Yoana Nĩwendaa Kũmanya Kana Yesũ Nĩwe Masia

Nĩvavĩtĩte vakuvĩ mwaka ũmwe Yoana Mũvatisi e o yela. Ĩndĩ o na e o vau, no weewʼaa ngewa ĩũlũ wa maũndũ manene ala Yesũ wekaa. Kwasũanĩa ũndũ Yoana weewie yĩla amanyĩwʼa make mamũtavisye kana Yesũ nũthayũũkisye mwanake wa kĩveti ndiwa ndũanĩ ya Naini. Ĩndĩ o na ũu wĩ o vo, Yoana endaa kwĩwʼa ĩmwe kwa ĩmwe kuma vala ve Yesũ kana nĩwe Masia. Kwoou, Yoana nĩwatũmie amanyĩwʼa elĩ make. Amatũmie makeke ata? Amatũmie makamũkũlye Yesũ atĩĩ: “We nue Ũla Wũkĩte, kana ve ũngĩ tweteele?”—Luka 7:19.

Ĩndĩ no wĩkũlye-ĩ, Nĩkĩ Yoana wakũlilye ũu? Yoana aĩ mũndũ weeyumĩtye kwa Ngai na yĩla wamũvatisaa Yesũ, vakuvĩ myaka ĩlĩ mĩvĩtu, nĩwoonie veva wa Ngai watheea ĩũlũ wa Yesũ na eewʼa Ngai asya kana nũmwĩtĩkĩlĩte Yesũ. O na ũu wĩ o vo, vai ũndũ ũtonya kũtuma twasya kana mũĩkĩĩo wa Yoana waendeee na kwonza. Na kethĩwa vailyĩ ũu, Yesũ ndethĩwa aaneena ndeto nzeo ĩũlũ wa Yoana. Ĩndĩ ĩkũlyo nĩ, Ethĩwa Yoana ndaĩ na nzika, nĩkĩ wakũlilye ĩkũlyo yĩu ĩũlũ wa Yesũ?

Yoana nũtonya kwĩthĩwa o endaa kũmanya kuma vala ve Yesũ mwene kana nĩwe Masia. Na kũmanya ũu nĩkwesaa kũtuma Yoana ethĩwa na vinya wa kũmĩĩsya e yela. O na ĩngĩ Yoana aĩ na kĩtumi kĩngĩ kya kũkũlya ĩkũlyo yĩu. Nĩweesĩ wathani wa Mbivilia ũla waĩtye kana Mwĩtĩkĩwʼa Mauta wa Ngai esaa kwĩthĩwa mũsumbĩ na mwovosya. Ĩndĩ, myei mingĩ ĩtina wa Yesũ kũvatiswa, Yoana aĩ yela. Kwoou, Yoana akũlasya kana ve ũngĩ wookĩte ose mwanya wa Yesũ, na ayĩanĩsya wathani wʼonthe ũla Masia wesaa kwĩanĩsya.

Vandũ va Yesũ kũtavya amanyĩwʼa ma Yoana kana nĩwe “Ũla Wũkĩte,” eekie maũndũ ala moonanisye kana aĩ na vinya wa Ngai. Maũndũ asu weekie nĩ kũvosya andũ mowau ma mĩthemba yonthe. Ĩtina wa ũu, Yesũ atavisye amanyĩwʼa ma Yoana atĩĩ: “Endai mũkamũtavye Yoana kĩla mũkwĩwʼa na kĩla mũkwona: Ilalinda nikwona na ala onzu maaũ nĩmeũthi, ala me na mangũ nĩmeũthewʼa na ala au matũ nĩmekwĩwʼa, ala akwʼũ nĩmeũthayũũkwʼa na ala ngya nĩmeũtavwʼa ũvoo mũseo.”—Mathayo 11:4, 5.

Ĩkũlyo yĩla Yoana wakũlilye nĩyĩtonya kwonanyʼa kana eekwatasya Yesũ aĩle kwĩka maũndũ maingĩ eka o ala weekĩte ĩvinda yĩu, na nĩvatonyeka Yesũ akamumya yela. Ĩndĩ, ũsũngĩo wa Yesũ nĩwoonanisye kana ndendaa Yoana ekwatye kwĩsa kwona ayĩka maũndũ manene kwĩ ala weekaa.

Yĩla amanyĩwʼa maendie, Yesũ nĩwaeleisye ĩkomano nesa kana Yoana nĩ mũnene kwĩ mwathani. Aisye kana Yoana nĩ “mũtũmwa” wa Yeova o tondũ ĩvuku ya Malaki 3:1 yathanĩte. O na ĩngĩ aisye Yoana nĩwe mwathani Eliya ũla ũwetetwe ĩvukunĩ ya Malaki 4:5, 6. Yesũ aendeeie kũelesya ĩũlũ wa Yoana asya: “Nĩ wʼo nĩngũmwĩa, katĩ wa ala masyaĩtwe nĩ aka, kũyaaoneka ũngĩ mũnene kwĩ Yoana Mũvatisi, ĩndĩ ũla mũnini Ũsumbĩnĩ wa ĩtu nĩ mũnene kũte we.”—Mathayo 11:11.

Yĩla Yesũ waisye kana ũla mũnini Ũsumbĩnĩ wa ĩtu nĩ mũnene kũte Yoana, oonanasya kana Yoana ndakethĩwa ũmwe wa ala makasumbĩka Ũsumbĩnĩ wa ĩtu. Yoana nĩwaseũvisye nzĩa kwondũ wa Yesũ, ĩndĩ akwie Klĩsto atanamba kũvingũa nzĩa ya kũthi ĩtunĩ. (Aevelania 10:19, 20) Kwa wʼo, Yoana aĩ mwathani mũĩkĩĩku wa Ngai na akatanĩa kwĩkala ĩũlũ wa nthĩ ĩsumbĩkĩtwe nĩ Ũsumbĩ wa Ngai.