KĨLUNGU KYA KATATŨ
Ĩla Twaũmĩwʼa Ngoonĩ Nĩ Mũndũ Ũngĩ—Ethĩwa Twĩ na “Ũndũ na [Mũndũ] Ũngĩ”
“Mwĩĩtu-a-asa ũmwe kĩkundinĩ kitũ nĩwambilĩĩile kana nĩnooyĩte mbesa syake. Ĩla angĩ kĩkundinĩ mamanyie ngewa ĩsu, nĩmambĩĩie kwĩtĩkĩlana nake. Ĩtina wa ĩvinda, mwĩĩtu-a-asa ũsu nĩwandavisye kana nũmanyie ti inyie noosete mbesa isu. O na kau nĩwambĩtisye ũekeo, neewʼaa wĩ ũndũ wĩ vinya kwĩsa kũmũekea nũndũ ũndũ ũsu nĩwambũmĩĩtye ngoonĩ.”—Linda.
WE NO ũelewe ũndũ Linda weewʼaa ĩtina wa kũũmĩwʼa nĩ mwĩĩtu-a-asa ũsu? Ũndũ wa kũmakya nĩ kana, amwe nĩmaũmĩĩtwʼe nĩ meko ma angĩ nginya ũndũ ũsu ũkatuma masyoka ĩtina kĩ-veva. We no wĩthĩwe waakwatwa nĩ ũndũ ta ũsu?
Ve Mũndũ Ũtonya ‘Kũtũtaananyʼa na Wendo wa Ngai’?
Kwa wʼo no twone wĩ ũndũ wĩ vinya mũno kũekea mwana-a-asa kana mwĩĩtu-a-asa. Vethĩawa vailyĩ ũu nũndũ nĩtwĩsĩ kana Aklĩsto maĩlĩte kwendana. (Yoana 13:34, 35) Ĩla twavĩtĩwʼa nĩ mwana-a-asa kana mwĩĩtu-a-asa, nĩtũũmĩaa na tũkewʼa woo mũno.—Savuli 55:12.
Mbivilia nĩyĩtĩkĩlĩte kana mavinda amwe Mũklĩsto nĩwĩthĩawa na “ũndũ na ũngĩ.” (Akolosai 3:13) Ĩndĩ o na vailyĩ ũu, ĩla ũndũ ta ũsu watũkwata, no twĩwʼe wĩ vinya kũmĩĩsya. Yo ve ũndũ ũtonya kũtũtetheesya ĩla ũndũ ta ũsu waumĩla? Kwasũanĩa myolooto ĩĩ ĩtatũ ya Mbivilia:
Ĩthe witũ wa ĩtunĩ nĩwĩsĩ maũndũ onthe. Yeova nĩwĩthĩawa ene kĩla kĩndũ kyonthe, o na yĩla tweekwa ũndũ ũtaĩle ũtonya kũtũũmĩsya mũno. (Aevelania 4:13) O na ĩngĩ, Yeova nũtwĩwʼĩaa tei ĩla twaũmĩa ngoonĩ. (Isaia 63:9) Ndesa kwĩtĩkĩlya “monyamao, kana woo” o na mũthũkũmi wake ‘atũtaananyʼe na wendo wake.’ (Alomi 8:35, 38, 39) Yo tyo twaĩle kwĩthĩwa tũilyĩ ta Yeova kwa kũlea kwĩtĩkĩlya kĩndũ o na kĩva kana mũndũ o na wĩva atũtaananyʼe na Yeova?
Kũekea mũndũ ti kwĩtĩkĩlya ĩvĩtyo. Ĩla twaekea ala matũvĩtĩsya, tũyĩthĩawa tũivũthĩĩsya, kũtetea, kana kwĩtĩkĩlya meko moo mathũku. Lilikana kana Yeova ndetĩkĩlasya naĩ yĩendeee, ĩndĩ nĩ ũekeaa ethĩwa ve kĩtumi kya kwĩka ũu. (Savuli 103:12, 13; Avakuki 1:13) Ĩla ũkũtwĩkĩa vinya tũekee ala matũvĩtĩsya, Yeova ethĩawa aitwĩa nĩtũatĩĩe ngelekanyʼo yake. Yeova “ndekalasya ũthatu wake tene na tene.”—Savuli 103:9; Mathayo 6:14.
Ĩla twaeka kwĩwʼa woo nũndũ wa kũvĩtĩwʼa, nĩtũtethekaa. Tũtethekaa kwa nzĩa yĩva? Kwasũanĩa ngelekanyʼo ĩno. Ĩla woosa ĩvia yĩ na ũito mũnini, na ũiyũkĩlya kwa ĩvinda ĩkuvĩ, nĩvatonyeka ũkalea kũnoa mũno. Nao nata ĩla waendeea kũkĩlya ĩvia yĩu kwa ĩvinda ĩasa? Yo no ũendeee kũyũkĩlya kwa ĩvinda ĩasanga ta ndatĩka siana ũndũ mũna, ĩsaa yĩmwe, kana o mbeange? Vai nzika kana ndũema kũnoa kwʼoko! Ũito wa ĩvia yĩu ndũvĩndũkaa, ĩndĩ o ũndũ waendeea kũyũkĩlya kwa ĩvinda yĩasa nowʼo ũkwĩwʼa yĩ yĩito. Ũu nowʼo vethĩawa vailyĩ twaendeea kwĩwʼa woo nũndũ wa kũvĩtĩwʼa. O ũndũ twaendeea kwia woo ngoonĩ sitũ nũndũ wa kũvĩtĩwʼa, o na ethĩwa ti woo mwingĩ, nowʼo tũendeeaa na kwĩyĩũmĩsya. Na kĩu nĩkyo kĩtumi Yeova ũtwĩkĩaa vinya tũvete woo ngoonĩ sitũ. Kwa wʼo, kũveta woo ngoonĩ nĩkũtũtetheeasya.—Nthimo 11:17.
Ĩla twaeka kwĩwʼa woo nũndũ wa kũvĩtĩwʼa, nĩtũtethekaa
“Neewʼaa Yeova Mwene ta we Ũkũneena Nakwa”
Nĩ kyaũ kyatetheeisye Linda ndakaendeee kwia woo ngoonĩ ĩla wavĩtĩiwʼe nĩ mwĩĩtu-a-asa ũngĩ? O na kau ve maũndũ angĩ mamũtetheeisye, kũsũanĩa ĩũlũ wa itumi ila Maandĩko manenganĩte sya kũekea ala angĩ nĩkwamũtetheeisye mũno. (Savuli 130:3, 4) Mũno mũno Linda nĩwatetheeiwʼe nĩ kũmanya kana ĩla twaekea angĩ, o nake Yeova akatũekeaa ĩla twavĩtya. (Aeveso 4:32–5:2) Asũanĩa ũndũ maũndũ asu mamũtetheeisye, Linda aĩtye atĩĩ: “Neewʼaa Yeova mwene ta we ũkũneena nakwa.”
Ĩtina wa ĩvinda Linda nĩwavetangie woo ũla waĩ ngoonĩ. Nĩwamũekeie kuma ngoonĩ mwĩĩtu-a-asa ũla wamũvĩtĩisye, na yu mendanĩte mũno. Linda nũendeee kũmũthũkũma Yeova. O naku ĩthĩwa na mũĩkĩĩo kana Yeova nũkwenda kũũtetheesya o tondũ watetheeisye Linda.