Andũ Oĩ Nĩmaendie Kũmwona Yesũ

Ve aũme mookie kuma ngalĩko ya wumĩlonĩ wa syũa. Aũme asu nĩ ala andũ oĩ masomaa ndata, na maasya kana kũsoma ndata nĩkwatumaa mamanya maũndũ ala makakwata andũ ĩvinda yũkĩte. (Isaia 47:13) Me mũsyĩ kwoo, aũme asu nĩmoonie “ndata” na mamĩatĩĩa kĩlomita maana meana ũndũ mũna, na yamba kũmatwaa nginya Yelusaleme, vandũ va kũmatwaa Mbetheleemu.

Yĩla andũ asu oĩ mavikie Yelusaleme, makũlilye atĩĩ: “Kaĩ va kana kala kasyaĩtwe keĩthĩwa mũsumbĩ wa Ayuti? Nũndũ nĩtwoonie ndata yako twĩ ngalĩko ya Wumĩlonĩ wa Syũa, na nĩtwooka kũkakumanĩa.”—Mathayo 2:1, 2.

Yĩla Mũsumbĩ Elote weewie ndeto isu nĩwambĩĩie kũthĩnĩka mũno ngoonĩ. Na kwoou, eeta athembi anene vamwe na atongoi angĩ ma ndĩni ya Kĩyuti na amakũlya vala Klĩsto waĩ asyaĩwe. Mamũsũngĩie kwosana na ũndũ Maandĩko maĩtye, mamwĩa kana aĩ asyaĩwe “Mbetheleemu.” (Mathayo 2:5; Mika 5:2) Ĩtina wa kwĩwʼa ndeto isu, Elote nĩwatũmanie na kĩmbithĩ andũ asu oĩ moke vala ũĩ, na amea atĩĩ: “Endai mũkamanthe kana kau nesa, na mwakona, mũisyoka mũndavye nĩ kana o nakwa nĩthĩwe ndonya kũthi na kũkakumanĩa.” (Mathayo 2:8) Ĩndĩ, kĩeleelo kya Elote kĩyaĩ kũmũtaĩa Yesũ, vandũ va ũu endaa kũmũaa!

Yĩla andũ asu oĩ maumie vala ve Elote, nĩmoonie ũndũ wa kũsengyʼa. Moonie ĩla “ndata” yamatongoesye kuma kwoo nginya Yelusaleme ĩmatongoesye ĩngĩ. Kwa wʼo, ĩsu ndyaĩ o ndata tũ, ĩndĩ ve ũla wamĩtũmĩĩte ĩmatongoesye. Aũme asu nĩmaatĩĩie ndata ĩsu nginya vala yaũngamie. Ndata ĩsu yaũngamie o vala Yosevu na Meli mekalaa me na kana koo, Yesũ.

Yĩla andũ asu oĩ malikile nyũmba kwa Yosevu, nĩmeethĩie Meli na kana kake Yesũ. Mamwona Yesũ, nĩmatulilye ndu mbee wake. O na nĩmamũnengie mĩthĩnzĩo ya thaavu, ũvumba, na manemane. Ĩtina, yĩla mavangie kũsyoka kũla kwĩ Elote, Ngai nĩwamavatie kwĩsĩla ndotonĩ maikasyoke kwake. Kwoou, vandũ va kũsyoka kũla kwĩ Elote nĩmenũkie mesĩle nzĩa ĩngĩ.

Wĩona nũũ ũla watũmĩĩte “ndata” ĩsu kũtongoeasya andũ asu oĩ? Lilikana kana ndata ĩsu ndyaamatwaa ĩmwe kwa ĩmwe nginya Mbetheleemu kũla Yesũ waĩ. Ĩndĩ vandũ va ũu, yamatwaie Yelusaleme vala makomanie na Mũsumbĩ Elote ũla ĩtina wendaa kũmũaa Yesũ. Na keka Ngai ndaalikĩlĩĩla na kũvata andũ asu oĩ maimũtavya Elote vala Yesũ waĩ, Elote ethĩwa ooaie Yesũ. Kwoou vate nzika, Satani, ũla nĩ mũmaitha wa Ngai, nĩwe wendaa kũmũaa Yesũ, na atũmĩie nzĩa ĩsu kwĩanĩsya kĩeleelo kyake.