Ũvoo Mũseo Ũla Mendaa We Wĩwʼe
YĨLA Yesũ waĩ ĩũlũ wa nthĩ, amanyĩwʼa make nĩmaendie vala ũĩ na mamũkũlya: “Wonanʼyo nĩ wĩva wa kũka kwaku, na wa wĩanĩu wa ĩvinda yĩĩ?” Nĩwamasũngĩe kũkeethĩwa makaũ, mayũa, mĩimũ, itetemo sya nthĩ, wongeleku wa ũtũli wa mĩao, amanyĩsya aingĩ ma ndĩnĩ ya ũvũngũ makyasya aĩngĩ, kũmenwa na kũthĩnwʼa kwa aatĩĩi make mawʼo, na kũvoa kwa wendo wa ũlũngalu andũnĩ aingĩ. Maũndũ aa mambĩlĩlya kwĩkĩka, ũkeethĩwa e wananyʼo wa kũsyoka kũtenekee kwa Klisto na kana Ũsumbĩ wa ĩtunĩ nũthengee. Ũsu waĩ wĩthĩwe ũvoo—ĩĩ ũvoo mũseo! Kwoou Yesũ ongeleela ndeto ii ta kĩlungu kya ũla wonanyʼo: “Na ũvoo ũũ mũseo wa ũsumbĩ ũkatavanwʼa nthĩ yonthe wĩthĩwe ũkũsĩ kwa mbaĩ syonthe; na ĩndĩ mũminũkĩlyo ũkyũka.”—Mathayo 24:3-14.
O na kau maũndũ ala mela kwĩkĩka mĩtũkĩ nĩ mathũku, meonanyʼa ũndũ mũseo, nawʼo nĩ wʼo kũsyoka kwa Klisto. Maũndũ asu mawetwa vau ĩũlũ mambĩĩe kwoneka mwaka ũla ũwetawa mũno wa 1914! Weekĩie ũvano mũmĩnũkĩlyo wa Mavinda ma Andũ-ma-mbaĩ-ingĩ na mwambĩlĩlyo wa ĩvinda ya ũalyũku wa kuma ũsumbĩki wa andũ kũlika Ũsumbĩnĩ wa Myaka Ngili wa Klisto.
Kwaĩ kwĩthĩwe ĩvinda ya ũalyũko tondũ kwonanĩtwʼe nĩ Savulĩ 110, mũsoa wa 1 na 2, na Ũvuanʼyo 12:7-12. Vau nĩvonanĩtye kana Klisto aĩ ekala kwʼoko kwa aũme kwa Ngai ĩtunĩ kũvika ĩvinda ya kũtwʼĩka Mũsumbĩ. Na ĩndĩ kaũ wa ĩtunĩ waĩ ũtume Satanĩ ekwʼa nthĩ, na kũete mawoo ĩũlũ wa nthĩ na Klisto kũsumbĩka katĩ wa amaitha make. Mũminũkĩlyo wa ũthũku waĩ wũke kwĩsĩla “thĩna mũnene,” ũla ũkavĩkĩa mũthya wa wʼo kaũnĩ wa Ali-maketoni na vayĩatĩĩa Ũsumbĩ wa Klisto wa Myaka Ngili wa mũuo.—Mathayo 24:21, 33, 34; Ũvuanʼyo 16:14-16.
Mbivilia yaasya: “Indĩ manya ũũ, kana mĩthenyanĩ ya mũminũkĩlyo kũkeethĩwa mavinda ma mũisyo. Nũndũ andũ makeethĩwa makĩyenda ene, makyenda mbesa, makĩkathĩĩa, na kwĩtaĩa, na kũumana, matewʼaa asyai, mate mũvea, mate atheu, mate na wendo waĩle, mate na wĩwʼano, ailĩanĩli, mate na wĩtingʼo, ai, matendete ũseo, akaĩi, me na ngũlũ, me na mĩyimbyo, endi ma motanu ma nthĩ mbee wa kũmwenda Ngai; me na mũvwʼano wa kĩkĩo kwa Ngai; ĩndĩ nĩ makaĩĩte vinya wakyo: ĩvathane na asu nao.”—2 Timotheo 3:1-5.
