Mo Andũ Ala Makwie Nĩmatonya Kwĩthĩwa Thayũ Ĩngĩ?

MBIVILIA YAĨTYE ATA?

“Kũkeethĩwa ũthayũũkyo.”​—⁠Meko ma Atũmwa 24:​15, The Bible in Kikamba, 1974.

KŨĨKĨĨA KANA KWĨ ŨTHAYŨŨKYO KŨTONYA ŨKŨTETHYA ATA?

Nĩkũtonya ũkũkiakisya ethĩwa nĩwakwʼĩĩwa nĩ mũndũ ũmwendete. ​—⁠2 Akolintho 1:​3, 4.

Nĩkũtumaa uma ũkombonĩ wa kũkĩa kĩkwʼũ.​—Aevelania 2:​15.

Nĩkũũnengae wĩkwatyo wa kũmona ĩngĩ endwa maku ala makwie.​—Yoana 5:​28, 29.

NĨTŨTONYA KŨĨKĨĨA ŨNDŨ MBIVILIA YAĨTYE?

Ĩĩ, nũndũ wa itumi ta itatũ:

• Ngai nĩwe Mũmbi. Mbivilia yaĩtye Yeova Ngai nĩwe wĩ na “mbuluti ya thayũ.” (Savuli 36:9; Meko ma Atũmwa 17:​24, 25) Vate nzika Ngai e na ũtonyi wa kũthayũũkya akwʼũ, nũndũ nĩwe woombie syĩndũ syonthe.

• Ngai nĩwathayũũkisye andũ ĩvinda ya tene. Mbivilia nĩwetete andũ nyaanya mathayũũkiwʼe vaa nthĩ. Katĩ wa andũ asu vaĩ amwe ma mũika na angĩ akũũ. O na vaĩ aũme na aka. Amwe mathayũũkiwʼe o kavinda kanini ĩtina wa kũkwʼa, ĩndĩ ũmwe ekalĩte mbũanĩ matukũ ana!​—⁠Yoana 11: 39-​44.

• Ngai e na mea ma kwĩka ũu ĩngĩ. Yeova nũmenete kĩkwʼũ na akyonaa ta mũmaitha. (1 Akolintho 15:26) E na mea ma kũveta mũmaitha ũsu, na akeeka ũu kwĩsĩla ũthayũũkyo. E na wendi wa kũmathayũũkya ala me kĩlilikanonĩ kyake na aimatonyethya kwĩkala ĩngĩ ĩũlũ wa nthĩ.​—⁠Yovu 14:​14, 15.