10 Ũĩkĩĩku

ŨU NĨ KWASYA ATA?

Andũ ala aĩkĩĩku methĩawa mekwetwʼe nĩ asyai moo, anyanyae moo, na ala mamaandĩkĩte. Nĩmaatĩĩaa mĩao, makeanĩsya ũndũ ũla maweta, na ĩvinda yonthe maneenaa ũla wʼo.

NĨKĨ NĨ ŨNDŨ WA VATA?

Vakuvĩ kĩla ũndũnĩ, ũnengawe ũthasyo kwosana na ũndũ wĩthĩĩtwe wĩ mũĩkĩĩku ĩvinda ĩvĩtu.

“Nĩ kana asyai maku makũĩkĩĩe, ũndũ ũmwe mũseo ũtonya kwĩka nĩ kwonanyʼa kana wĩ mũimu na wa kwĩkwatwʼa, ti o yĩla wĩ namo, ĩndĩ o na yĩla wĩ weka.”—Sarahi.

MWOLOOTO WĨ MBIVILIANĨ: “Endeeai kũĩkĩĩthya ũndũ inywʼĩ ene mũilye.”—2 Akolintho 13:5.

ŨNDŨ ŨTONYA KWĨKA

Wĩthĩwe wĩenda asyai maku makũĩkĩĩe mũnango kana wĩenda mambĩĩe kũkũĩkĩĩa ĩngĩ, maũndũ aa maatĩĩe no maũtethye.

Neenaa ũla wʼo. Yĩla wakengana, andũ nĩmaekaa na mĩtũkĩ mũno kũkũĩkĩĩa. Ĩndĩ yĩla waneena ũla wʼo na ũteũvithanyʼa kĩndũ, na mũno mũno ĩũlũ wa mavĩtyo ala wĩkĩte, andũ nĩmakũĩkĩĩaa mũnango.

“Nĩ laisi kũneena wʼo yĩla maũndũ maendeee nesa. Ĩndĩ andũ makũĩkĩĩaa mũnango yĩla waneena wʼo maũndũnĩ matonya kũtuma woneka wĩ mũthũku.”—Caiman.

MWOLOOTO WĨ MBIVILIANĨ: “Twĩenda kwĩthĩwa twĩ aĩkĩĩku maũndũnĩ onthe.”—Aevelania 13:18.

Ĩthĩwa mũndũ wa kwĩkwatwʼa. Ũkunĩkĩli ũmwe ũla weekiwe nthĩ ya Amelika wonanĩtye kana andũ 78 katĩ wa 100 ala maũngamĩĩe athũkũmi maisye kana “ũndũ ũmwe katĩ wa maũndũ atatũ ma vata ala mendekaa nĩ kana mũndũ aandĩkwe,” nĩ kwĩthĩwa e wa kwĩkwatwʼa. Kwoou, weemanyĩsya kwĩthĩwa wĩ mũndũ wa kwĩkwatwʼa oyu, ũndũ ũsu ũkaũtethya mũno watwʼĩka mũndũ mũima.

“Asyai makwa nĩmamanyaa nĩ wa kwĩkwatwʼa yĩla natethya wĩa mateũtindĩa kũndilikanyʼa. O ũndũ naendeea kwĩka maũndũ ndeũlilikanwʼa, nowʼo maendeeaa kũndĩkĩĩa.”—Sarah.

MWOLOOTO WĨ MBIVILIANĨ: “Ndi na nzika kana nũkũatĩĩa maũndũ ala naũtavya, . . . nĩsĩ kana nũkwĩka o na mbeange wa maũndũ ala naweta.”—Vilemona 21.

Ĩthĩwa na wũmĩĩsyo. Kĩvathũkanyʼo na ũndũ andũ matonya kwona mũndũ aendeee kwĩana kĩ-mwĩĩ, nĩvendekaa ĩvinda nĩ kana mũndũ amanyĩke nĩ wa kwĩkwatwʼa na nĩ mũimu.

“Asyai maku na andũ angĩ maitonya kũkũĩkĩĩa aĩ nũndũ wa kaũndũ kamwe ka kwĩkwatwʼa wĩkie. Ĩndĩ no makwĩkwatye weethĩwa na kĩmanyĩo kya kwĩkaa maũndũ nesa.”—Brandon.

MWOLOOTO WĨ MBIVILIANĨ: “Ĩvwʼĩkei . . . wũmĩĩsyo.”—Akolosai 3:12.