Andũ amwe nĩ matonya kũkananĩsya makyasya kana maũndũ aa methĩĩtwe o kwʼo kuma tene nthĩnĩ wa isitoli ya andũ, ĩndĩ ũwʼo nĩ kana mayaaĩthĩwa kwa kĩthimo kĩla methĩĩtwe mayĩkĩka. O tondũ aandĩki na aelesya ma isitoli maasya kũyaaĩthĩwa ĩvinda yĩngĩ o na yĩva ĩũlũ wa nthĩ yĩilyĩ ta yĩla twonete kuma mwaka wa 1914 na kũendeea. (Sisya ĩthangũ 7.) Mawoo ala methĩĩtwe nĩ maito kwĩ angĩ o na meva maaĩthĩwa vu mbeenĩ. Kwongeleela vau tũiweta maũndũ makonetyʼe mawonanyʼo ma mĩthenyanĩ ya mũminũkĩlyo ala mawetiwe nĩ Klisto, maũndũ aa nĩ maĩlĩte kũsũanĩwa: Kũtavanwʼa nthĩ yonthe kwa kũka kwa Klisto na Ũsumbĩ kwĩthĩĩtwe kũtaelekanwʼa na kũngĩ nthĩnĩ wa isitoli. Kũnyamawʼa kwondũ wa ũtavanyʼa kũitonya kũsianĩwʼa na kũngĩ o na kwĩva kwaaĩkwa kũla kwĩ Ngũsĩ sya Yeova. Maana maingĩ moo nĩ mooaĩwe kambinĩ sya monyamasyo kũya nthĩ ya Nzĩlĩmani. Ngĩnya ũmũnthĩ ũũ Ngũsĩ sya Yeova nĩ nziĩĩe kũtethya wĩa ũũ kũndũ kũmwe, na kũngĩ makakwatwa, makovwa, makathĩnwʼa, na kũawa. Ũu wʼonthe nĩ kĩlungu kya wonanyʼo ũla Yesũ wawetie.
O tondũ kwathanĩtwe nthĩnĩ wa Ũvuanʼyo 11:18, ‘mbaĩ nĩ syathilĩkile’ Ngũsĩ syĩ kĩthito sya Yeova, na ũu wonanasya kana “ũthilĩku” wake ũkeelekelwʼa mbaĩ isu syonthe. Yĩandĩko o yĩu yaasya kana Ngai akooka “kũmananga ala manangaa nthĩ.” Kũyaĩthĩwa o na ĩndĩĩ ĩvinda ona yĩva nthĩnĩ wa isitoli ya mũndũ yĩla ũtonyi wa nthĩ wa kũĩthya kyonthe kĩla kĩ thayũ waaĩthĩwa mũisyonĩ ta ũmũnthĩ. Na yu ĩndĩ maũndũ ko me kĩvathũkanyʼoo! Andũ aingĩ ma saenzi nĩ maminĩte kũkanyʼa makasya, ethĩwa andũ meendeea na kũthũkya nthĩ, ĩkeethĩwa ĩtekalĩka. Ĩndĩ nake Yeova “ũla wamyũmbie yĩthĩwe ya kũtũa andũ,” akamananga ala mathũkasya nthĩ mbee wa matanamba kũmyananga vyũ.—Isaia 45:18.
MAŨATHIMO ĨŨLŨ WA NTHĨ ŨSUMBĨNĨ ŨSU
Yĩsilya ya andũ kwĩkala thayũ ĩũlũ wa nthĩ me laia ma ũsumbĩ wa Ngai nĩ yĩtonya kwĩthĩwa yĩ yĩeni kwa aĩkĩĩi aingĩ ma Mbivilia, ala mesilasya kana andũ ala atangĩĩe ta me ĩtunĩ. Mbivilia yonanasya kana no andũ anini ala makathi ĩtunĩ na kana ĩkomano ĩnene ya andũ matatalĩka makekala thayũ kũũ nthĩ tene na tene. (Savuli 37:11, 29; Ũvuanʼyo 7:9; 14:1-5) Wathani wa Mbivilia ĩvukunĩ ya Ndanieli wonanasya kana Ũsumbĩ wa Ngai ungu wa Klisto ũkeethĩwa ũsumbĩkĩte nthĩ yonthe.
