Yesũ Aĩ Mwĩwi Ĩvinda Yonthe

Nĩwĩthĩawa wĩ ũndũ wĩ laisi kũmewʼa asyai maku?— Mavinda amwe ũyĩthĩawa wĩ ũndũ wĩ laisi. Nĩwĩsĩ kana Yesũ nĩweewʼaa Yeova na asyai make?— Ngelekanyʼo yake nĩtonya ũkũtetheesya ũmewʼe asyai maku o na ethĩwa kwĩka ũu ti ũndũ wĩ laisi. Eka twĩmanyĩsye maũndũ angĩ ĩũlũ wa ũndũ tũtonya kwĩthĩwa twĩ ewi.

Mbee wa kũka kũũ nthĩ, Yesũ ekalaa ĩtunĩ e na Ĩthe wake Yeova. Ĩndĩ ĩla waĩ vaa ĩũlũ wa nthĩ Yesũ aĩ na asyai meetawa Yosevu na Meli. Nĩwĩsĩ ũndũ Yosevu na Meli matwʼĩkie asyai ma Yesũ?—

Yeova nĩwathamisye thayũ wa Yesũ kuma ĩtunĩ na awĩkĩa ĩvunĩ ya Meli nĩ kana asyawe vaa ĩũlũ wa nthĩ. Kĩu kyaĩ kyama! Yesũ ekalile ĩvunĩ ya Meli o ta syana ila ingĩ. Ĩtina wa myei vakuvĩ kenda, Yesũ nĩwasyaiwe. Ũu nĩwʼo Meli na mũũme wake Yosevu matwʼĩkie asyai ma Yesũ vaa ĩũlũ wa nthĩ.

Ĩla Yesũ waĩ na myaka 12, nĩweekie ũndũ ũmwe ũla woonanisye kana nĩwamwendete Ĩthe wake Yeova. Eekie ũndũ ũsu ĩla we na asyai make maendie Yelusaleme kwondũ wa sikũkũ ya Vasaka. Yelusaleme nĩ ndũa yaĩ kũasa mũno. Menũkĩte, Yosevu na Meli nĩmamũmanthie Yesũ aa. Nĩwĩsĩ aĩ va?—

Yosevu na Meli nĩmasyokie na mĩtũkĩ Yelusaleme na mamũmantha Yesũ kĩla vandũ, na mayaamwona. Ũndũ ũsu nĩwamatelemilye mũno. Ĩndĩ ĩtina wa mĩthenya ĩtatũ, mamwĩthĩa ĩkalũnĩ! Nĩwĩsĩ nĩkĩ Yesũ waĩ ĩkalũnĩ?— Nũndũ vu aĩ atonya kwĩmanyĩsya ĩũlũ wa Ĩthe wake, Yeova. Nĩwamwendete Yeova na endaa emanyĩsye ũndũ ũtonya kũmũtanĩthya. Ĩla Yesũ weanie atwʼĩka mũndũ mũima, nĩwamwĩwʼaa Yeova mavinda onthe. Nĩwamwĩwʼaa o na ethĩwa kwĩka ũu waĩ ũndũ wĩ vinya, kana ũtonya kũtuma athĩna. Yesũ nĩwamewʼaa asyai make, Yosevu na Meli?— Mbivilia yaĩtye nĩwamewʼaa.

Ũtonya kwĩmanyĩsya kyaũ kumana na Yesũ?— Nĩwaĩle kũmewʼa asyai maku o na ĩla ũte ũndũ wĩ laisi kwĩka ũu. Ũkamewʼaa asyai maku?—