KŨSYOKEA ALA MEKWENDEEWʼA
ĨSOMO YA 7
Endeea Kũtetheesya Andũ
Mwolooto: “[Nĩmaendeeie] kũmanyĩsya mate kũeka, na kũnyaĩĩkya ũvoo mũseo.”—Meko 5:42.
Kĩla Vaulo Weekie
1. Ĩloele VITIO, kana ũsome Meko ma Atũmwa 19:8-10. Ĩtina wa ũu, sũanĩa makũlyo aa maatĩĩe:
Yĩla Vaulo wavĩngiwe nĩ andũ amwe, ndaakwʼa ngoo. Aendeeie kũtetheesya ata ala mendeeiwʼe?
Vaulo oonanisye kĩthito ata kya kũsyokea ala mendeeiwʼe nĩ kana amamanyĩsye, na amasyokeie kwa ĩvinda yĩana ata?
Ngelekanyʼo ya Vaulo Yĩtũmanyĩsya Kyaũ?
2. Nĩ kana tũsyokee andũ ũndũ vaĩlĩte na tũyambĩĩa kũmamanyĩsya Mbivilia, no nginya tũtũmĩe ĩvinda na tũyĩkĩa kĩthito.
Atĩĩa Ngelekanyʼo ya Vaulo
3. Ĩthĩwa wĩyũmbanĩtye kũsyokea mũndũ ĩvindanĩ yĩla yĩmwaĩlĩte. Ĩkũlye-ĩ, ‘Nĩ ĩvinda yĩva yĩmwaĩle? Eenda tũee ngewa twĩ va?’ Ĩthĩwa wĩyũmbanĩtye kũmũsyokea, o na ethĩwa wĩĩwʼa ĩvinda yĩu yĩte ĩseo kwaku.
4. Mũkũlye nĩ ĩndĩĩ ũtonya kũmũsyokea. Ĩtina wa kĩla ũneenanyʼa, mũkũlye nĩ ĩvinda yĩva ũkwona yaĩlĩte ya kũneena nake ĩngĩ. Mũsyokee ĩvinda yĩla mweetĩkĩlana.
5. Endeea kwĩthĩwa na wĩkwatyo. Ndũkasembee kwasya ndekwendeewʼa aĩ nũndũ ndakwatĩkanaa mũsyĩ kĩla ĩvinda, kana kaingĩ ethĩawa akwatene. (1 Ako. 13:4, 7) Endeea kũmũsyokea, ĩndĩ ũyĩĩkĩĩthya nĩwatũmĩa ĩvinda yaku nesa. —1 Ako. 9:26.