ĨSOMO YA 6

Kũelesya Ĩandĩko Nesa

Yoana 10:33-36

KWA ŨKUVĨ: Ndũkeke o kũsoma ĩandĩko, na wamina kũyĩsoma oou ũyambĩĩa kũneenea ũndũ ũngĩ ũvoonĩ waku. Eka ethukĩĩsya maku maelewe nesa ũndũ ĩandĩko yĩla wasoma yĩkonanĩtye na ũndũ ũla ũũneenea.

ŨNDŨ ŨTONYA KWĨKA ŨU:

Nyuva ndeto ila sya vata. Wamina kũsoma ĩandĩko, onanyʼa ndeto ila syumĩlĩtye nesa ũndũ ũla wa vata. No wĩke ũu kwa kũtũngĩlĩĩla ndeto isu, kana kwa kũkũlya ĩkũlyo yĩtonya kũtetheesya ethukĩĩsya mamanye ndeto ila sya vata.

Ethĩwa wĩtũmĩa ndeto ingĩ kũkindĩlĩĩla ũndũ ũla ũwetetwe ĩandĩkonĩ, tetheesya ethukĩĩsya maku methĩwe matonya kũelewa nesa ũndũ ndeto ila syĩ Mbivilianĩ ikonanĩtye na ũndũ ũla wa vata ũũneenea.
Kindĩlĩĩla ũndũ ũla wa vata. Ethĩwa nĩwambie kũweta nesa kĩtumi kya kũsoma ĩandĩko yĩu, elesya ũndũ ndeto ila sya vata ĩandĩkonĩ yĩu iũkwata mbau kĩtumi kĩu.

Ũineenea ĩandĩko, ndũkavinge Mbivilia yaku. Ũu nũtetheeasya ethukĩĩsya maku mone ũndũ ndeto syaku ikonanĩtye na ĩandĩko yĩla wamina kũsoma.
Elesya ĩandĩko kwa nzĩa yĩ laisi. Ndũkawete maũndũ matakonanĩtye na kĩla ũũneenea. Sũanĩa ĩũlũ wa kĩla ethukĩĩsya maku mesĩ ĩũlũ wa ũndũ ũla ũũneenea na ĩndĩ ũinyuva nĩ maũndũ meana ata waĩle kũweta nĩ kenda ũndũ ũsu ũeleeke nesa.