Ũtonya Kũmanya Ũthaithi wa Wʼo Ata?

1. Kwĩ ndĩni o ĩmwe ya wʼo?

Yesũ amanyĩisye aatĩĩi make ĩũlũ wa ndĩni o ĩmwe ya wʼo. Nĩ ta nzĩa ĩelete thayũnĩ ũtathela. Yesũ aisye: “Nĩ avũthũ ala mamyonaa.” (Mathayo 7:14) Ngai etĩkĩlaa ũthaithi o ũla wosanĩte na Ndeto yake ya wʼo. Athaithi onthe ma wʼo makwatanĩtwʼe nĩ mũĩkĩĩo o ũmwe.​—Soma Yoana 4:23, 24; 14:6; Aeveso 4:4, 5.

Ĩloele vitio yĩ na kyongo, We Ngai Nĩwĩtĩkĩlaa Mĩthemba Yonthe ya Ũthaithi?

2. Yesũ aisye ata ĩũlũ wa Aklĩsto ma ũvũngũ?

Yesũ awetie kana athani ma ũvũngũ makavukya Ũklĩsto. Kwa kũsiwʼa tũ, monekaa ta athaithi ma wʼo. Ndĩni syoo syaasya nĩ sya Kĩklĩsto. Ĩndĩ nũtonya kũmanya kana mo ti Aklĩsto ma wʼo. Ata? No ũthaithi wa wʼo wĩthĩawa na Aklĩsto ma wʼo ala methĩawa na meko na nguma nzeo.​—Soma Mathayo 7:13-23.

3. Ũtonya kũmanya athaithi ma wʼo ata?

Sũanĩĩa movano aa atano:

• Athaithi ma wʼo nĩmamĩnengete Mbivilia ndaĩa ta Ndeto ya Ngai. Nĩmatataa kwĩkala kwosana na myolooto yayo. Kwoou, ndĩni ya wʼo yĩ kĩvathũkanyʼo na ndĩni ila imanyĩasya momanyĩsyo ma andũ. (Mathayo 15:7-9) Athaithi ma wʼo mekalaa kwosana na momanyĩsyo moo.​—Soma Yoana 17:17; 2 Timotheo 3:16, 17.

• 

  Aatĩĩi ma wʼo ma Yesũ nĩmayĩnengete ndaĩa syĩtwa ya Ngai, Yeova. Yesũ nĩwayĩnengie syĩtwa ya Ngai ndaĩa kwa kũyĩmanyĩthya. Nĩwatetheeisye andũ kũmũmanya Ngai na amamanyĩsya kũvoya syĩtwa ya Ngai yĩtaĩwe. (Mathayo 6:9) Ndũanĩ kwenyu, nĩ ndĩni yĩva ĩmanyĩthasya syĩtwa ya Ngai?​—Soma Yoana 17:26; Alomi 10:13, 14.

• Aklĩsto ma wʼo nĩmatavanasya ĩũlũ wa Ũsumbĩ wa Ngai. Yesũ nĩwatũmiwe nĩ Ngai atavanyʼe ũvoo mũseo wa Ũsumbĩ. Ũsumbĩ wa Ngai nowʼo wĩkwatyo wʼoka wa andũ. Yesũ nĩwaendeeie kũũtavanyʼa kũvika mũthenya wake wa kũkwʼa. (Luka 4:43; 8:1; 23:42, 43) Nĩwawetie kana aatĩĩi make makatavanyʼa ĩũlũ wa Ũsumbĩ ũsu. Mũndũ akoka kũũtavya ĩũlũ wa Ũsumbĩ wa Ngai, we wona ta wa ndĩni yĩva?​—Soma Mathayo 24:14.

• Aatĩĩi ma Yesũ ti ma nthĩ ĩĩ nthũku. Nũtonya kũmamanya nũndũ mayĩlikasya siasanĩ kana ithokoonĩ sya mbaĩ. (Yoana 17:16; 18:36) O na maiatĩĩaa meko na mawoni mathũku ma nthĩ.​—Soma Yakovo 4:4.

• Aklĩsto ma wʼo nĩmendanĩte mũno. Nĩmemanyĩĩtye kuma Ndetonĩ ya Ngai kũmanenga ndaĩa andũ ma mbaĩ syonthe. O na kau mavinda maingĩ ndĩni sya ũvũngũ nĩsyĩlikasya mũno makaũnĩ ma mbaĩ, athaithi ma wʼo mayĩkaa ũu. (Mika 4:1-3) Vandũ va ũu, Aklĩsto ma wʼo matũmĩaa ĩvinda yoo na malĩ syoo kũtetheesya na kwĩkĩa angĩ vinya.​—Soma Yoana 13:34, 35; 1 Yoana 4:20.

4. Nũtonya kũmanya ndĩni ĩla ya wʼo?

Nĩ ndĩni yĩva ĩla momanyĩsyo mayo onthe maumaa Mbivilianĩ, ĩnengae syĩtwa ya Ngai ndaĩa, na ĩtavanasya Ũsumbĩ wa Ngai kana nowʼo wĩkwatyo wʼoka wa andũ? Nĩ ndĩni yĩva yonanasya wendo na ĩtelikasya kaũnĩ? We wĩona ata?​—Soma 1 Yoana 3:10-12.