“Vetai Ngai Ngeni”

Yakovo nĩweesĩ kana Yeova endaa kũthaithwa e weka, o na kau ĩvindanĩ yĩu vaiĩ mwĩao woonanĩtye kana andũ mayaĩle kũthaitha ngai sya mũvwʼanano. (Kuma 20:3-5) Kwoou Yeova amina kũmwĩa asyoke Mbetheli, Yakovo nĩweeie andũ onthe ala waĩ namo mavetange ngai sya mĩvwʼanano. Andũ asu nĩmamũnengie ngai isu, vamwe na ngome sya matũ ila nĩvatonyeka ikethĩwa syeekĩawa nĩ kana mũndũ esiĩĩe ndakekwe naĩ, nake aivetanga. (Mwa 35:1-4) Vate nzika, Yeova nĩwendeeiwʼe nĩ ĩtambya yĩu Yakovo woosie.

Ũmũnthĩ, tũtonya kwĩka ata tũkonanyʼa kana tũmũthaithaa Yeova e weka? Ũndũ ũmwe wa vata mũno tũtonya kwĩka nĩ kwĩvetangana na syĩndũ ila ikonanĩtye na ngai sya mĩvwʼanano kana maveva mavuku. Ũu nĩ vamwe na kwĩvathana na syĩndũ ikonanĩtye na ũwe, na kwĩthĩwa twĩ metho ĩũlũ wa maũndũ ala tũkwĩtanĩthya namo. Kwa ngelekanyʼo, no wĩkũlye-ĩ: ‘Nĩnĩtanĩthasya na mavuku kana sinema syĩkwonanyʼa andũ meũnywʼa angĩ nthakame, maimũ, kana maũndũ angĩ mavĩtũkĩte vinya wa andũ? Ve maũndũ amwe nĩtanĩthasya namo monanasya kana kwĩka syama ivĩtũkĩte vinya wa mũndũ ti ũthũku?’ Twaĩlĩte kũeka vyũ kwĩka maũndũ ala Yeova ũmenete.—Sav 97:10.

ĨLOELEI VITIO YĨ NA KYONGO “MŨVĨNGEI NDEVILI,” NA ĨNDĨ MŨISŨNGĨA MAKŨLYO AA:

• 

  Nĩ thĩna wĩva wakwatie mũmanyĩwʼa wa Mbivilia wĩtawa Palesa?

• 

  Nĩkĩ twaĩlĩte kũmantha ũtethyo kwa atumĩa yĩla ithyĩ, kana amanyĩwʼa maitũ ma Mbivilia makwatwa nĩ mathĩna makonanĩtye na maveva mavuku?

• 

  Twaĩle kwĩvathana na maũndũ meva ethĩwa nĩtũkwenda Yeova atũsũvĩae?

• Palesa oosie ĩtambya yĩva ya vata?

• Kĩsionĩ kyenyu, nĩ maũndũ meva ala mwaĩle kwĩka nĩ kana mwĩvathane na ndaimoni?