Yu-ĩ, We no Ũmũĩkĩĩe Ngai?

KWASŨANĨA wĩ na mũnyanya ũmwendete mũno, na mũthenya ũmwe ayĩka ũndũ mũna ũte kũũelewa nesa. Namo andũ angĩ mayambĩĩa kumanyʼa meko make, mayasya kana nde tei. We wĩtĩkĩlana namo mĩtũkĩ, kana wamba kweteela mũnyanyau eyĩelesye? Nata ethĩwa nde vakuvĩ, we no wĩthĩwe na wũmĩĩsyo na ũyĩendeea kũmũĩkĩĩa?

Ũtambĩte kũsũngĩa no wende kũmanya maũndũ maingangĩ. No wĩkũlye, ‘Mũnyanyawa ũsu nĩmwĩsĩ ata, na nĩ kyaũ kĩtumaa nĩmwenda?’ Nũseo kwĩkũlya ũu. Ĩndĩ kwasũanĩa ũndũ ũũ: Yo ngelekanyʼo ĩsu no tũmĩtũmĩe kũsũngĩa ĩkũlyo ya kana Ngai e tei?

No wĩthĩwe wonaa wĩ ũndũ wĩ vinya kũelewa maũndũ amwe Ngai wĩkĩte, kana ũkethĩwa ũsaanĩawʼa nĩ maũndũ ala Ngai ũekete methĩwe. Andũ aingĩ no makwĩe Ngai nde tei, na makaũthingʼĩĩsya o naku ũmwone oou. Ĩkũlyo nĩ, we no ũmũĩkĩĩe Ngai nginya ĩla ũkamanya maũndũ maingangĩ ĩũlũ wake? Nĩ kana ũsũngĩe nesa no nginya wĩthĩwe ũmwĩsĩ Ngai nesa. Kwoou ĩkũlye, ‘We Ngai ethĩĩtwe e mũnyanyawa ũilyĩ ata?’

Ethĩwa nũkwatĩtwe nĩ mathĩna maingĩ no wasye kana Ngai ndethĩĩtwe e mũnyanyau. Ĩndĩ kwasũanĩa ũndũ ũũ: We Ngai nĩwe ũkũeteae mathĩna kana akũeteae moathimo? O tondũ tweemanyĩsya, Satani nĩwe “mũnene wa nthĩ ĩno” ĩndĩ ti Yeova. (Yoana 12:31) Kwoou, Satani nĩwe ũtumĩte nthĩ ĩno yĩthĩwa yĩ na mathĩna na yusũĩte ũsili ũte wa katĩ. O na ĩngĩ, twĩthĩawa na mathĩna nũndũ tũi eanĩu, na nũndũ nĩtũkwatawa nĩ maũndũ matataĩĩwe.

Nake Ngai atwĩkĩte maũndũ meva? Kwasũanĩa kĩla Mbivilia ĩwetete: yaĩtye kana Ngai nĩwe “watwʼĩkĩthisye ĩtu na nthĩ”; na kana maũndũ ala wĩkĩte nĩ vamwe na kũmba mĩĩ yitũ, ĩla ‘yũmbĩtwe [yĩ] ya kũsengʼya’; na kana Yeova nĩwe “Ngai ũla mĩthũmũ yaku ĩ mokonĩ make.” (Savuli 124:8; 139:14; Ndanieli 5:23) Maũndũ asu meonanyʼa kyaũ?

Meonanyʼa kana takethĩwa ti va Mũmbi witũ, tũyĩthĩwa twĩ thayũ. (Meko ma Atũmwa 17:28) O na ĩngĩ, meonanyʼa kana mũthĩnzĩo wa thayũ, wanake wa nthĩ ĩno twĩkalaa, ũnyanya na ũtanu ũla tũkwataa nũndũ wa kwendwa, mũsamo, wasya, na mĩuke mĩseo ya syĩndũ nĩ mĩthĩnzĩo kuma kwa Ngai. (Yakovo 1:17) Moathimo asu meonanyʼa kana Ngai nĩ Mũnyanya witũ twaĩle kũmũnenga ndaĩa na kũmũĩkĩĩa.

No wĩwʼe ve vinya kũmũĩkĩĩa Ngai. Nĩvatonyeka ũkethĩwa wĩwʼaa ũtamũĩkĩĩa nũndũ ndũmwĩsĩ nesa. Ti ũthũku kwĩwʼa ũu. Nthĩnĩ wa ilungu ii, tũitonya kũneenea maũndũ onthe ala matumaa andũ masya kana Ngai nde tei. Ĩndĩ ve vata wa kwĩkĩa kĩthito tũmanye Ngai nesa.a Weeka ũu ũkamanya ũwʼo ĩũlũ wa Ngai. We e tei? Ĩĩ, e tei. Nĩkyo kĩtumi Mbivilia yaĩtye ũũ: “Ngai nĩ wendo.”—1 Yoana 4:8.