Yesũ e wa Mũika

Yosevu na Meli mekalaa Nasaleti me na mwana woo Yesũ na ana-a-inyia na eĩtu-a-inyia ma Yesũ. Yosevu athũkũmaa wĩa wa mbwaũ nĩ kana asũvĩe andũ make, na nĩwamamanyĩasya ĩũlũ wa Yeova na Mĩao yake. Mũsyĩ ũsu nĩwaendaa ĩsinakokenĩ kĩla ĩvinda nĩ kana ũkathaithe na nĩwaendaa Yelusaleme kĩla mwaka kwondũ wa Vasaka.

Ĩvinda yĩmwe Yesũ e na myaka 12, mũsyĩ woo nĩwaendie kyalo kĩasa nginya Yelusaleme o tondũ meekaa. Ndũa ĩsu yausũĩte andũ ala mookĩte kũtanĩa Vasaka. Ĩtina wa Vasaka, Yosevu na Meli nĩmambĩĩie kyalo kya kũsyoka mũsyĩ kwoo, na moonaa Yesũ ta waĩ na andũ ala menũkanĩtye namo. Ĩndĩ yĩla mamũmanthĩe katĩ wa andũ ma mũsyĩ mayaamwona.

Kwoou masyoka Yelusaleme, na mamũmantha Yesũ vandũ va mĩthenya ĩtatũ. Na ĩtina nĩmaendie ĩkalũnĩ, na mamwĩthĩa Yesũ ekalĩte katĩ wa amanyĩsya, amethukĩĩsye nesa na aimakũlya makũlyo maseo. Amanyĩsya nĩmasengʼie mũno nũndũ wa Yesũ nginya o namo mambĩĩa kũmũkũlya makũlyo. O na nĩmasengʼie nũndũ wa mosũngĩo make. Amanyĩsya asu nĩmamanyie kana Yesũ nĩweesĩ Mĩao ya Yeova.

Yosevu na Meli nĩmamakĩte mũno. Yĩla Meli wamwonie Yesũ amwĩie atĩĩ: ‘Mwana witũ, tũũmanthie kĩla vandũ. Ko wĩĩ va?’ Nake Yesũ amwĩa: ‘No mwĩĩsĩ kana nĩĩaĩlĩte kwĩthĩwa nyũmbanĩ ya Ĩthe wakwa?’

Ĩtina wa maũndũ asu Yesũ nĩwenũkie na asyai make ndũanĩ ya Nasaleti. Yosevu nĩwamũmanyĩisye Yesũ wĩa wa mbwaũ. We wĩsũanĩa Yesũ aĩ mũndũ wa mũika ũilye ata? Yesũ aendeee kwĩana, nĩweethĩiwe e mũndũ mũĩ na e mwaĩlu methonĩ ma Ngai na ma andũ.