Nĩkĩ Tũkũaa na Tũkakwʼa?

Ngai eeie Atamu atĩĩ: “Mũthenya ũla ũkaya wawʼo ndũkatĩa ũkwʼa.” (Mwambĩlĩlyo 2:17) Ethĩwa Ngai oombĩte Atamu avangĩte kana akakũa na aikwʼa vayaĩ vata wa kũmũnenga mwĩao ũsu. Atamu nĩweesĩ kana alea kũya matunda ma mũtĩ ũsu ndakakwʼa.

Atamu na Eva mayaĩ na vata wa kũya matunda ma mũtĩ ũsu nĩ kana mekale thayũ, nũndũ mũũndanĩ vaĩ na mĩtĩ ĩngĩ mingĩ yaĩ na matunda. (Mwambĩlĩlyo 2:9) Kwa kũlea kũya matunda ma mũtĩ ũsu, mesaa kwonanyʼa kana nĩmamwĩwʼaa Ũla wamanengete thayũ. O na ĩngĩ, kwĩka ũu kwesaa kwonanyʼa nĩmeesĩ kana Ngai nĩwe waĩlĩte kũmatavya kĩla maĩle kwĩka.

KĨLA KYATUMIE ATAMU NA EVA MAKWʼA

Nĩ kana tũmanye nĩkĩ Atamu na Eva makwie, nĩtwaĩle kũmanya ĩũlũ wa ũneenanyʼa waendeeie, na ũneenanyʼa ũsu wakonetye andũ onthe. Satani, ũla nĩwe Ndevili, atũmĩie nzoka kũneena ũvũngũ mũthũku mũno. Mbivilia ĩielesya ũndũ ũsu yaĩtye atĩĩ: “Na ĩndĩ nzoka yaĩ nzeleke mũno kwĩ nyamũ o na yĩva ya kĩthekanĩ ĩla Yeova Ngai wombie. Na yamwĩa mũndũ mũka atĩĩ, Nĩ wʼo, Ngai nĩwaisye, Mũtikaye ma mĩtĩ yonthe ya mũũndanĩ?”—Mwambĩlĩlyo 3:1.

Eva asũngĩie nzoka asya: “Mosyao ma mĩtĩ ya mũũndanĩ nĩtũtonya ũya: ĩndĩ ũsyao wa mũtĩ ũla wĩ katĩ wa mũũnda, Ngai nĩwaisye, Mũĩkaye wawʼo, o na mũikakiite, mũikese ũkwʼa.” Nayo nzoka yamwĩa Eva atĩĩ: “Mũikakwʼa nongĩ: nũndũ Ngai nĩwĩsĩ kana mũthenya ũla mũkaya wawʼo, nĩvo mũkasalukwʼa metho, nenyu mũkeethĩwa ta Ngai, mũkĩmanya ũseo na ũthũku.” Kwoou Satani oonanisye kana Yeova nĩ mũkengani, na ndendaa Atamu na Eva mekale me atanu.—Mwambĩlĩlyo 3:2-5.

Eva nĩwaĩkĩĩie ndeto sya nzoka. Nĩwasyaisye mũtĩ ũsu na oona wĩ wa kwendeesya mũno! Nĩwatambũũkisye kwʼoko, atwʼa ĩtunda kuma vo, na ambĩĩa kũya. Na ĩndĩ Eva amina kũya ĩtunda yĩu, Mbivilia yaĩtye: ‘Nĩwanengie mũũme, nake aya.’—Mwambĩlĩlyo 3:6.

No nginya Ngai ethĩwe eewie woo ngoonĩ yĩla woonie syana ila wendete mũno syanyuva na ngenda kũlea kũmwĩwʼa! We Ngai eekie ata ĩtina wa ũu? Yeova amwĩie Atamu atĩĩ: “Ũkasyoka mũthanganĩ; nũndũ nĩvo waumiwʼe: nũndũ wĩ kĩtoo, na nũkasyoka kĩtoonĩ.” (Mwambĩlĩlyo 3:17-19) Na nũndũ wa ũu, “matukũ onthe ala Atamu wekalile maĩ myaka maana kenda na mĩongo ĩtatũ: na akwʼa.” (Mwambĩlĩlyo 5:5) Atamu ndaathi ĩtunĩ kana akaendeea kwĩkala vandũ vangĩ e kyũmbe kya veva. Ndaĩ vo Yeova atanamba kũmũmba kuma kĩtoonĩ kya nthĩ. Kwoou yĩla wakwie, nĩwaekie kwĩthĩwa thayũ na kwoou mwĩĩ wake watwʼĩka kĩtoo ĩngĩ. Vaiĩ vandũ vangĩ waĩ ũtonya kũmwona Atamu. Ũndũ ũsu waĩ wa kũmakya mũno!

TWĨ ENE NAĨ

Nũndũ wa Atamu na Eva kũlea kũmwĩwʼa Ngai na ngenda, nĩmaaisye thayũ woo ũte na naĩ na meethĩwa mate na wĩkwatyo wa kwĩkala tene na tene. Nĩmambĩĩie kũkwatwa nĩ mawonzu ta kũwaa na kũkũa. Ĩndĩ naĩ ĩsu meekie nĩyatumie o na ũsyao woo ũkwatwa nĩ mathĩna. Syana ila masyaie syasyaaawa syĩ o na mawonzu asu. Nĩkyo kĩtumi ĩandĩko ya Alomi 5:12 yaĩtye atĩĩ: “Kwĩsĩla mũndũ ũmwe naĩ yalikile ĩũlũ wa nthĩ na kĩkwʼũ kwĩsĩla naĩ, na kwondũ wa ũu, kĩkwʼũ kyavikĩa andũ onthe nĩkwĩthĩwa onthe nĩmeekie naĩ.”

Mbivilia ĩeleasya naĩ na kĩkwʼũ ta “kĩvwʼĩkĩi kĩla kĩvwʼĩkaa ngo syonthe sya andũ, na suka mũvũthũ ũla walanĩtwʼe ĩũlũ wa mbaĩ syonthe.” (Isaia 25:7) Kĩvwʼĩkĩi kĩu kĩvwʼĩkaa andũ ta mũumbĩ wĩ sumu ũkethĩa vaiĩ mũndũ ũtonya kwĩvathana nakyo. Kwa wʼo, “andũ onthe makusaa nũndũ wa Atamu.” (1 Akolintho 15:22) Kwoou no twĩkũlye o tondũ mũtũmwa Vaulo wakũlilye. Akũlilye atĩĩ: “Nũũ ũkambonokya kuma mwĩĩnĩ ũũ ũũtuma nĩkwatwa nĩ kĩkwʼũ kĩĩ?” Yo ve mũndũ ũtonya kũtũvonokya?—Alomi 7:24.