MOSŨNGĨO MA MAKŨLYO MA MBIVILIA

Nĩ kyaũ kĩtonya kũtuma andũ matwaanĩte mekala na ũtanu?

Ũtao wa Mbivilia ĩũlũ wa kwĩthĩwa na mũtwaano wĩ na ũtanu nĩwaĩle nũndũ umĩte kũla kwĩ Mwambĩlĩlya wa mũtwaano, Yeova Ngai. Ũtao ũsu ũtetheeasya mũndũ ethĩwe na mwĩkalĩle ũtonya kũtuma mũtwaano wake wĩthĩwa na ũtanu, na ũkamũtetheesya ndakethĩwe na mwĩkalo ũtonya kwananga mũtwaano. O na ĩngĩ, nũtũmanyĩasya ũndũ tũtonya kũea ngewa nesa na ũndũ ũsu nũtumaa mũtwaano wĩthĩwa na ũtanu.—Soma Akolosai 3:8-10, 12-14.

Aũme na iveti syoo nĩmaĩlĩte kũnengane ndaĩa. Nĩmatonya kwĩthĩwa na ũtanu ethĩwa kĩla ũmwe akeanĩsya kĩanda kyake kĩla ũnengetwe nĩ Ngai mũtwaanonĩ.—Soma Akolosai 3:18, 19.

Nĩ kyaũ kĩtumaa mũtwaano wĩkala wĩ mũlũmu?

Andũ ala matwaanĩte nĩmatonya kwĩkalanyʼa nesa ethĩwa nĩmendene. Ngai nũtũmanyĩĩtye nzĩa sya kwonanyʼa wendo. Ngai na Mwana wake, Yesũ, nĩmatwonetye ngelekanyʼo nzeo ya kwenda angĩ twĩyumĩtye.—Soma 1 Yoana 4:7, 8, 19.

Yĩla ala matwaanĩte meethĩwa na woni wa kana mũtwaano umanĩte na Ngai, nĩmekalanasya nesa. Kĩeleelo kya Ngai ayambĩlĩlya mũtwaano kyaĩ ala matwaanĩte mekalanyʼe vamwe mateũtaanĩsya nĩ kana mĩsyĩ yĩkale yĩ mĩsũvĩĩku. Mũtwaano no wĩkale wĩ mũlũmu nũndũ Ngai oombie mũndũũme na mũndũ mũka kwa nzĩa matonya kwaĩlana ũkethĩa no meanĩsye mavata moo ma mwĩĩ na ma ngoonĩ. O na ĩngĩ amombie na mũvwʼano wake, me na ũtonyi wa kwĩthĩwa na wendo take.—Soma Mwambĩlĩlyo 1:27; 2:18, 24.