Moathimo Ala Mũndũ Ũkwataa Atetheesya Ũngĩ

Andũ aingĩ mayĩthĩawa na lĩu wĩanĩtye na vandũ vaseo va kwĩkala. Namo angĩ mendaa o mũndũ wa kũmanenga wĩkwatyo wa ĩvinda yũkĩte. Yĩla twatetheesya andũ ta asu nĩtũmwendeeasya Ngai na aitũathima.

KĨLA MAANDĨKO MATHEU MAĨTYE ĨŨLŨ WA ŨNDŨ ŨSU

“Ũla wĩwʼĩaa ngya tei akovethasya Yeova, na wĩko wake mũseo akamũĩva ĩngĩ.”—NTHIMO 19:17.

TWAĨLE KWĨKA ATA TŨTETHEESYE MŨNDŨ WĨ NA VATA?

Yesũ nĩwanenganie ngelekanyʼo ya mũndũ wavũiwe nĩ ingʼei na atiwa angĩe kũkwʼa. (Luka 10:29-37) Mũndũ ũngĩ ũtamwĩsĩ na wendete kũtetheesya andũ nĩwamwĩthĩie, na amũtetheesya. Eekie ũu o na kau maumĩte mbaĩnĩ syĩ kĩvathũkanyʼo.

Mũndũ ũsu eekie maũndũ elĩ. Oosie ĩtambya ya kũiita mũndũ ũsu mawũũmĩsye make na kũmũnenga syĩndũ ingĩ ila waĩ na vata nasyo, na kelĩ nĩwamũkiakĩisye na amũtetheesya kũusya.

Ngelekanyʼo ĩsu yĩtũmanyĩsya ũndũ wĩva? Yesũ oonanasya kana nĩtwaĩle kwĩka kyonthe kĩla tũtonya tũtetheesye andũ ala me na mathĩna. (Nthimo 14:31) Maandĩko Matheu matũmanyĩasya kana Ngai akilyĩ kũmina ũkya na mathĩna onthe. Ĩndĩ no twĩkũlye-ĩ, ‘We Ngai akamina mathĩna asu ata, na akamamina ĩndĩĩ?’ Kĩlungu kĩla kĩatĩĩe nĩkĩkũelesya moathimo ala Mũmbi waku wĩ wendo ũkwathĩte.