Tũmĩa Mavuku Maitũ Nesa

Yesũ amanyĩisye atĩĩ: “Nĩmwosete mana, nenganai mana.” (Mt 10:8) Tũatĩĩaa ũtao ũsu ĩla twanenga andũ mavuku maitũ vamwe na Mbivilia tũte kũmathooesya. (2Ako 2:17) Ĩndĩ o na ũu wĩ o vo, mavuku asu methĩawa na ũvoo wa wʼo na wa vata kuma Ndetonĩ ya Ngai. Nĩvendekaa kĩthito kingĩ na mbesa mbingĩ nĩ kana mavuku asu matumbĩthwʼe na maitwawa ikundinĩ syĩ kĩvathũkanyʼo ĩũlũ wa nthĩ. Kwoou, nĩtwaĩle kwosa mavuku o ala matwĩanĩtye.

Ĩthĩwa wĩ mũĩ ĩla ũũnenga andũ ala angĩ mavuku, o na ĩla ũũtavanyʼa kũndũ kũla kwĩ andũ aingĩ. (Mt 7:6) Vandũ va kũnengae andũ ala twakomana namo mavuku maitũ tũtambĩte kũneena namo, nũseo tũkamba kwĩka ũu nĩ kana tũmanye kana nĩmekwendeewʼa. Ũtonya kũsũngĩa ata makũlyo aa me kasandũkũnĩ kaa? Ethĩwa ndũnamanya nesa kana ũla ũũneenaa nake nĩwendeewʼa, nĩ ũseo ũkamũtiĩa tulakiti. Ĩndĩ akwĩtya ĩkaseti kana ĩvuku yĩngĩ, no ũmũnenge.—Nth 3:27, 28.