Mosũngĩo ma makũlyo ma mbivilia
Syo ndĩni syonthe syumanĩte na Ngai?
Ethĩwa nĩwĩthukĩĩasya matangaso ma maũndũ ala mekĩkie, no kwĩthĩwa ũmanyĩte kana mavinda amwe andũ nĩmatũmĩaa ndĩni kwĩka maũndũ mathũku. Ti ndĩni syonthe syumanĩte na Ngai ũla wa w’o. (Mathayo 7:15) Ũw’o nĩ kana andũ aingĩ mũno nĩmakengetwe.—Soma 1 Yoana 5:19.
O na vailyĩ ũu, Ngai nĩwonaa andũ ala me ngoo nzeo na mendete ũseo na ũla w’o. (Yoana 4:23) Ngai nũthokasya andũ ta asu memanyĩsye ũw’o kuma Ndetonĩ yake, Mbivilia.—Soma 1 Timotheo 2:3-5.
Ũtonya kũmanya ata ndĩni ĩla ya w’o?
Yeova Ngai nũendeee kũtetheesya andũ ala tene maĩ ma ndĩni syĩ kĩvathũkany’o methĩwe na ngwatanĩo. Ekaa ũu kwa kũmamanyĩsya ũw’o na kũmamanyĩsya mendane. (Mika 4:2, 3) Kwoou, no ũmanye andũ ma ndĩni ĩla ya w’o kwĩsĩla ũndũ matethanasya ene kwa ene.—Soma Yoana 13:35.
Yeova Ngai aendeee kũmbany’a andũ ma mĩthemba yonthe kwĩsĩla ũthaithi wa w’o.—Savuli 133:1
Mũĩkĩĩo na mwĩkalĩle wa athaithi ma w’o wĩthĩawa wosanĩte na Mbivilia. (2 Timotheo 3:16) O na ĩngĩ, nĩmanengete ĩsyĩtwa ya Ngai ndaĩa. (Savuli 83:18) O na nĩmatavasya andũ kana maĩle kwĩkwatya Ũsumbĩ wa Ngai wĩ w’oka. (Ndanieli 2:44) Maatĩĩaa ngelekany’o ya Yesũ kwa kũeka ‘kyeni kyoo kĩkene.’ Mekaa ũu kwa kwĩka atũi moo maũndũ maseo. (Mathayo 5:16) Kwoou, Aklĩsto ma w’o nĩmatonya kũmanyĩka nũndũ nĩmathokeaa andũ mĩsyĩ kwoo nĩ kana mamatavye ĩũlũ wa ũvoo mũseo wa Ũsumbĩ wa Ngai.—Soma Mathayo 24:14; Meko ma Atũmwa 5:42; 20:20.