Ndaviti Ndaĩ na Wia

Wĩkaa ata ĩla wakwatwa nĩ wia?— Nĩvatonyeka ũkethĩwa ũendaa vala ve inyia waku kana ĩthe waku maũtetheesye. Ĩndĩ, waamanya kana ve ũngĩ ũtonya kũũtetheesya? Ĩĩ, e vo na e vinya mwingĩ mũno. Vai mũndũ kana kĩndũ o na kĩmwe kĩ vinya take. Nĩwĩsĩ ũsu nũũ?— Nĩ Yeova Ngai. Eka tũneene ĩũlũ wa mwanake ũmwe mũnini ũwetetwe Mbivilianĩ weetawa Ndaviti. Nĩweesĩ kana Yeova ndalea kũmũtetheesya, kwoou we ndaaĩthĩwa na wia.

Ndaviti nĩwamanyĩiwʼe nĩ asyai make kũmwenda Yeova kuma e kana kanini. Ũu nĩwamũtetheeisye kwĩthĩwa ate na wia o na ĩla wakwatwa nĩ maũndũ ma kũtelemya. Nĩweesĩ kana Yeova nĩ Mũnyanyae na aĩ atonya kũmũtetheesya. Ĩvinda yĩmwe ĩla Ndaviti waĩthasya malondu, mũnyambũ mũnene nĩwakwatie ĩlondu yĩmwe! Nĩwĩsĩ ũndũ Ndaviti weekie? Asembanisye nawʼo na veonekana awũaie o na moko mathei! Na ĩla nyamũ nthũku yĩtawa nduva yakwatie ĩlondu, o nayo nĩwamyũaie! Wĩona nũũ wamũtetheeasya Ndaviti?— Nĩ Yeova.

Ve ĩvinda yĩngĩ Ndaviti woonanisye kana ndaĩ na wia o na vanini. Ĩvinda yĩu Aisilaeli mokitaa na andũ meetawa Avilisiti. Mũsikalĩ ũmwe katĩ wa asikalĩ ma Avilisiti aĩ ĩmũndũ ĩnene, yĩasa mũno vyũ! Ĩmũndũ yĩu yeetawa Ngoliathu na nĩyathekeeaa Yeova na asikalĩ ma Isilaeli. Nĩyeeie asikalĩ ma Isilaeli manyuve ũmwe woo okite nayo. Ĩndĩ asikalĩ ma Isilaeli maĩ na wia mwingĩ mũno. Ĩla Ndaviti weewie ũndũ ũsu, amwĩie Ngoliathu atĩĩ: ‘Nĩngũkita naku! Yeova nũkũndetheesya ngũsinde!’ Wĩona Ndaviti ta waĩ na wia?— Ndaviti ndaĩ na wia o na vanini. Nũkwenda kũmanya ũndũ weekie?

Ndaviti oosie kĩkũtha kyake na mavia atano matendeu, na ĩndĩ athi kũkita na ĩmũndũ yĩu. Ĩla Ngoliathu woonie kana Ndaviti aĩ o kamwana, nĩwamũthekeeie. Ĩndĩ Ndaviti amwĩa: ‘We wĩũka kũkita nakwa wĩ na ĩtumo, ĩndĩ nũkĩte kũkita naku ĩsyĩtwanĩ ya Yeova!’ Ĩtina wa kwasya ũu, nĩweekĩie ĩvia kĩkũthanĩ kyake na asemba elekele vala Ngoliathu waĩ. Na ĩndĩ ekya ĩvia yĩu yamũkima Ngoliathu katĩkatĩ wa metho! Ĩmũndũ yĩu nĩyavalũkile nthĩ mbu na yakwʼa! Ĩla Avilisiti moonie ũu nĩmakwatiwe nĩ wia mwingĩ na masemba. Nũũ watetheeisye Ndaviti e o kamwana asinde ĩmũndũ ĩnene ta yĩu?— Yeova nĩwe wamũtetheeisye, nũndũ we e vinya mwingĩ mũno, na ĩmũndũ yĩu yĩyaĩ yĩtonya kũmũsinda!

Ũtonya kwĩmanyĩsya kyaũ kumana na ngewa ya Ndaviti?— Yeova e vinya mwingĩ vyũ. Vai mũndũ kana kĩndũ o na kĩmwe kĩ vinya take. Na nĩ Mũnyanyae waku. Kwoou ĩla wakwatwa nĩ wia, lilikana kana Yeova nũtonya ũkũtetheesya wĩthĩwe ũte na wia!