“Naĩ Mũngʼendu”

ĨVINDA YAKWA ĨVĨTU:

Neanĩie ndũanĩ ĩte ya andũ athwii ĩla yĩtawa Turku. Ĩthe wakwa nĩwathaũkaa ĩthaũ ya ngundi. O nakwa nĩ na mũinawa nĩtwatanĩaa mũno ĩthaũ yĩu. Nĩ sukulu, nĩnendeeawʼa nĩ kaũ na mavinda maingĩ nĩnokitaa. Nĩ na myaka ĩkũmi na kĩndũ, nĩnalikanile na kĩkundi kya andũ athũku na ũu watuma nĩthĩwa nĩ mũngʼendu mũno. O na ĩngĩ, nĩnambĩĩe kwina na nĩnendaa mũno nĩthĩwe nĩ mwini wĩ nguma.

Nĩnathooie ithembe na nambĩĩsya mbandi ya wathi na ninyie nainĩĩaa mbandinĩ ĩsu. Nĩnendeeawʼa nĩ kwĩka maũndũ ma ũsengyʼa ĩla ngwina mbee wa andũ. Mbandi yitũ yaĩ nguma nũndũ tweekaa maũndũ ma ũngʼendu na tweekĩaa ngũa isaanĩtye. O na ĩngĩ, nĩtwambĩĩe kwinĩa kũndũ kwĩ andũ aingĩ. Andũ nĩmendeeiwʼe mũno nĩ mbathi ila twaumisye. Myaka ya 1980 na kĩndũ, nĩtwaendie kwina Amelika nĩ kana mbandi yitũ ĩmanyĩke kũu. Nĩtwainie mũsyĩnĩ wa New York na Los Angeles na tweethĩwa na anyanya aingĩ ala maĩ nguma maũndũnĩ ma wathi, na ĩndĩ twasyoka Finland.

O na kũtwʼĩka nĩnatanĩaa mũno kwina, nĩnendeeawʼa mũno nĩ kwĩkala nĩ na ũtanu wa wʼo. Nĩnakwie ngoo nũndũ aini meethĩawa me angʼendu na mendete masindano. O na ĩngĩ, ndyendeeawʼa nĩ mwĩkalo ũla naĩ nawʼo. Noonaa nĩ mũndũ mũthũku na nĩnakĩaa kũvĩvwʼa ĩianĩ ya mwaki. Nĩnasomie mavuku onthe ma ndĩni nĩ kana ngwate ũtethyo. O na ĩngĩ, nĩnamũvoyaa Yeova mũno andetheesye o na kũtwʼĩka noonaa ndatonya kũmwendeesya.

ŨNDŨ MBIVILIA YAVĨNDŨIE MWĨKALĨLE WAKWA:

Nathũkũmaa vosita nĩ kana nĩanĩsye mavata makwa ma kĩ-mwĩĩ. Mũthenya ũmwe, nĩnamanyie kana mũndũ ũmwe twathũkũmaa ĩmwe aĩ Ngũsĩ ya Yeova. Nĩnamũkũlilye makũlyo maingĩ mũno. Nĩwatũmĩie Mbivilia na asũngĩa makũlyo makwa nesa na kwondũ wa ũu, neetĩkĩla amanyĩsye Mbivilia. Ĩtina wa neemanyĩsya Mbivilia vandũ va syumwa mbũthũ, mbandi yakwa nĩyanengiwe wĩa wa kumĩthya mbathi na kũithoosya Amelika. Noonie ũsu ne ũndũ wa vata mũno.

Nĩnatavisye mũndũ ũla wamanyĩasya Mbivilia kana nĩnendaa numye kaseti ya mũthya na ĩndĩ ĩtina ndyambĩĩa kũtũmĩa maũndũ ala neemanyĩasya. Vandũ va kũndavya woni wake, ambĩie nĩsome ũndũ Yesũ waisye ĩandĩkonĩ ya Mathayo 6:24. Mũsoa ũsu waĩtye atĩĩ: “Kũi mũndũ ũtonya kũthũkũma mavwana elĩ.” Nĩnasengʼie ĩla namanyie ũndũ ndeto isu sya Yesũ syonanasya. Ĩtina wa matukũ manini, o nake mwalimũ wakwa wa Mbivilia nĩwasengʼie ĩla namwĩie kana nĩngũeka wĩa wa kwina nũndũ nendaa kũmũatĩĩa Yesũ.

Mbivilia yaĩ ũndũ ũmwe na kĩoo nũndũ nĩyatumie nona mavĩtyo makwa. (Yakovo 1:22-25) Nĩnamanyie kana naĩ na mwĩkalo mũthũku nũndũ naĩ na mĩtũlyo. Nĩnanenaa naĩ, nĩnokitaa, nĩnanyusaa sikala na naĩ mũnywi. Nĩneewie woo mũno ĩla namanyie kana mwĩkalo wakwa ndwoosanĩte na myolooto ya Mbivilia. Nĩneeyũmbanĩtye kwĩka moalyũku o na kũtwʼĩka ndwaĩ ũndũ wĩ laisi kwĩka ũu.—Aeveso 4:22-24.

Ĩla nambĩĩe kwĩmanyĩsya, nĩnathĩnĩkaa mũno ngoonĩ nũndũ wa mavĩtyo makwa ma tene. Ĩndĩ, mwana-a-asa ũla wamanyĩasya nĩwandetheeisye mũno. Nĩwambeleisye ĩandĩko ya Isaia 1:18 yĩla yaĩtye atĩĩ: “O na ethĩwa naĩ syenyu nĩ ndune mũno, ikeethĩwa nzaũ ta ĩa.” Mũsoa ũsu na mĩsoa ĩngĩ ĩla yĩ Mbivilianĩ nĩyandĩkĩĩthisye kana Yeova nĩ Ĩthe wĩ tei na nũekeaa ala meelila kwondũ wa mavĩtyo moo nĩ kana maeke kũthĩnĩka.

Nĩneeyumisye kũla kwĩ Yeova ĩla namũmanyie na namwenda. (Savuli 40:8) Nĩnavatisiwe mwaka wa 1992 ũmbanonĩ mũnene wa nthĩ mbingĩ ũla weekiwe mũsyĩnĩ wa St. Petersburg, nthĩ ya Russia.

MOATHIMO ALA NĨKWATĨTE:

Nĩnĩthĩĩtwe na anyanya aingĩ ala nĩ athaithi ma Yeova. Mavinda kwa mavinda, nĩtũkomanaa na kwina mbathi nzeo. Nĩtũtanĩaa kwĩka ũu nũndũ kwina nĩ mũthĩnzĩo kuma kwa Ngai. (Yakovo 1:17) Kĩveti kyakwa Kristina nĩwe mũthĩnzĩo wakwa wa mwanya. Nĩtũtanĩaa maũndũ maingĩ, tũkakomana na mathĩna maingĩ, o na nĩnĩmũeleasya maũndũ ala me ngoonĩ yakwa.

Keka ndyaatwʼĩka Ngũsĩ ya Yeova, nĩvatonyeka ngethĩwa nakwie. Ndanamba kwĩmanyĩsya Mbivilia, mavinda maingĩ nĩneethĩawa na mathĩna. Yu nĩkalaa nĩ na ũtanu, na nonaa maũndũ makwa maendeee nesa.