4 Kũekea

ŨU NĨ KWASYA ATA?

Kũekea kwonanasya kana nĩwaekana na ĩvĩtyo na ũieka kwĩwʼĩa ũla ũkũvĩtĩsye woo. Kũekea kũyonanasya kana nũũvũthĩĩsya ĩvĩtyo kana kwĩtwʼa vaiĩ ĩvĩtyo wĩkĩtwe.

MWOLOOTO WĨ MBIVILIANĨ: “Endeeai kũmĩanĩsya na kũekeanĩa na ngenda ethĩwa mũndũ o na wĩva e na ũndũ na ũngĩ.”—Akolosai 3:13.

“Ethĩwa nĩwendete mũndũ, ndũsiasya mavĩtyo make ĩndĩ ũsiasya ũndũ ũtatĩte ethĩwe e mũndũ mũseango.”—Aaron.

NĨKĨ NĨ ŨNDŨ WA VATA?

Yĩla wooveea ũthatu ngoonĩ, nũtonya kwĩyĩũmĩsya we mwene, na ũyananga mũtwaano waku.

“Ve ĩvinda mũemewa wambĩtisye ũekeo nũndũ wa ĩvĩtyo yambũmĩĩtye mũno. Ndwaĩ ũndũ wĩ laisi kũmũekea. Ĩtina nĩnesie kũmũekea, ĩndĩ nĩnĩlilaa nũndũ nakuie ĩvinda yĩasa ndyĩsa kwĩka ũu. Ũndũ ũsu watumĩte twĩthĩwa tũte na mũuo.”—Julia.

ŨNDŨ ŨTONYA KWĨKA

ĨYĨOSYE

Wesa kwĩthĩa ũthatiwʼe nĩ ũndũ mũna wĩkiwe kana wawetwa nĩ ũla ũtwaanĩte nake, ĩkũlye atĩĩ:

• ‘Noĩthwa noinye nĩthataa mĩtũkĩ?’

• ‘Yo ĩvĩtyo yĩu nĩ ĩnene mũno ũkethĩa no nginya ambĩtye ũekeo kana no nĩekane nayo?’

NEENEA MAKŨLYO AA WĨ NA ŨLA ŨTWAANĨTE NAKE

• Tũkuaa ĩvinda yĩana ata tũyĩsa kũekeanĩa?

• Tũtonya kwĩka ata nĩ kana tũkaekeanĩaa na mĩtũkĩ?

MAŨNDŨ MATONYA KŨŨTETHEESYA

• Yĩla wavĩtĩwʼa, ndũkasũanĩe kana ũla ũtwaanĩte nake eekie ũu na ngũlũ.

• Tata ũekee ũla ũtwaanĩte nake aũvĩtĩsya, na ũililikanaa kana “ithyonthe nĩtũlulutĩkaa mavinda maingĩ.”—Yakovo 3:2.

“Wĩthĩaa nĩ laisi kũekeanĩa ethĩwa ithyonthe nĩtũvĩtĩtye. Ĩndĩ ethĩwa nĩ mũndũ ũmwe ũvĩtĩtye ndwĩthĩawa wĩ ũndũ wĩ laisi kũekea. No nginya mũndũ ethĩwe na wĩnyivyo nĩ kana etye ũekeo na aiekeaa ala angĩ.”—Kimberly.

MWOLOOTO WĨ MBIVILIANĨ: ‘Ĩwʼanai mĩtũkĩ.’—Mathayo 5:25.