No Ũlilikane?
Nũsomete nesa makaseti ma Mũsyaĩĩsya ma mwaka ũũ? Ethĩwa nũu, sisya ethĩwa nũtonya kũsũngĩa makũlyo aa maatĩĩe:
Nĩ kyaũ kĩtũthangaasya tũmũkumye Yeova?
Twĩkaa ũu nũndũ nĩtũmũnengete ndaĩa mũno na nĩtũmwendete mũno. O na ĩngĩ, twĩkaa ũu nũndũ nĩtwendaa angĩ mamũmanye.—w25.01, ĩth. 3.
Yĩla mũndũ watũvĩtĩsya, tũtonya kwĩka ata nĩ kana tũmũekee?
O vamwe na kũlea kũvũthĩĩsya ũndũ tũkwĩwʼa, twaeka kwoveea ũthatu ngoonĩ, tũyĩtĩkĩlasya woo ũla tũkwĩwʼa ũtume tũkua ala angĩ naĩ.—w25.02, ĩth. 15-16.
Nĩkĩ mũmanyĩwʼa Maliko ne ngelekanyʼo nzeo kwa ana-a-asa ma mũika?
Maliko nĩweetĩkĩlile na ngenda kũthũkũma angĩ. O kau nĩvatonyeka vakethĩwa ve ũndũ mũna watumie aũmĩa mũno ngoonĩ, kĩu kĩyaatuma aeka kũthũkũma ana-a-asa na eĩtu-a-asa make. Nĩweekĩie kĩthito ethĩwe na ngwatanĩo nzeo na Vaũlo na Aklĩsto angĩ aimu kĩ-veva.—w25.04, ĩth. 27.
Yesũ oonanasya ata yĩla wavoyie ũũ: “Nĩnĩmamanyĩthĩtye ĩsyĩtwa yaku”? (Yoa. 17:26)
Amanyĩwʼa make nĩmeesĩ ĩsyĩtwa ya Ngai. Ĩndĩ Yesũ nĩwamatetheeisye mamũmanye Yeova nesanga, na ũu nĩ kwasya, nĩwamamanyĩisye ieleelo syake, maũndũ ala weekĩte, na nguma syake.—w25.05, ĩth. 20-21.
Kwĩthĩwa na wĩnyivyo kũtũtetheeasya ata?
Kũtũtetheeasya kũmanya kana ve maũndũ tũtesĩ. Kwa ngelekanyʼo, tũyĩsĩ yĩla mũthya ũkavika kana ũndũ Yeova ũtonya kwĩsa kũtũtetheesya. O na tũyĩsĩ kĩla kĩkekĩka ũnĩ na tũyĩsa kũelewa nesa vyũ ũndũ Yeova ũtwĩsĩ nesa wĩana.—w25.06, ĩth. 15-18.
Nĩ kyaũ kĩtonya kũtũtetheesya tũtetheke nĩ kĩlungu kĩna kana ũvoo wa andũ onthe?
No twĩkũlye-ĩ: ‘Nĩ ũndũ wĩva ũtũmĩĩtwe kũĩkĩĩthya ala mekwendeewʼa ũwʼo ũũ? Ve ngelekanyʼo nzeo ndonya kũtũmĩa yĩla ngũmanyĩsya? Nũũ ũtonya kwendeewʼa nĩ kĩlungu kĩĩ?’—w25.07, ĩth. 19.
Tũtonya kwĩmanyĩsya kyaũ ĩũlũ wa ũekeo wa Ngai twasũanĩa ũndũ waekeie Ndaviti?
O na kau Ndaviti nĩweekie naĩ imwe ngito, yĩla weelilile kuma ngoonĩ, Yeova nĩwamũekeie. (1 Asu. 9:4, 5) Yĩla Ngai watũekea, ndalilikanaa naĩ ĩla tweekie tene kana akesa kũtũtalĩla yo ĩngĩ.—w25.08, ĩth. 17.
Ethĩwa mũmanyĩwʼa wa Mbivilia nũkũngʼangʼana kũelewa ũndũ mũna, ũtonya kwĩka ata?
Ethĩwa nũkũngʼangʼana kũelewa ũndũ mũna ĩtina wa kũmũelesya nesa ũtũmĩĩte Mbivilia, amba kũekana nawʼo na mũyĩsa kũũneenea ĩvinda yĩngĩ.—w25.09, ĩth. 24.
Mbivilia yaĩtye kana naĩ yĩ “ũkengani.” (Evl. 3:13) Ũu wonanasya ata?
Kwĩthĩwa twĩ ene naĩ no kũtume tũtatĩka kwĩka maũndũ mataĩle. O na no kũtume twambĩĩa kwĩthĩwa na nzika ethĩwa kwa wʼo Ngai nũtwendete.—w25.10, ĩth. 16.
Nĩ maũndũ meva atatũ matonya kũtuma twaĩlangya mboya sitũ?
(1) No tũvindĩĩsye nguma sya Yeova. (2) No tũsũanĩe maũndũ ala matũkwatĩte na tũimaweta, ta kwa ngelekanyʼo, vata wa kũekea mũndũ mũna. (3) No tũtũmĩe ĩvinda yingangĩ mboyanĩ. Kĩu no kĩtũtetheesye kũmũelesya Yeova nesanga ũndũ tũkwĩwʼa.—w25.10, ĩth. 19-20.
Tũtonya ata kũtetheesya ala akũũ?
No tũthokee kana tũkakũnĩa simũ ala akũũ. O na no tũendanyʼe namo yĩla maendete kwona ndakĩtalĩ. Eka ũu, no tũtavanyʼe namo.—w25.11, ĩth. 6-7.
Nĩ maũndũ meva ma vata Aklĩsto maĩle kwĩka alũsinĩ nĩ kana mamũtaĩe Yeova?
Atĩĩai mĩao ya silikalĩ. Ĩkĩĩthyai kana alũsi yenyu nĩkumĩlya ũsyao wa veva wa Ngai. Ĩthĩwai na ndaĩa mwĩkĩĩlenĩ wenyu na mũyĩĩkĩĩthya kana nĩmwaleana na syĩthĩo itosanĩte na Maandĩko. Neeneai maũndũ nesa yĩla mũendeee kũvangĩthya alũsi yenyu.—w25.12, ĩth. 21-24.