Yesũ e Yelusaleme Kwondũ wa Mboka ya Ivanda

Nũndũ nĩvavĩtĩte ĩvinda kuma Yesũ avatiswa, andũ aingĩ nĩmamwĩsĩ mũno. Ayuti ngili mbingĩ nĩmoonete syama ila Yesũ weekie, na ũvoo ĩũlũ wa mawĩa make nĩwanyaĩĩkĩte kĩla vandũ. Nũndũ wa ũu, andũ aingĩ nĩmamũmanthaa Yesũ ĩvindanĩ ya Mboka ya Ivanda (kana, Tũsũmba) ĩla yaĩ Yelusaleme.

Andũ maĩ na mawoni me kĩvathũkanyʼo mũno ĩũlũ wa Yesũ. Amwe maasya: “Nĩ mũndũ mũseo.” Namo angĩ maasya: “Aiee. Nĩwaasya andũ.” (Yoana 7:12) Andũ maneenaa maũndũ asu me kĩvathũkanyʼo mũthenyanĩ wa mbee wa mboka ĩsu. Ĩndĩ vai mũndũ waĩ na ũkũmbaũ wa kũmũtetea Yesũ ũtheinĩ nũndũ andũ nĩmakĩaa ũndũ atongoi ma Kĩyuti mekwĩka meewʼa ũu.

Mboka ĩsu yĩendeee, Yesũ nĩwookie ĩkalũnĩ. E vau nĩwambĩĩie kũmanyĩsya na andũ aingĩ masengʼa mũno nũndũ wa ũtonyi wake wa kũmanyĩsya. Meekie ũu nũndũ nĩmeesĩ kana ndaathi sukulu sya atongoi ma ndĩni ya Kĩyuti, na kwoou makũlya: “Vatonyeka ata mũndũ ũũ akethĩwa na ũmanyi ta ũsu wa Maandĩko na ndaamanyĩwʼa sukulu?”—Yoana 7:15.

Yesũ ameie: “Maũndũ ala nĩmanyĩasya ti makwa, ĩndĩ nĩ ma ũla wandũmie. Ethĩwa mũndũ o na wĩva nĩwendaa kwĩka kwenda kwa Ngai, akamanya kana momanyĩsyo asu maumĩte kwa Ngai, kana nĩneenaa ndeto syumanĩte nakwa mwene.” (Yoana 7:16, 17) Momanyĩsyo ma Yesũ nĩmoosanĩte na Mĩao ya Ngai, kwoou vate nzika ndeemanthĩaa nguma, ĩndĩ endaa kũmũtaĩa Ngai.

Yesũ aendeeie kũmea atĩĩ: “Mose nĩwamũnengie Mĩao, kana ndaamũnenga? Ĩndĩ vaiĩ ũmwe wenyu ũatĩĩaa Mĩao. Nĩkĩ mũkwenda kũmbũaa?” Nĩvatonyeka andũ amwe ĩkomanonĩ yĩu, na mũno mũno aeni ala maumĩte nza wa ndũa ĩsu, makethĩwa mateesĩ kana ve andũ mekwenda kũmũaa Yesũ. Ndwaĩ ũndũ wĩ laisi kwoo kũĩkĩĩa kana ve mũndũ ũkwenda kũaa mũmanyĩsya mũseo ũu. Kwoou, maisye kana no nginya Yesũ ethĩwe e na thĩna mũna na nĩkyo kĩtumi ũkũweta ndeto isu. Maisye atĩĩ: “We wĩ na ndaimoni. Nũũ ũkwenda kũkũaa?”—Yoana 7:19, 20.

Mwaka ũmwe na nũsu mũvĩtu, atongoi ma Kĩyuti nĩmendaa kũmũaa Yesũ nũndũ wa kũvosya mũndũ mũthenya wa Savato. Ĩvindanĩ yĩĩ Yesũ nĩwaneenie na andũ asu atũmĩĩte ũndũ ũmwe meekaa nĩ kana amatetheesye mamanye kana maneenaa maũndũ matambĩte kũsũanĩa. Nĩwamalilikanilye ĩũlũ wa ũndũ Mĩao yawetete. Yaĩtye kavĩsĩ kaĩle kwaĩkwa mũthenya wa nyanya, o na ethĩwa mũthenya ũsu nĩ wa Savato. Na ĩndĩ Yesũ amakũlya: “Ethĩwa mũndũ nĩwaĩkawa mũthenya wa savato nĩ kana Mĩao ya Mose ndĩkatũlwe, mũnthatĩe mũno wĩana ũu nĩkwĩthĩwa nĩnavoisye mũndũ eethĩwa e mũima mũthenya wa savato? Ekai kũsilĩla kwosana na ũndũ mũndũ ũilye nza, ĩndĩ silĩlai kwa ũlũngalu.”—Yoana 7:23, 24.

Ekali ma Yelusaleme ala maeleawa kĩla kyaendeee maisye atĩĩ: “Mũndũ ũũ nĩwe [atongoi] mekwenda kũaa, kana tiwe? Ĩndĩ sisyai! eneena mbee wa andũ, na vaiĩ ũndũ meũmũtavya. No kwĩthĩwa atongoi mamanyĩte nesa kana ũũ nĩwe Klĩsto?” Kwoou, nĩkĩ andũ mataĩkĩĩaa kana Yesũ nĩwe Klĩsto? Andũ asu maasya atĩĩ: “Ithyĩ nĩtwĩsĩ vala mũndũ ũũ wumĩte; ĩndĩ yĩla Klĩsto wĩũka, vaiĩ mũndũ wĩmanya vala wumĩte.”—Yoana 7:25-27.

Yesũ e o vau ĩkalũnĩ eeie andũ atĩĩ: “Nĩmũmbĩsĩ na nĩmwĩsĩ vala numĩte. Na ndyũkĩte kumana na ũtwi wakwa mwene, ĩndĩ Ũla wandũmie nĩ wa wʼo na inywʼĩ mũimwĩsĩ. Nyie nĩnĩmwĩsĩ, nũndũ naumie kwake, na Ũsu nĩwe wandũmie.” (Yoana 7:28, 29) Yĩla andũ asu meewie ndeto isu sya Yesũ, nĩmamanthie ũndũ meũmũkwata, na no kwĩthĩwa mendaa kũmũvingĩa yela kana kũmũaa. Ĩndĩ, nĩmaemiwe nĩ kwĩka ũu nũndũ saa wake wa kũkwʼa ndwaĩ ũnavika.

O na ũu wĩ o vo, andũ aingĩ nĩmamũĩkĩĩie Yesũ. Meekie ũu nũndũ nĩmoonete Yesũ ayĩsĩla kĩwʼũnĩ, aikilĩthya iseve, ayĩĩthya andũ ngili mbingĩ kwa nzĩa ya kyama, aivosya awau, aituma ala iema mathi, aisalukya metho ma ilalinda, aivosya andũ maĩ na ũwau wa mangũ, na aithayũũkya akwʼũ. Kwoou, maĩ na kĩtumi kĩseo kya kũkũlya atĩĩ: “Yĩla Klĩsto wĩũka ndakeka syama mbingĩ kwĩ ila mũndũ ũũ wĩkĩte, kana akeeka?”—Yoana 7:31.

Yĩla Avalisi na athembi anene meewie ĩkomano yĩiweta maũndũ asu, nĩmatũmie asikalĩ makamũkwate Yesũ.