Mose—Mũndũ Waĩ na Wendo

WENDO NĨ KYAŨ?

Wendo nĩ kwendeewʼa mũno nĩ andũ angĩ. Mũndũ wĩ na wendo nĩwonanasya nũmendete ala angĩ kwĩsĩla ndeto na meko make, o na ethĩwa no nginya eyumye nĩ kana eke ũu.

MOSE OONANISYE WENDO ATA?

Mose nĩwamwendete Ngai. Kwa nzĩa yĩva? Lilikana ndeto ii syĩ ĩandĩkonĩ ya 1 Yoana 5:3: “Kũmwenda Ngai nĩ kũũ, tũkwatae mĩao yake.” Nũndũ Mose nĩwamwendete Ngai, nĩwaatĩĩaa mĩao yake. Mose nĩweekie maũndũ onthe ala Ngai wamwĩaĩie eke, ta kwĩka ũndũ wĩ wʼĩa wa kũthi mbee wa Valao, o na kwĩka maũndũ manini ta kũtambũũkya ndata yake kwelekela Ũkanga Mũtune. Mose nĩweekaa maũndũ onthe ala weeĩaĩawa, methĩwe maĩ laisi kana maĩ vinya. “Ũu nĩwʼo wekie.”—Kuma 40:16.

Mose nĩwamendete Aisilaeli ala angĩ. Ĩla makwatwa nĩ mathĩna, nĩmokaa vala ve Mose nũndũ nĩmeesĩ kana Yeova nĩwamũtũmĩaa kũmatongoesya. Twĩsoma ũũ: “Andũ asu maũngama mamũthyũlũlũkĩte Mose kuma kĩoko kũvika wĩoo.” (Kuma 18:13-16) Kwasũanĩa ũndũ Mose weethĩawa anoete ĩtina wa kwĩthukĩĩsya Aisilaeli maimũelesya mathĩna moo mũthenya wʼonthe! Ĩndĩ, nũndũ Mose nĩwamendete nĩwatanĩaa kũmatetheesya.

O na ĩngĩ, Mose nĩwavoyeaa ala wamendete. O na nĩwavoyeie ala mamũvĩtĩisye! Kwa ngelekanyʼo, ĩla Miliamu wamũnyungunyĩisye mwana-a-inyia Mose, Yeova nĩwakũnie Miliamu na ũwau wa mangũ. Mose ndaatanĩa ũndũ ũsu, ĩndĩ nĩwavoyie kwondũ wa Miliamu akyasya: “Mũvosye, ame Ngai, nĩngũkwĩsũva.” (Motalo 12:13) Wendo nĩwʼo watumie Mose amũvoyea Miliamu.

TWĨĨMANYĨSYA KYAŨ?

Tũtonya kwĩyĩelekanyʼa na Mose kwa kũmwenda Ngai mũno. Kũmwenda Ngai kwa nzĩa ĩsu nĩkũtumaa tũatĩĩa mĩao yake “kuma ngoonĩ.” (Alomi 6:17) Ĩla twamwĩwʼa Yeova kuma ngoonĩ, nĩtũtanĩthasya ngoo yake. (Nthimo 27:11) O na ĩngĩ, nĩtũtethekaa ithyĩ ene. Ũndũ ũla wa vata vyũ nĩ kana, ĩla twamũthũkũma Ngai nũndũ nĩtũmwendete kuma ngoonĩ, tũikekaa o maũndũ ala maĩlĩte, ĩndĩ tũkatanĩaa kũmeka!—Savuli 100:2.

Nzĩa ĩngĩ tũtonya kwĩyĩelekanyʼa na Mose nĩ kwenda ala angĩ twĩyumĩtye vyũ. Ĩla anyanya maitũ kana andũ ma mũsyĩ matũelesya mathĩna moo, wendo nũtumaa (1) tũmethukĩĩsya kuma ngoonĩ; (2) tũtata kũelewa thĩna woo; na (3) twenda mamanye kana nĩtũmathĩnĩkĩaa.

O tondũ Mose weekie, nĩtũtonya kũvoyea ala tũmendete. Mavinda amwe nĩtũtonya kwĩwʼa tũtatethya angĩ ĩla matũelesya thĩna woo. O na nĩtũtonya kwasya, “Vaiĩ ũndũ ndonya kwĩka ate o kũũvoyea.” Ĩndĩ lilikana: “Kwĩsũvana kwa mũndũ mũlũngalu nĩkũvotaa mũno.” (Yakovo 5:16) Mboya sitũ nĩũtuma Yeova amwĩka mũndũ ũsu ũndũ ateĩvangĩte kwĩka. Kwoou, vaiĩ ũndũ mũseo mũno kũthonoka kũvoyea ala tũmendete!a

We nũkwĩtĩkĩla kana ve maũndũ maingĩ tũtonya kwĩmanyĩsya kumana na Mose? O na kau aĩ o mũndũ taitũ, nĩwatiie ngelekanyʼo nzeo mũno ya kwĩthĩwa na mũĩkĩĩo, wĩnyivyo, na wendo. O ũndũ twaendeea kũatĩĩa vyũ ngelekanyʼo yake, nowʼo tũtethekaa ithyĩ ene, na tũitetheesya angĩ.—Alomi 15:4.