Yesũ Nĩwaĩthisye Andũ Ngili Mbingĩ kwa Nzĩa ya Kyama

Ĩtina wa atũmwa 12 kũtanĩa ũtavanyʼa ndũanĩ yonthe ya Kalilii, nĩmamũeleisye Yesũ “maũndũ onthe ala meekĩte na kũmanyĩsya.” Kwa wʼo maĩ anou mũno. Ĩndĩ mayaĩ na mwanya o na wa kũya nũndũ wa andũ aingĩ ala mookaa vala maĩ. Nũndũ wa ũu, Yesũ ameie: “Ũkai, inywʼĩ, tũthi vandũ vate andũ nĩ kana mũthũmũe vanini.”—Maliko 6:30, 31.

Yesũ na atũmwa make nĩmalikile ĩsiwanĩ, na nĩvatonyeka makethĩwa maĩ vakuvĩ na Kavelinaumi. Maendie kĩsionĩ kĩ mbee wa Vethisaita kĩla kĩ ngalĩko ya wumĩlonĩ wa syũa wa Ũsĩ wa Yolotani. Ĩndĩ, andũ aingĩ nĩmamonie na mamanya kana nĩmathi kĩsionĩ kĩngĩ. Andũ asu nĩmasembie mesĩle ũtee wa ũkanga na mavika mbee wa ĩsiwa yĩu.

Yĩla Yesũ waumie ĩsiwanĩ, nĩwoonie ĩkomano ya andũ na amewʼĩa tei nũndũ mailyĩ ta malondu mate na mũĩthi. Kwoou nĩwambĩĩie “kũmamanyĩsya maũndũ maingĩ” ĩũlũ wa Ũsumbĩ. (Maliko 6:34) O na nĩwavoisye “ala maĩ na vata wa kũvowʼa.” (Luka 9:11) Nũndũ masaa maendeee kũvĩta, amanyĩwʼa mamwĩie Yesũ atĩĩ: “Vandũ vaa vaitwĩe andũ na nĩkwambĩĩa kũtuka; ũmbũũkya ĩkomano yĩthi nĩ kana yĩkethooee lĩu ndũanĩ.”—Mathayo 14:15.

Yesũ amasũngĩie amea: “Vaiĩ vata wa mathi; manengei kĩndũ maye.” (Mathayo 14:16) O na kau Yesũ nĩweesĩ ũndũ ũvangĩte kwĩka, nĩwamũtatie Vilivu kwa kũmũkũlya: “Twĩthooa mĩkate va nĩ kana andũ aa maye?” Vilivu nowe waĩ atonya kũkũlwʼa ĩkũlyo yĩu nũndũ aumĩte ndũanĩ yĩ vakuvĩ ya Vethisaita. Ĩndĩ, o na mathooa mĩkate ĩsu andũ ala maĩ vo mayesaa kũvũna. Vaĩ aũme ta 5,000, na mongelanwʼa onthe aka na syana, nĩvatonyeka andũ asu makethĩwa maĩ ta 10,000! Vilivu asũngĩie asya: “Mĩkate ya ndinalĩ 200 [ndinalĩ nĩ mũsaala wa mũthenya ũmwe] ndĩtonya kũmakomana onthe, o na ethĩwa kĩla mũndũ ekwata o kanini.”—Yoana 6:5-7.

Nĩ kana Endelea onanyʼe kana ti ũndũ wĩ laisi kũĩthya andũ asu onthe, aisye: “Vaa ve kamwana ke na mĩkate ĩtano ya mbaale na tũkũyũ twĩlĩ. Ĩndĩ isu nĩ kĩndũ kwa andũ aa maingĩvĩte ũu?”—Yoana 6:9.

Ĩvindanĩ yĩu, kwaĩ mwei wa katatũ kana mwei wa kana na Vasaka ya mwaka wa 32 ndyaĩ ĩnamba kũvika, na kwoou kwaĩ na nyeki kĩĩmanĩ kĩu. Yesũ eeie amanyĩwʼa make matavye andũ mekale nthĩ nyekinĩ me ikundi sya andũ 50 na 100. Ĩtina wa kũmatavya ũu, nĩwoosie ĩla mĩkate ĩtano na makũyũ elĩ na atũnga mũvea. Na ĩndĩ atilanga mĩkate ĩsu na aanyʼa makũyũ. Ĩtina wa ũu, Yesũ nĩwanengie amanyĩwʼa make mĩkate ĩsu na makũyũ nĩ kana manenge andũ. Ũndũ wa kũsengyʼa nĩ kana andũ onthe maĩe mavũna!

Ĩtina, Yesũ eeie amanyĩwʼa make atĩĩ: “Osanyʼai tũlungu tũla twatiala, nĩ kana vaikanangĩke kĩndũ o na kĩmwe.” (Yoana 6:12) Moosanisye mausũsya ikavũ 12 sya tũlungu tũla twatialĩte!