Ndaimoni Iũmĩĩasya Andũ Kũngʼendea Ngai

Ĩndĩ nĩ kyaũ kĩtumaa Satani na ndaimoni syake matethya wĩa na vinya mũno kũkenga andũ? Nĩ kwoondũ meenda ithyĩ twĩkwatanyʼe nao nthĩnĩ wa ũngʼendu woo. Meenda ithyĩ tũmathaithe. Meenda ithyĩ tũĩkĩĩe movũngũ moo na kũmanyĩa kwĩka maũndũ ala Yeova ũtendete. Imanyĩo mbingĩ katĩ wa isu syĩ na syĩthĩo ikonanĩtye na akwʼũ.

Kĩkwʼũ kya mwendwa-wa-mũndũ nĩ kĩndũ kĩ woo, na kwonanyʼa kyeva nĩkwĩthĩawa na nĩ kwaĩlu. Ĩtina wa kĩkwʼũ kya Lasalo mũnyanyae, Yesũ ‘nĩwaĩie.’—Yoana 11:35.

Kwĩ syĩthĩo mbingĩ ikonanĩtye na kĩkwʼũ, na syĩthĩawa syĩ kĩvathũkanyʼo kĩnene ilungunĩ syonthe sya nthĩ. Mbingĩ iileanaa na motongoesyo ma Mbivilia. Ĩndĩ, mũsingi wa imanyĩo imwe nĩ yĩla yĩsilya ya kwĩthĩwa akwʼũ me thayũ na nĩmatonya kwona ala me thayũ. Makeeo ma kũsũvĩa akwʼũ, kĩĩo kĩte wĩtingʼo, na syathĩ sya mathiko me mawanake maingĩ, maũndũ asu monthe maumanĩte na kũkĩa kũthatya maveva ma akwʼũ. Ĩndĩ kwoondũ akwʼũ “matyĩsĩ ũndũ o na wĩva,” ala mamanyĩaa kwĩka maũndũ asu maendeeasya ũvũngũ wa Satani.—Mũtavanyʼa 9:5.

Syĩthĩo kana syathĩ ingĩ syumanaa na mũĩkĩĩo wa kwĩthĩwa akwʼũ me na vata wa ũtethyo kuma kwa ala me thayũ na kwĩthĩwa malea kũkiakiwʼa nĩmekũmeka naĩ ala me thayũ. Nthĩ imwe nĩkwĩthĩawa mboka na nthembo mĩthenya mĩongo 40 kana mwaka ũmwe ĩtina wa kĩkwʼũ kya mũndũ. Ũndũ ũsu ũwetawa kana nũtethasya mũkwʼũ ‘ainge mũingo ũya ũngĩ’ wa wĩkalo wa maveva. Kĩmanyĩo kĩngĩ kĩatĩĩawa mũno nĩ kumĩsya akwʼũ kya-ũya na kya-ũnywʼa.

Maũndũ asu nĩ mavĩtyo kwoondũ maendeeasya movũngũ ma Satani ĩũlũ wa akwʼũ. Atĩĩ, Yeova no atwĩtĩkĩlye kwĩthĩwa na mũamba wa mũthemba o na wĩva vamwe na syĩthĩo syĩ na mũsingi wa momanyĩsyo ma ndaimoni? Ekana nou vyũ!—2 Akolintho 6:14-18.

Athũkũmi ma Ngai wa wʼo mayĩthĩawa na ngwatanĩo ya mũthemba o na wĩva vamwe na imanyĩo sya kwĩkwatanyʼa na movũngũ ma Satani. Vandũ va kwĩka ũu, kwa wendo malikasya mawĩthingʼĩĩsyo moo monthe nthĩnĩ wa kũtetheesya na kũkiakisya ala me thayũ. Nĩmesĩ kana mũndũ amina kũkwʼa, Yeova e weka no we ũtonya kũtethya mũndũ ũsu.—Yovu 14:14, 15.

Kũneenanyʼa-na-Maveva Nĩkũvatane Nĩ Ngai

Andũ amwe nĩmaneenaa vamwe na ndaimoni kwa nzĩa ya ĩmwe kwa ĩmwe kana kwĩsĩla mũndũ ũneenanasya na maveva. Ũndũ ũsu wĩtawa kũneenanyʼa na maveva. Kwaũsya, ũoi, kũmba ithitũ, kwĩka syama, kwathanĩa mavuso, na kũkũlya ũvoo wa akwʼũ, maũndũ asu monthe nĩ mĩthemba ya kũneenanyʼa na maveva.

Mbivilia nĩvatanaa maũndũ asu, ĩkyasya atĩĩ: “Kũikaoneke kwaku mũndũ . . . ũla ũaũasya, kana ũla ũingasya nyũnyi kana mũndũ mũe, kana mũoi, kana mwĩki wa syama, kana ũla ũkũlasya ala mesene na maveva, kana ũla ũmbasya ithitũ, kana ũla ũkũlasya akwʼũ. Nũndũ ũla wĩkaa maũndũ asu nũmũthatasya Yeova.”—Kũtũngĩlĩlwa kwa Mĩao 18:10-12.

Nĩkĩ Yeova ũkũtũkanyʼa mũno wĩana ũu tũikethĩwe na imanyĩo isu?

Kwoondũ wa wĩkalo-mũseo witũ ene, Yeova nũtũkanasya tũikethĩwe na mĩthemba yonthe ya kũneenanyʼa na maveva. We nĩwendete andũ na nũmasũvĩaa, na nĩwĩsĩ kana ala mekwatanasya na ndaimoni mailea kwona naĩ.

Mũndũ ũmwe wa mũthemba ũsu aĩ Nilita, nake aĩ mũndũ wa kũneenanyʼa na maveva nthĩ ya Mbulasili. Ndaimoni syalikilye ĩvou yingĩ mũno thayũnĩ wake. Mũndũ mũka ũsu enengane ũvoo atĩĩ: “Maveva . . . nĩmoosie ũtũo nthĩnĩ wakwa, makĩmbĩaĩaa. Mavinda amwe nĩnamanyaa va nĩĩ na mavinda angĩ ngalea kũmanya nĩ va, na nĩnakwatiwe nĩ mathĩna ma kĩlĩkonĩ. Ndaimoni isu syanyamaisye mũno kũvika mĩkiva yakwa ya ũmanyi yaeka kũtethya wĩa nesa. Nĩnamelilye ndawa sya kũmina kĩũũyũ na nambĩĩa kũnywʼa ũkĩ na sikala ĩvinda yonthe. Ũndũ ũsu waendeeie kwa myaka mingĩ.”

Ĩtina wa ĩvinda ĩna, kwa ũtethyo wa Yeova na Ngũsĩ syake vaa ĩũlũ wa nthĩ, Nilita nĩwakwatie ũthasyo aumana na ngusanyʼo ya ndaimoni na yuyu ekalaa e na thayũ mwaĩlu, wĩ mounĩko. We easya atĩĩ: “Nĩũmĩĩsya andũ onthe maikaaĩkwatanyʼe nongi, o na vanini, vamwe na maveva [mathũku].”