkwata maũndũ ala Ngai wathanĩte?

Ngai aneenaa naitũ ũmũnthĩ kwĩsĩla Maandĩko Matheu. (2 Timotheo 3:16) Ĩndĩ we atũmĩie athani ata kũandĩka ndeto ila wendaa? (2 Vetelo 1:21) Eekĩie mosũanĩo make ilĩkonĩ sya andũ ala maandĩkie ũtũmane wake, na ĩndĩ mamaandĩka. Ũu nowʼo andũ mekaa. Kwa ngelekanyʼo, mũnene wĩanĩ nũtonya kũtavĩĩsya mũandĩki wake kĩla ũkwenda kĩandĩkwe valũanĩ. Valũa ũsu waandĩkwa nĩ waũ? Nĩ wa mũnene ũsu, ĩndĩ ti wa mũandĩki wake. O ta ũu, o na kau Ngai nĩwatũmĩie andũ kũandĩka ũtũmane wake, we nĩwe Mũandĩkĩthya wa Maandĩko Matheu.

NDETO YA NGAI NĨVIKĨĨTE ANDŨ ONTHE

Ũtũmane wa Ngai nĩ wa vata mũno na kwoou endaa andũ onthe maũsome na maiũelewa. Ũmũnthĩ, “ũvoo mũseo wa tene na tene” nũvikĩĩte “kĩla mbaĩ na ũko na kĩthyomo na andũ.” (Ũvuanyʼo 14:6) Nũndũ wa ũathimo wa Ngai, no tũkwate Maandĩko Matheu me onthe kana o kĩlungu kyamo kwa ithyomo mbee wa 3,000. Vai ĩvuku yĩngĩ o na yĩva ĩũlũ wa nthĩ yaalyũlwa na ithyomo mbingĩ ũu.