‘Tavanyʼa Mwaka wa Ũseo wa Yeova’

“Mwaka wa ũseo wa Yeova” ti ũndũ ũmwe na mwaka ũmwe wa mĩthenya 365

61:1, 2

• Mwaka ũsu nĩ ĩvinda yĩla Yeova ũnengae ala auu mwanya wa kwĩka ũtwi mũseo ĩla matavwʼa ũvoo mũseo wa ũthasyo

• Ĩvindanĩ ya atũmwa, mwaka wa ũseo wambĩĩie ĩla Yesũ wambĩĩisye ũtavanyʼa wake mwaka wa 29, na waendeea nginya “mũthenya wa ũĩvanĩsyo” wa Yeova ĩla Yelusaleme yaanangiwe mwaka wa 70 Klĩsto aminĩte kũsyawa

• Ĩvindanĩ yitũ, mwaka wa ũseo wambĩĩie ĩla Yesũ watwʼĩkie Mũsumbĩ ĩtunĩ mwaka wa 1914 na ũkathela ĩvindanĩ ya thĩna mũnene

Yeova nũathimaa andũ make na “mĩtĩ ya ũlũngalu”

61:3, 4

• Mĩtĩ ĩla mĩasa vyũ ĩũlũ wa nthĩ ĩanaa ĩthungĩanĩe, na yĩthĩawa yĩ mĩlũmu

• Mĩi ĩla yĩthĩawa yĩ mĩasa no ĩkwatane na mĩi ya mĩtĩ ĩngĩ na ĩyĩthĩwa yĩ ndũmu mũno, na ũu ũituma mĩtĩ ĩsu ĩtavalũka o na kwooka kĩuutani kĩnenevete ata

• Mĩtĩ ĩla mĩasa nĩtumaa tũmĩtĩ tũla tũnini tũkwata muunyĩ, na matũ ala metĩkaa kuma mĩtĩnĩ ĩsu nĩmatumaa mũthanga ũnoa

Onthe kĩkundinĩ kya Kĩklĩsto ĩũlũ wa nthĩ nĩmatethekaa kumana na ũtethyo ũla makwataa kuma kwa “mĩtĩ ya ũlũngalu,” nayo nĩ etĩkĩwʼa mauta ala matiele kũũ nthĩ