Ngai Nĩwoombie Mũndũũme na Mũndũ Mũka wa Mbee

Yeova nĩwaseũvisye mũũnda mũseo vandũ vetawa Eteni. Mũũnda ũsu waĩ na malaa maingĩ vamwe na mĩtĩ na nyamũ mbingĩ. Ĩtina wa ũu, Ngai nĩwoombie mũndũũme wa mbee na kĩtoo. Amina kũmũmba nĩwaveveeie manyũũ make. Nĩwĩsĩ kwaendie ata Ngai amũveveea? Mũndũ ũsu woombĩtwe na mũthanga nĩwatwʼĩkie mũndũ wĩ thayũ. Mũndũ ũsu eetawa Atamu, na Yeova nĩwamũnengie wĩa wa kũsũvĩa mũũnda ũsu na amwĩa amanthĩe nyamũ ila ingĩ masyĩtwa.

Yeova nĩwanengie Atamu mwĩao wa vata. Amwĩie: ‘No ũye matunda ma mĩtĩ ĩĩ yonthe. Ĩndĩ ve matunda ma mũtĩ ũmwe ũtaĩle kũya. Na wamaya, ũkakwʼa.’

Mũthya Yeova aisye atĩĩ: ‘Nĩngũmũmbĩa Atamu mũtetheesya.’ Ĩtina wa ũu, nĩwakomisye Atamu too mũito na aumya wau ũmwe wake amũmbĩa mũka. Mũka wake eetawa Eva. Atamu na Eva nĩmo maseũvisye mũsyĩ wa mbee. Atamu eewie ata anengwa mũka? Eewie mũyo mũno nginya asya: ‘Sisya ũũ aumwʼa waunĩ wakwa! Yeova nĩwesa kũmba mũndũ ũilye takwa.’

Yeova eeie Atamu na Eva masyae syana mausũsye nthĩ. Endaa matethasye wĩa me ĩmwe maiseũvya nthĩ yonthe yĩthĩwe yĩ nzeo ta mũũnda wa Eteni. Ĩndĩ ũu ti wʼo kweethĩiwe. Thĩna walikĩile va? Nĩtũkwona ĩsomonĩ yĩla yĩatĩĩe.