Mwana wa Ngai Nĩwe “Kyeni kya Nthĩ”

Mũthenya wa mũthya wa Mboka ya Ivanda, ũla nĩ mũthenya wa mũonza, Yesũ nĩwamanyĩisye e “vala vaiawa mĩvothi” ĩkalũnĩ. (Yoana 8:20; Luka 21:1) Veonekana vau nĩvo aka maaĩle kwĩkala yĩla meũthaitha me ĩkalũnĩ, na nĩvo andũ maiaa mĩvothi yoo.

Kwavika wĩoo ĩvindanĩ ya mboka, vandũ vau veethĩawa na kyeni kingĩ. Kyeni kĩu kyeethĩawa kĩ kya taa inya nene ila syaiawa vau, na kĩla taa weethĩawa usĩe mauta. Kyeni kĩu kyeethĩawa kĩ kingĩ mũno na kwoou nĩkyamulĩkaa vandũ vaasa mũno. Ndeto ila Yesũ waneenie nitonya kwĩthĩwa syalilikanilye ethukĩĩsya make ĩũlũ wa kyeni kĩu. Ameie atĩĩ: “Nyie ninyie kyeni kya nthĩ. Mũndũ o na wĩva ũla ũngatĩĩaa ndakaendela kĩvindunĩ, ĩndĩ akeethĩwa na kyeni kya thayũ.”—Yoana 8:12.

Avalisi nĩmaleanile na ndeto sya Yesũ na mamwĩa: “We nue umasya ũkũsĩ ĩũlũ waku mwene; ũkũsĩ waku ti wa wʼo.” Nake Yesũ amasũngĩa, amea: “O na ethĩwa nĩngumya ũkũsĩ ĩũlũ wakwa mwene, ũkũsĩ wakwa nĩ wa wʼo, nũndũ nĩnĩsĩ vala naumie na vala nĩendete. Ĩndĩ inywʼĩ mũyĩsĩ vala naumie na vala nĩendete.” Aendeeie kũmea: “Mĩaonĩ yenyu nĩkũandĩkĩtwe: ‘Ũkũsĩ wa andũ elĩ nĩ wa wʼo.’ Nyie nĩnumasya ũkũsĩ ĩũlũ wakwa mwene, na Asa ũla wandũmie o nake nĩwumasya ũkũsĩ ĩũlũ wakwa.”—Yoana 8:13-18.

O na kau Yesũ nĩwatavisye Avalisi ũndũ ũtonya kũmaĩkĩĩthya kana kĩla waneenaa nĩ kya wʼo, mayaaĩtĩkĩlana nake na kwoou mamũkũlya: “Asa waku aĩ va?” Yesũ nĩwamasũngĩie ĩmwe kwa ĩmwe amea: “Mũimbĩsĩ o na mũyĩsĩ Asa wakwa. Ta kethĩwa nĩmũmbĩsĩ, mwĩthĩwa mũmwĩsĩ Asa wakwa o nake.” (Yoana 8:19) Avalisi mendaa Yesũ akwatwe na ayovwa, ĩndĩ vai mũndũ waamũkwata.

Yesũ nĩwatũngĩlĩĩile ndeto waĩ anaweta. Aisye atĩĩ: “Nyie nĩngũthi, na mũkamantha, ĩndĩ mũkakwʼĩĩa naĩnĩ yenyu. Vala nĩendete mũitonya kũka.” Nũndũ Ayuti mayaeleawa o na vanini ndeto sya Yesũ mambĩĩie kwasya: “Ko ũkwenda kwĩyũaa? Nũndũ easya, ‘Vala nĩendete mũitonya kũka.’” Maemie kũelewa ndeto sya Yesũ nũndũ mayeesĩ wumo wake. Aendeeie kũmea-ĩ: “Inywʼĩ mumĩte ĩtheo; nyie numĩte ĩũlũ. Mumĩte nthĩ ĩno; nyie ndyumĩte nthĩ ĩno.”—Yoana 8:21-23.

