Yo Mĩisyo Yonanasya Kana Ngai Nde Tei?

ŨNDŨ AMWE MAASYA: “Ngai nĩwe ũsumbĩkĩte nthĩ, kwoou nĩwe ũtũeteae mĩisyo; nũndũ wa ũu, no nginya ethĩwe ate tei.”

ŨNDŨ MBIVILIA YAĨTYE: “Nthĩ yonthe ĩtwĩe nthĩnĩ wa ũla mũthũku.” (1 Yoana 5:19) Nũũ wĩtĩtwe “ũla mũthũku”? Mbivilia yonanasya kana nĩ Satani. (Mathayo 13:19; Maliko 4:15) Ũsu nĩ ũndũ ũtekwosana na kĩlĩko? Kwesilye: Ethĩwa Satani nĩwe ũsumbĩkĩte nthĩ, no twasye nĩwe ũtumaa andũ meyenda, methĩwa me atoonu, na mateũsũanĩa ĩũlũ wa ĩvinda yũkĩte o take. Kwĩsilya kwa nzĩa ĩsu tyo kũtũtetheesye kũmanya nĩkĩ mũndũ ũemetwe nĩ kũsũvĩa nthĩ? Asomi aingĩ nĩmawetete kana nĩvatonyeka kũemwa kũsũvĩa nthĩ kũkethĩwa nekwʼo kũtumaa mĩisyo yĩthĩwa, kũkatuma yĩthĩwa yĩ mĩthũkangu, kana kũkatuma andũ makwatwa nĩ mĩisyo kwa nzĩa yĩ laisi.

Ĩndĩ nĩkĩ Ngai wĩtĩkĩlĩtye Satani ethĩwe na ũtonyi wĩana ũu? Mathĩna mambĩĩe o ĩvinda ya asyai maitũ ma mbee ĩla maleile kũsumbĩkwa nĩ Ngai. Kuma ĩvinda yĩu, andũ aingĩ methĩĩtwe mailea kũsumbĩkwa nĩ Ngai o tondũ asyai maitũ ma mbee meekie. Ũtwi ũsu ũtumĩte andũ methĩwa masumbĩkĩtwe nĩ mũmaitha wa Ngai ũla nĩ Satani. Nĩkyo kĩtumi Yesũ weetie Satani “mũnene wa nthĩ.” (Yoana 14:30) Ĩndĩ Satani nũkũtũa asumbĩkaa? Aiee, ndetũa asumbĩkaa.

Yeovaa nũmakawʼa mũno nĩ mathĩna ala Satani ũtũeteae. Nũthĩnĩkaa mũno ĩla woona andũ maithĩna. Kwa ngelekanyʼo, ĩvinda yĩla ana ma Isilaeli makwatiwe nĩ mathĩna, Mbivilia yaĩtye ũũ ĩũlũ wa Ngai: “Thĩnanĩ woo wʼonthe nake nĩwathĩnawʼa.” (Isaia 63:9) Nũndũ Ngai e tei, nũvangĩte kana o mĩtũkĩ nũkũvetanga ũsumbĩki ũte tei wa Satani. Nũmũnyuvĩte Mwana wake, Yesũ Klĩsto, ethĩwe e Mũsumbĩ, nake akasumbĩkaa kwa ũlũngalu tene na tene.

ŨNDŨ ŨŨ ŨKŨKONETYE ATA?: O na vala ũsumbĩki wa Satani nũemetwe nĩ kũsũvĩana andũ na mĩisyo, ũsumbĩki wa Yesũ ũkamasũvĩa. Kwa ngelekanyʼo, Yesũ nĩwamasũvĩie amanyĩwʼa make ĩvinda yĩmwe kwaĩ kĩuutani kĩnene kya kĩseve. Mbivilia yaĩtye ũũ: “Akanʼya kĩseve, na atavya ũkanga, Usya, kilya. Na kĩseve kyausya, na kwaya ũuu mũnene.” Nĩvo amanyĩwʼa makũlilye: “Ũũ nũũ ĩndĩ, ũndũ o na kĩseve na ũkanga niũmwĩwʼa?” (Maliko 4:37-41) Ũu wĩtũĩkĩĩthya kana Yesũ akasũvĩa andũ onthe ala ewi ĩla ũkethĩwa asumbĩkĩte.—Ndanieli 7:13, 14.