Mo Mathĩna Makathela?

MBIVILIA YAĨTYE ATA

“Ngai akamavangũla methoi onthe methonĩ moo. Kũikethĩwa kĩkwʼũ ĩngĩ, kyeva, kĩmako, kana woo.”—Ũvuanyʼo 21:3, 4, The Holy Bible in Current Kikamba Language.

ŨNDŨ KŨMANYA ŨU KŨTONYA ŨKŨTETHYA

Kwĩkũĩkĩĩthya kana Ngai ti we ũetae mathĩna ala matũkwataa.—Yakovo 1:13.

Kwĩũnenga ũkiakisyo wa kũmanya kana Ngai nĩwĩthĩawa esĩ nesa ũndũ tũkwĩwʼa ĩla tũũthĩna.—Nzekalia 2:8.

Kwĩtuma wĩthĩwa na wĩkwatyo kana mathĩna onthe makathela.—Savuli 37:9-11.

NĨTŨTONYA KŨĨKĨĨA ŨNDŨ MBIVILIA YAĨTYE?

Ĩĩ, nũndũ wa itumi ta ilĩ:

• Ngai nũmenete mathĩna na ũsili ũte wa katĩ. Kwasũanĩa ũndũ Yeova weewʼaa oona andũ make ma ĩvinda ya tene maithĩnwʼa. Mbivilia yaĩtye kana ndaatanĩthwʼa nĩ ‘ala mamewʼĩthasya woo.’—Asili 2:18, The Bible in Kikamba, 1974.

  Ngai ndendeeawʼa o na vanini nĩ andũ ala maũmĩasya angĩ. Kwa ngelekanyʼo, Mbivilia yaĩtye kana “moko ala metĩkasya nthakame ĩte ĩvĩtyo” nĩ ũthatyo kwake.—Nthimo 6:16, 17.

• Ngai nũthĩnĩkĩaa kĩla ũmwe witũ. O ũndũ kĩla mũndũ wĩthĩawa esĩ “ũthĩnyʼo ũ wake na woo wake mwene” nowʼo o nake Yeova wĩthĩawa awĩsĩ!—2 Mavinda 6:29, 30.

  Yeova akatũmĩa Ũsumbĩ wake kũmina mathĩna ma kĩla ũmwe witũ. (Mathayo 6:9, 10) Ũmũnthĩ nũkiakiasya ala mamũmanthaa na ngoo yonthe.—Meko ma Atũmwa 17:27; 2 Akolintho 1:3, 4.