Nĩ Kyaũ Kĩtonya Kũtuma Mũsyĩ Waku Wĩthĩwa na Ũtanu?

1. Nĩkĩ mũtwaano wosanĩte na mĩao nĩ wa vata nĩ kana mũsyĩ wĩthĩwe na ũtanu?

Ũvoo mũseo umĩte kwa Yeova, “Ngai mũtanu,” ũla wendaa mĩsyĩ yĩthĩwe yĩ mĩtanu. (1 Timotheo 1:11, New World Translation) Nĩwe wambĩlĩlye mũtwaano. Mũtwaano wosanĩte na mĩao ũtumaa asyai na syana methĩwa me na ũtanu na mewʼa me ende. Aklĩsto nĩmaĩlĩte kũatĩĩa mĩao ya silikalĩ ĩũlũ wa kũandĩkĩthya mũtwaano.​—Soma Luka 2:1, 4, 5.

Woni wa Ngai nĩ mwaũ ĩũlũ wa mũtwaano? Endaa wĩthĩwe wĩ ngwatanĩo ya ĩvinda yonthe katĩ wa mũndũũme na mũndũ mũka. Yeova endaa mũũme na mũka methĩwe maĩkĩĩanĩte. (Aevelania 13:4) Nũmenete kũthasya mũtwaano, kana mũleano. (Malaki 2:16) Ĩndĩ nĩwĩtĩkĩlĩtye Aklĩsto kũthasya mũtwaano na kũtwaana kana kũtwawa ĩngĩ ethĩwa ũmwe wa ala matwaanĩte nĩweeka ũlaalai.​—Soma Mathayo 19:3-6, 9.

2. Mũũme na mũka maĩlĩte kwĩkalanyʼa ata?

Yeova oombie mũndũũme na mũndũ mũka matetheanĩasye mũtwaanonĩ. (Mwambĩlĩlyo 2:18) Nũndũ mũũme nĩwe mũtwe wa mũsyĩ, nĩwe wĩ na kĩanda kĩnene kya kwĩanĩĩsya mavata ma kĩmwĩĩ ma mũsyĩ wake na kũũmanyĩsya ĩũlũ wa Ngai. Aĩlĩte kwĩyumya amwende mũka wake. Mũũme na mũka maĩlĩte kwendana na kũnengane ndaĩa. Nũndũ aũme na iveti ti eanĩu, kwĩmanyĩsya kũekea nĩ kwa vata mũno nũndũ kũmatetheeasya kwĩthĩwa na ũtanu mũtwaanonĩ woo.​—Soma Aeveso 4:31, 32; 5:22-25, 33; 1 Vetelo 3:7.

3. Ethĩwa mũtwaano waku ndwĩ na ũtanu, nĩwaĩle kũtia mũũme kana mũka waku?

Ethĩwa mũtwaano wenyu wĩ na mathĩna, nĩmwaĩle kwosa ĩtambya mwonanyʼe wendo. (1 Akolintho 13:4, 5) Ndeto ya Ngai ndĩkĩaa vinya ala matwaanĩte mataanĩsye ta nzĩa ya kũmina mathĩna ala kaingĩ methĩawa mũtwaanonĩ.​—Soma 1 Akolintho 7:10-13.

4. Syana, Ngai endaa mwĩthĩwe na kyaũ?

Yeova endaa mwĩthĩwe na ũtanu. Amũnengae ũtao ũla mũseo vyũ wa ũndũ mũtonya kũtanĩa wana wenyu. Endaa mũunĩke kumana na ũĩ na ũmanyi wa asyai menyu. (Akolosai 3:20) Ĩngĩ, Yeova nĩwendaa mũtanĩe kũmũthũkũma Mũmbi wenyu na Mwana wake.​—Soma Mũtavanʼya 11:9–12:1; Mathayo 19:13-15; 21:15, 16.

5. Asyai, nĩ kyaũ kĩtonya kũtuma syana syenyu syĩthĩwa na ũtanu?

Nĩmwaĩle kũthũkũma na kĩthito mũmanthĩe syana syenyu lĩu, ngũa, na vandũ va kwĩkala. (1 Timotheo 5:8) Ĩndĩ nĩ kana syana syenyu syĩthĩwe na ũtanu, nĩmwaĩle kũimanyĩsya kũmwenda Ngai na kwĩmanyĩsya kuma kwake. (Aeveso 6:4) Ngelekanyʼo yenyu ya kũmwenda Ngai kuma ngoonĩ nĩtonya kwĩthĩwa na ngusanyʼo nzeo mũno ngoonĩ ya kana kaku. Wamanyĩsya kana kwosana na Ndeto ya Ngai, ũmanyĩsyo waku nũtonya kũalyũla mesilya mako kwa nzĩa nzeo.​—Soma Kũtũngĩlĩlwa Kwa Mĩao 6:4-7; Nthimo 22:6.

Syana nitethekaa ĩla mwasyĩkĩa vinya na mwaitavya ĩla syeeka nesa. Ĩngĩ nĩsyendaa kũtawa na kũkanwʼa. Kwĩka ũu nĩkũisũvĩaa iikethĩwe na mwĩkalo ũtonya kũtuma syĩthĩwa ite na ũtanu. (Nthimo 22:15) Ĩndĩ, ũkanyʼo ndwaĩle kumwʼa kwa ũthilĩku.​—Soma Akolosai 3:21.

Ngũsĩ sya Yeova nĩsyumĩthasya mavuku maingĩ ala maandĩkĩtwe matetheesye mũno mũno asyai na syana. Maũndũ ala me mavukunĩ asu maumanĩte na Mbivilia.​—Soma Savuli 19:7, 11.