Vetelo Nĩwamũkaĩie Yesũ

Mũthenya ũla Yesũ waĩ na atũmwa make nyũmbanĩ ya ĩũlũ atanamba kũkwatwa ameie atĩĩ: ‘Inywʼonthe ũtukũ wa ũmũnthĩ nĩmũũndia.’ Ĩndĩ Vetelo amwĩa: ‘Nyie ndikũtia. O na ala angĩ onthe makũtia, nyie ndikũtia.’ Nake Yesũ eea Vetelo: ‘Nzamba ĩtanamba kwasya, we nũũneena mavinda atatũ wasye ndũmbĩsĩ.’

Asikalĩ mamũtwaĩte Yesũ nyũmbanĩ kwa Kaiava, atũmwa aingĩ nĩmasembie mathi. Ĩndĩ elĩ moo nĩmaatĩĩie andũ ala mamũkwatie Yesũ. Ũmwe woo aĩ Vetelo. Aendie nginya nza kwa Kaiava na ambĩĩa kwota mwaki. Nĩvo ĩndĩ mwĩĩtu ũmwe wathũkũmaa vau woonie ũthyũ wa Vetelo ũmulĩkĩtwe nĩ kyeni na asya: ‘We nĩngwĩsĩ. Ũneethĩawa na Yesũ.’

Nake Vetelo asũngĩa asya: ‘Aiee, nyie ndineethĩawa na Yesũ. O na ndyĩsĩ kĩla ũũneenea.’ Ĩtina wa ũu, Vetelo nĩwakwatie nzĩa elekele mũvĩanĩ. Ĩtina wa kavinda kanini mwĩĩtu ũngĩ wathũkũmaa vau nĩwamwonie na eea andũ atĩĩ: ‘Mũndũ ũũ aneethĩawa na Yesũ.’ Nake Vetelo asya: ‘Nyie o na ndyĩsĩ Yesũ.’ Nĩvo ĩndĩ mũndũũme ũmwe wamwĩie: ‘Wĩ ũmwe woo. Wĩneena ta andũ ma Kalilii, o na Yesũ aneenaa ũu.’ Ĩndĩ Vetelo eewʼa ũu eevĩta ayasya: ‘Nyie ndimwĩsĩ Yesũ.’

Ĩtina wa kavinda kanini, nzamba nĩyaisye. Nĩvo ĩndĩ Vetelo woonie Yesũ avĩndũka amũsisya. Ũu nĩwatumie alilikana ila ndeto sya Yesũ na aumaala nza athi kũĩa kĩĩo kĩ woo.

Ĩvindanĩ yĩu, Nzama ya Ayuti nĩyoombanie nyũmbanĩ kwa Kaiava nĩ kana ĩmũsilĩle Yesũ. Andũ ala maĩ nzamanĩ ĩsu nĩmeekĩte ũtwi nĩ kana mamũae Yesũ, nayu mamanthaa kĩtumi kya kwĩka ũu. Ĩndĩ mayaakwata ĩvĩtyo yĩtonya kũtuma Yesũ oawa. Nĩvo Kaiava wakũlilye Yesũ: ‘We wĩ Mwana wa Ngai?’ Yesũ amũsũngĩa: ‘Ĩĩ.’ Yĩla Kaiava weewie ũu aisye: ‘Tũi na vata wa ũkũsĩ ũngĩ. Nĩwauma Ngai.’ Nĩvo ĩndĩ Koti ũsu waisye: ‘No nginya mũndũ ũũ oawe.’ Andũ asu nĩmamũkũnie Yesũ mũno, mamũtwʼĩlanga mata, na mamũvwʼĩka metho, na ĩndĩ mamwĩa: ‘Ethĩwa wĩ mwathani, tũtavye nũũ waũkũna.’

Yĩla kwakyee, nĩmamũtwaie Yesũ nyũmbanĩ ĩla yoombanĩaa Nzama ya Ayuti na mamũkũlya ĩngĩ: ‘We wĩ Mwana wa Ngai?’ Nake Yesũ amasũngĩa: ‘Nĩmwĩsĩ kana ninyie we.’ Nĩvo ĩndĩ maisye kana nĩwauma Ngai na mamũtwaa nyũmbanĩ ya Vondio Vilato, ũla waĩ ngavana wa Lomi. Ĩtina wa ũu nĩ kyaũ kyeethĩiwe? Ekai twone.