ĨSOMO YA 18

Kũtetheesya Ethukĩĩsya Makwate Ũmanyi

1 Akolintho 9:19-23

KWA ŨKUVĨ: Tetheesya ethukĩĩsya maku masũanĩe, na mayĩwʼa nĩmeemanyĩsya kĩndũ kya vata.

Sũanĩa maũndũ ala ethukĩĩsya maku mesĩ. Vandũ va kũtũngĩlĩĩla maũndũ ala ethukĩĩsya maku mesĩ, matetheesye mone ũndũ ũla ũũneenea kwa nzĩa yĩ kĩvathũkanyʼo.

Yĩla ũũneenea maũndũ ala mesĩkĩe, no ũneene na mĩtũkĩ, ĩndĩ ũineena ũtekalaatĩte yĩla ũũneenea maũndũ matesĩkĩe.
Ĩka ũkunĩkĩli na ũisũanĩa. Ethĩwa nĩvatonyeka, no ũtũmĩe maũndũ matesĩkĩe mũno kana maũndũ ala maendeee kwĩkĩka nĩ kana ũelesye maũndũ ala ma vata. Sũanĩa mũno ĩũlũ wa ũvoo waku na ũndũ ũkonanĩtye na maũndũ ala ũkwenda kũweta.

Yĩla ũkwĩyũmbanĩsya ũvoo waku, ĩkũlye makũlyo ta, ‘nĩ kyaũ, nĩkĩ, nĩ ĩndĩĩ, nĩ va, nũũ, na ata.’ Eka ũvoo waku wĩthĩwe wĩ wa kwendeesya kwa kũkũlya na kũsũngĩa makũlyo amwe katĩ wa asu yĩla ũendeee kũwumya.
Onyʼa ethukĩĩsya ũndũ ũvoo waku ũtonya kũmatethya. Elesya ũndũ Maandĩko matonya kũtetheesya ethukĩĩsya. Neenea maũndũ, mawoni, na meko ala makonetye ethukĩĩsya maku.