ĨSOMO YA 4
Yesũ Klĩsto Nũũ?
1. Yesũ aumie va?
Nĩ ndaĩa syĩva sya Yesũ ila syatumaa endwa nĩ andũ?—MATHAYO 11:29; MALIKO 10:13-16.
Kĩvathũkanyʼo na andũ onthe, Yesũ atwĩe ĩtunĩ e kyũmbe kya veva mbee wa kũsyawa kũũ nthĩ. (Yoana 8:23) Nĩwe woombiwe mbee nĩ Ngai, na nĩwatetheeisye kũmba syĩndũ ila ingĩ syonthe. No we e weka woombiwe nĩ Yeova ĩmwe kwa ĩmwe na kĩu nĩkyo kĩtumi wĩtĩtwe Mwana wa Ngai “ũla wasyaiwe weka.” (Yoana 1:14) Ĩngĩ, Yesũ aĩ Mũneeni wa Ngai, kwoou etawa “ĩla Ndeto.”—Soma Nthimo 8:22, 23, 30; Akolosai 1:15, 16.
2. Nĩkĩ Yesũ wookie kũũ nthĩ?
Ngai amũtũmie Mwana wake kũũ nthĩ kwa kũthamya thayũ wake kuma ĩtunĩ na kũũlikya ĩvunĩ ya mwĩĩtu Mũyuti weetawa Meli ũteesĩ mũndũũme. Kwoou, Yesũ ndaĩ na ĩthe wa kĩmũndũ. (Luka 1:30-35) Yesũ ookie kũũ nthĩ nĩ kana (1) amanyĩsye ũwʼo ĩũlũ wa Ngai, (2) atũtĩie ngelekanyʼo ya ũndũ tũtonya kwĩka kwenda kwa Ngai o na ĩla twĩ mathĩnanĩ, na (3) anengane thayũ wake mwĩanĩu wĩthĩwe “wovosyo.”—Soma Mathayo 20:28.
3. Nĩkĩ twĩ na vata wa wovosyo?
Wovosyo nĩ ndĩvi ĩla yumawʼa nĩ kana mũndũ athawʼe ndakoawe. (Kuma 21:29, 30) Kuma mwambĩlĩlyonĩ kĩyaĩ kĩeleelo kya Ngai mũndũ akũe na aikwʼa. Twĩsĩ ũu ata? Ngai eeie mũndũ wa mbee, Atamu, ĩla wĩĩka kĩla Mbivilia ĩkĩtaa “naĩ,” akakwʼa. Kwoou, kethwa Atamu ndaaĩka naĩ, ndethwa aakwʼa. (Mwambĩlĩlyo 2:16, 17; 5:5) Kwosana na Mbivilia, kĩkwʼũ ‘kyalikile’ kũũ nthĩ kwĩsĩla Atamu. Kwoou, Atamu atiĩa nzyawa syake syonthe naĩ na ĩtuvi ya naĩ, yĩla nĩ kĩkwʼũ. Twĩ na vata wa wovosyo nĩ kana ũtũvetee ĩtuvi yĩu twatiĩwe nĩ Atamu.—Soma Alomi 5:12; 6:23.
Nũũ ũla waĩ atonya kũtũĩvĩa wovosyo wa kũtũthasya kuma kĩkwʼũnĩ? Ĩla twakwʼa, twĩthĩawa twaĩvĩa mavĩtyo maitũ ene. Vaiĩ mũndũ ũte mwĩanĩu ũtonya kũĩvĩa mavĩtyo ma mũndũ ũngĩ.—Soma Savuli 49:7-9.
4. Yesũ akwie nĩkĩ?
Kĩvathũkanyʼo naitũ, Yesũ aĩ mwĩanĩu. Kwoou ndaĩ atonya kũkwʼa kwondũ wa naĩ syake nũndũ ndaavĩtya. Ĩndĩ, Yesũ akwie nũndũ wa naĩ sya angĩ. Ngai oonisye andũ wendo mwingĩ vyũ kwa kũmũtũma Mwana wake akwʼe kwondũ witũ. Ĩngĩ, Yesũ oonanisye nũtwendete kwa kwĩwʼa Ĩthe wake na kũkwʼa kwondũ wa naĩ sitũ.—Soma Yoana 3:16; Alomi 5:18, 19.
Ĩloele vitio yĩ na kyongo, Yesũ Akwie Nĩkĩ?
5. Ũmũnthĩ Yesũ aendee kwĩka ata?
Ĩla waĩ kũũ nthĩ, Yesũ nĩwavoisye awau, athayũũkya akwʼũ, na athũmũsya andũ kuma thĩnanĩ. Kwa nzĩa ĩsu nĩwoonanisye maũndũ ala ũkeka kwondũ wa onthe ala ewi ĩvinda yũkĩte. (Mathayo 15:30, 31; Yoana 5:28) Ĩla Yesũ wakwie, Ngai nĩwamũthayũũkisye na amũnenga mwĩĩ wa veva. (1 Vetelo 3:18) Na ĩndĩ Yesũ ekala kwʼokonĩ kwa aũme kwa Ngai eteele nginya Yeova amũnenge ũkũmũ wa kũsumbĩka nthĩ yonthe. (Aevelania 10:12, 13) Ũmũnthĩ Yesũ nũsumbĩkĩte ĩtunĩ e Mũsumbĩ, na aatĩĩi make maendee kũmanyĩthya ũvoo ũsu mũseo ĩũlũ wa nthĩ yonthe.—Soma Ndanieli 7:13, 14; Mathayo 24:14.
O mĩtũkĩ, Yesũ akatũmĩa ũkũmũ wake e Mũsumbĩ kũveta mathĩna onthe vamwe na ala mamaetae. Onthe ala mamũĩkĩĩa kwa kũmwĩwʼa makatanĩa thayũ valatisonĩ kũũ nthĩ.—Soma Savuli 37:9-11.