Yesũ awetaa ĩũlũ wa ĩvinda yĩla wekalaa ĩtunĩ atanamba kũka kũũ nthĩ na kana nĩwe Masia ũla wathanĩtwe, kana Klĩsto, ũla atongoi asu ma ndĩni meeteelete. Ĩndĩ o na ũu wĩ o vo, me na kũvũthya kingĩ mũno mamũkũlilye Yesũ atĩĩ: “We nue ũũ?”—Yoana 8:25.

Ĩtina wa kwona ũndũ Avalisi mamũleile na mamũvĩnga, Yesũ ameie atĩĩ: “O na vaiĩ vata wa kũendeea kũneena nenyu.” O na ũu wĩ o vo, ndaaeka kwonyʼa Ayuti kana atũmĩtwe nĩ Ĩthe wake na nĩkĩ maaĩle kwĩthukĩĩsya Mwana. Ameie: “Ũla wandũmie nĩ wa wʼo na maũndũ ala neewie kuma kwake asu nĩmo nĩneenaa ĩũlũ wa nthĩ.”—Yoana 8:25, 26.

Yesũ nĩwoonanisye kana nĩwamũĩkĩĩte vyũ Ĩthe wake, ũla Ayuti matamũĩkĩĩaa. Ameie atĩĩ: “Ĩtina wa kũmũkĩlya Mwana wa mũndũ, nĩvo mũkamanya kana ninyie we na ndyĩkaa ũndũ o na ũmwe kumana na ũtwi wakwa mwene; ĩndĩ o ũndũ Asa wamanyĩisye, nowʼo nĩneenaa maũndũ asu. Na Ũla wandũmie e vamwe nakwa; ndaandia nĩ nyioka, nũndũ mavinda onthe nĩkaa maũndũ ala mamwendeeasya.”—Yoana 8:28, 29.

Ĩndĩ o na kau Ayuti aingĩ mayaamũĩkĩĩa Yesũ, ve amwe mamũĩkĩĩie, na ũu watuma amea atĩĩ: “Ethĩwa mũkekalaa ndetonĩ yakwa, inywʼĩ kwa wʼo mwĩ amanyĩwʼa makwa, na mũkamanya ũla wʼo, na ũla wʼo ũkamũthasya.”—Yoana 8:31, 32.

Ayuti amwe mayoonaa ũndũ ũsu ũtonyeka. Mamwĩie Yesũ atĩĩ: “Ithyĩ twĩ ũsyao wa Avalaamu na tũyaaĩthĩwa nongi ngombo sya mũndũ o na ũmwe. Nĩkĩ ĩndĩ ũkwasya, ‘Mũkathawʼa’?” Ayuti nĩmeesĩ kana ve mavinda meethĩawa me ngombo, ĩndĩ nĩmaleaa Yesũ aimeta ngombo. Ĩndĩ o na ũu wĩ o vo, Yesũ ameie kana o na ĩvindanĩ yĩu maĩ o ngombo. Ameie atĩĩ: “Nĩmũtavya wʼo ki kana, kĩla mũndũ wĩkaa naĩ nĩ ngombo ya naĩ.”—Yoana 8:33, 34.

Ayuti maĩ mũisyonĩ mũnene nũndũ wa kũlea kana mo nĩ ngombo sya naĩ. Yesũ ameie: “Ngombo ndĩkalaa kwa vwana wayo tene na tene; mwana ekalaa tene na tene.” (Yoana 8:35) Mũndũ ũla wĩkalaa mũsyĩ e ngombo ndethĩawa na ũtiĩwa, na no alũngwʼe. No mwana ũla ũsyaĩwe mũsyĩ ũsu kana ũla ũthooetwe ũtonya kwĩkala mũsyĩ ũsu “tene na tene.”

Kwoou, ũla wʼo ĩũlũ wa Mwana nĩwʼo ũthaasya andũ kuma naĩnĩ ĩla ĩetae kĩkwʼũ kya tene na tene. Yesũ aisye: “Ethĩwa Mwana nũkũmũthasya, mũkeethĩwa kwa wʼo mwĩ athasye.”—Yoana 8:36.