Twoombiwe twĩ na wendi wa kwonanyʼa tei na kũmena meko mate ma tei
KYONGO KYA ĨTHANGŨ YA MBEE
Nĩkĩ Andũ Maasya Ngai Nde Tei?
WE NŨKWONA ĩkũlyo yĩla yĩ ĩthangũnĩ ya mbee yĩ ya ũsengyʼa? Andũ amwe monaa no nginya Ngai ethĩwe e tei, ĩndĩ ala aingĩ monaa we ta ũte tei. Nĩkĩ monaa ũu?
Andũ amwe ala mavĩta ĩvinda ya mĩisyo makũlasya: “Nĩkĩ Ngai ũekaa maũndũ aa matũkwate? We nũtũthĩnĩkĩaa? We Ngai no wĩ tei?”
Namo angĩ monaa Ngai ta ũte tei ĩla meũsoma Mbivilia. Kwa ngelekanyʼo, ĩla masoma ĩũlũ wa Noa na ĩla mbua ya ĩvinda yake nĩmekũlasya, ‘Ethĩwa Ngai e wendo, nĩkĩ wooaie andũ maingĩvĩte ũu? Tene we no wĩ tei?’
Mavinda amwe we nĩwĩkũlasya makũlyo ta asu? Kana we wĩwʼaa ũtatonya kũsũngĩa ala menda kũmanya ethĩwa Ngai e tei? Wĩthĩwe nĩwĩkũlasya ũu, kana wĩthĩwe ndũtonya kũsũngĩa makũlyo ta asu, kũsũanĩa ĩkũlyo yĩĩ yĩngĩ yĩatĩĩe nĩkũtonya kũũtetheesya.
NĨKĨ TŨMENETE MEKO MATE MA TEI?
Kwa ũkuvĩ, tũmenete meko mate ma tei nũndũ nĩtũtonya kũvathũkanyʼa ũseo na ũthũku. Ithyĩ twĩ kĩvathũkanyʼo na nyamũ nũndũ Ngai atũmbie “na mũvwʼano wake.” (Mwambĩlĩlyo 1:27) Ũu nĩ kwasya ata? Ngai atũmbie tũtonya kwĩthĩwa na ndaĩa ta ila syake na tũtonya kũatĩĩa motwʼĩo make ĩũlũ wa mwĩkalĩle, na ũu nĩ kwasya kana nĩtũtonya kũvathũkanyʼa ũseo na ũthũku o take. Kwasũanĩa ũndũ ũũ: Ethĩwa Ngai atũmbie tũtonya kũvathũkanyʼa ũseo na ũthũku na nĩtũmenete meko mate ma tei, o nake Ngai ndaĩle kwĩthĩwa amenete meko asu?
Na nĩ wʼo kwosana na Mbivilia Ngai nũmenete meko mate ma tei nũndũ atũĩkĩĩthĩtye ũũ: “Nzĩa syakwa syĩ ĩũlũ kwĩ nzĩa syenyu, na mosũanĩo makwa kwĩ mosũanĩo menyu.” (Isaia 55:9) Kwoou tũkasya kana nde tei, twĩthĩwa tũyonanyʼa kana nzĩa sitũ syĩ ĩũlũ kwĩ syake na kana Mbivilia nĩkenganĩte. Ĩndĩ, nũseo tũmanye maũndũ maingangĩ tũtambĩte kwasya kana Ngai nde tei. Kwa ngelekanyʼo, vandũ va kwĩkũlya kana Ngai e tei, twaĩle kwĩkũlya atĩĩ: ‘Nĩkĩ meko amwe ma Ngai monekaa ta mate ma tei?’ Nĩ kana tũelewe ũndũ ũsu, ekai twambe kũmanya mũndũ “ũte tei” ethĩawa ailyĩ ata.
Ĩla twasya kana mũndũ nde tei twĩthĩawa tũyonanyʼa kana ndendeaa angĩ ũseo. Mũndũ ũte tei nũtanaa ĩla angĩ meũthĩna na ndamathĩnĩkĩaa ĩla me thĩnanĩ. Kwoou no twasye kana mũsyai ũla ũkanasya mwanae nĩ kana atanĩe kwona ayĩwʼa woo, ndethĩawa e tei. Ĩndĩ, mũsyai ũla ũkanasya mwanae nĩ kana amũmanyĩsye kana amũsũvĩe, ethĩawa e mũsyai mũseo. Ethĩwa ve mũndũ waakũelewa naĩ ĩtina wa kwĩka ũndũ, nĩwĩsĩ nesa ki kana nĩ laisi kũelewa angĩ naĩ ĩla meeka ũndũ, nũndũ tũyĩthĩawa twĩsĩ vyũ kĩla kyatuma meka ũu.
Ekai yu tũsũanĩe itumi o ilĩ ila itumaa andũ mona Ngai ta ũte tei. Kĩtumi kya mbee nĩ mĩisyo ĩla ĩtũkwataa, na kya kelĩ nĩ maũndũ ala tũsomaa Mbivilianĩ ĩũlũ wa ũndũ Ngai wasilĩile andũ. Mo maũndũ asu monanasya kana Ngai nde tei?