Endeewʼa Nĩ Andũ Ala Angĩ

Kĩla Yesũ Weekie

VITIO: Yesũ na Ũla Mũndũ Mũka Waĩ Kĩthimanĩ

1. Ĩloele VITIO, kana ũsome Yoana 4:​6-9. Ĩtina wa ũu, sũanĩa makũlyo aa maatĩĩe:

1. Nĩ kyaũ Yesũ woonie atanambĩĩsya ũneenanyʼa na mũndũ mũka ũsu?

2. Yesũ aisye: “Nenge kĩwʼũ nĩnywʼe.” Nĩkĩ ĩsu yaĩ nzĩa nzeo ya kwambĩĩsya ũneenanyʼa?

Ngelekanyʼo ya Yesũ Yĩtũmanyĩsya Kyaũ?

2. Nĩ laisi tũkatanĩa kũneena na mũndũ twamba kũneenea kĩla kĩũmwendeesya.

Atĩĩa Ngelekanyʼo ya Yesũ

3. Alyũkana na maũndũ. Ti nginya ũneenee ũndũ ũla we mwene wĩĩvangĩte kĩlĩkonĩ ũyambĩĩsya ũneenanyʼa. Ambĩĩa na ũndũ ũla wĩ ilĩkonĩ sya ala angĩ mũthenyanĩ ũsu. Ĩkũlye-ĩ:

1. ‘Nĩ kyaũ kĩtangaasiwe maũvoonĩ?’

2. ‘Nĩ kyaũ atũi, ala nĩthũkũmaa namo, kana ala nĩsomaa namo meũneenea?’

4. Ĩthĩwa wĩ metho. Ĩkũlye-ĩ:

1. ‘Mũndũ ũsu eĩka ata? Nĩ kyaũ wĩthĩwa aisũanĩa?’

2. ‘Mwĩkĩĩle wake, mũvwʼanĩle wake, kana nyũmba yake syĩndetheesya kũmanya kyaũ ĩũlũ wa kĩla ũĩkĩĩaa kana kĩthĩo kyoo?’

3. ‘Yĩĩ nĩ ĩvinda ĩseo ya kũneena nake?’

5. Ĩthukĩĩsye.

1. Ndũkaneene mũno.

2. Ĩkĩa vinya mũndũ ũla ũũneena nake eyĩelesye. Woona vaĩlĩte, mũkũlye makũlyo.