Ũsũmbĩ wa Klisto vau ũvwʼananĩtwʼe na ĩvia yĩtilĩtwe kuma ũsumbĩnĩ mũnene wa Yeova ũilyĩ ta kĩĩma. Yĩkimaa na kũvevenza mũvwʼanano ũla nĩ ngelekanyʼo ya maũsumbĩ ma mbaĩ ila syĩ vinya sya nthĩ na ‘ĩvia yĩla yakũnie mũvwʼanano yatwʼĩka kĩĩma kĩnene, yausũa nthĩ yonthe.’ Wathani ũsu ũendee na kwasya: “Na mĩthenya ya asumbĩ asu Ngai wa ĩtunĩ akaũngamya ũsumbĩ ũtakaanangĩka tene na tene, o na ũsumbĩki wawʼo ndũkaatiĩwa ũko ũngĩ wa andũ; ĩndĩ ũkatilanga ilungu na kũmina mosumbĩ asu onthe, nawʼo ũkekalaa tene na tene.”—Ndanieli 2:34, 35, 44.
Nĩ ũsumbĩ ũũ vamwe na wĩkwatyo wa thayũ ũtathela ĩũlũ wa nthĩ nthambye na mbanakavye wĩna mũsingi wa maandĩko nĩwʼo Ngũsĩ sya Yeova syendaa ũkũtavya ĩũlũ wa wʼo. Milioni nyingĩ sya andũ ila syĩ thayũ yu, na ingĩ nyingĩ sya ala me mbũanĩ makeethĩwa na kĩanda kya kwĩkala thayũ nthĩnĩ wayo tene na tene. Nĩvo ĩndĩ ungu wa Ũsumbĩki wa Myaka Ngili wa Yesũ Klisto, kĩeleelo kya Yeova kya mbee vyũ kya kũmba nthĩ na kwia andũ elĩ ma mbee ĩũlũ wayo kĩkeanĩwʼa. Valatiso ĩno ya nthĩ ndĩkethĩwa yĩna mũnoanyʼo nongi. O tondũ Atamu waaĩwe wĩa mũũndanĩ wa Eteni, nowʼo andũ makethĩwa na mawĩa maingĩ mekwenda ũĩ na kĩthito nĩ kana masũvĩe nthĩ na mathayũ ma nyamũ na mĩtĩ ĩũlũ wayo. “Makatanĩaa wĩa wa moko moo ĩvinda ĩasa.”—Isaia 65:22; Mwambĩlĩlyo 2:15.
Maandĩko maingĩ nĩmatonya kũwetwa ala mekwonanyʼa mĩkalĩle ũndũ ĩkethĩwa ĩilyĩ ĩvinda yĩla mboya ĩla Yesũ watũmanyĩisye ĩkasũngĩwa: “Ũsumbĩ waku wũke. Kwenda kwaku kwĩke kũũ nthĩ o ta kũya ĩtunĩ.” (Mathayo 6:10) Eka ĩndĩ, yĩĩ yĩmwe yĩane yu: “Na neewʼa wasya mũnene kuma kĩvĩlanĩ kya ũsumbĩ, ũiasya, Sisya, ĩeema ya Ngai yĩ vamwe na andũ, nake akatũa vamwe nao, namo makeethĩwa andũ make, na Ngai mwene akeethĩwa vamwe nao, Ngai woo: na akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu. Na ũla wĩkalĩte kĩvĩlanĩ kya ũsumbĩ asya, Sisya, nĩngũtwʼa maũndũ onthe meũ. Na asya, Andĩka: nĩkwĩthĩwa ndeto ii nĩ sya kĩthito na nĩ sya wʼo.”—Ũvuanʼyo 21:3-5.
[Visa ĩthangũnĩ ya 15]
“Mavinda ma mũisyo,”
NA ĨNDĨ “mũminũkĩlyo ũkyũka”
[Visa ĩthangũnĩ ya 18]
Nethalandi
[Visa ĩthangũnĩ ya 18]
Naingyelia