Thĩna Ũkilyĩ Ũnathela!

KŨSUMBĨKWA NĨ SILIKALĨ NZEO

“Ngai wa ĩtunĩ akaũngamya ũsumbĩ ũtakaanangĩka tene na tene, o na ũsumbĩki wawʼo ndũkaatiĩwa ũko ũngĩ wa andũ; ĩndĩ ũkatilanga ilungu na kũmina mosumbĩ asu onthe, nawʼo ũkekalaa tene na tene.”—Ndanieli 2:44.

Ũsumbĩ wa Ngai nĩ silikalĩ yĩ ĩtunĩ. Mũsumbĩ ũla ũnyuvĩtwe wa Ũsumbĩ ũsu nĩ Yesũ Klĩsto, na akaũngama vandũ va asumbĩki ma andũ na ayĩĩkĩĩthya kana kwenda kwa Ngai nĩkweekwa vaa nthĩ o ta ĩtunĩ. (Mathayo 6:9, 10) Ũsumbĩ ũsu ndũkaminwa nĩ ũsumbĩ o na wĩva wa mũndũ nũndũ nĩ ‘ũsumbĩ wa tene na tene wa Mwĩaĩi waitũ na Mũtangĩĩi Yesũ Klĩsto.’—2 Vetelo 1:11.

KŨIKETHĨWA NDĨNI SYA ŨVŨNGŨ

“Satani nake nĩwĩalyũlaa mwene ethĩwe ta mũlaĩka wa kyeni. Na kwondũ wa ũu ti ũndũ ũnene athũkũmi make kwĩalyũla methĩwe ta athũkũmi ma ũlũngalu; namo mũminũkĩlyo woo ũkeethĩwa ta mawĩa moo.”—2 Akolintho 11:14, 15.

Ndĩni sya ũvũngũ ikavuanwʼa ũtheinĩ imanyĩke kana itongoewʼe nĩ Ndevili na iivetangwa vyũ ĩũlũ wa nthĩ. Kĩmena kĩla kyumanaa na ndĩni na ũaani ũla umanaa nasyo ikathela. Ũu ũkatuma ala mamwendete “Ngai ũla wĩ thayũ na ũla wa wʼo” mamũthaitha na “mũĩkĩĩo ũmwe,” na “nthĩnĩ wa veva, na nthĩnĩ wa wʼo.” Kũkeethĩwa ngwatanĩo na mũuo mwingĩ.—1 Athesalonika 1:9; Aeveso 4:5; Yoana 4:23.

ANDŨ MAIKETHĨWA NA NAĨ

“Ngai mwene akeethĩwa vamwe nao, Ngai woo: na akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.”—Ũvuanʼyo 21:3, 4.

Yeova Ngai akeanĩsya maũndũ asu atũmĩĩte Mwana wake, Yesũ, ũla wakwie kwondũ wa andũ. (Yoana 3:16) Yesũ akavetea andũ onthe naĩ. Kũikethĩwa na thĩna o na ũmwe nũndũ “Ngai mwene akeethĩwa vamwe nao” na akavyaĩa “methoi onthe methonĩ moo.” Naĩ na mathĩna ala makwataa andũ maikethĩwa vo ĩngĩ nũndũ “ala alũngalu makatiĩwa nthĩ, na makatũa vo kũvika tene na tene.”—Savuli 37:29.

MAVEVA MAVUKU MAKAVETWA

“Nake [Yesũ Klĩsto] akwata ũla mũkũnga, nzoka ngũũ, nayo nĩ Ndevili na nĩwe Satani, na amwova myaka ngili, na amwĩkya ĩimanĩ yĩte kĩtulu na ayĩvinga, na [ayĩsiĩla] ĩũlũ wake, nĩ kana ndakakenge mbaĩ ĩngĩ.”—Ũvuanʼyo 20:2, 3.

Ĩla Satani na ndaimoni syonthe ikekwʼa “ĩimanĩ yĩte kĩtulu,” maikakenga andũ ĩngĩ nũndũ makethĩwa matatonya kwĩka ũndũ o na ũmwe. O na maikethĩwa matonya kũtongoesya andũ kwa nzĩa ĩtaĩle. Ũkeethĩwa wĩ ũndũ wa kwendeesya ta kĩ kwĩkala nthĩ ĩtatongoewʼe nĩ Satani na maveva mavuku!

‘MĨTHENYA YA MŨMINŨKĨLYO’ ĨKATHELA

‘Mĩthenya ya mũminũkĩlyo’ ĩkathela ĩvindanĩ ya ũla “thĩna mũnene” wawetiwe nĩ Yesũ. Aisye atĩĩ: “Ĩvinda yĩu kũkethĩwa thĩna mũnene, ũndũ ũtaaĩthĩwa kuma mwambĩlĩlyo wa nthĩ kũvika yu, o na kũikethĩwa ũngĩ nongi.” —Mathayo 24:21.

Thĩna ũsu Yesũ wawetie ũkeethĩwa wĩ mũnene nũndũ vakethĩwa maũndũ mataaoneka. Ũkathelela “kaũnĩ wa mũthenya mũnene wa Ngai, Mwene Vinya Wʼonthe” ũla wĩtawa “Ali–Maketoni.”—Ũvuanʼyo 16:14, 16.

Andũ ala mendete ũlũngalu me na wendi mwingĩ mũno wa kwona nthĩ ĩno nthũku ĩithela. Maũndũ aa maatĩĩe nĩ amwe ma moathimo ala makaetwe nĩ Ũsumbĩ wa Ngai.

NGAI AKEANĨSYA MAŨNDŨ ANGĨ MAINGANGĨ

“Ĩkomano ĩnene” yĩkavonokwʼa yĩlikwʼe nthĩ nzaũ yĩ na mũuo: Ndeto ya Ngai yaĩtye kana “ĩkomano ĩnene” ya andũ matatalĩka ‘yĩkauma thĩnanĩ ũla mũnene’ na yĩilika nthĩ nzaũ yĩ na ũlũngalu. (Ũvuanʼyo 7:9, 10, 14; 2 Vetelo 3:13) Ĩkomano yĩu yĩikethĩwa na nzika kana ũtangĩĩo umĩte kũla kwĩ Yesũ Klĩsto ũla nĩwe “Katena ka ĩlondu ka Ngai, kala keumya naĩ ya nthĩ.”—Yoana 1:29.

Tũkakwata moathimo maingĩ nũndũ wa kũmanyĩwʼa nĩ Ngai: Nthĩnĩ wa nthĩ nzaũ, “nthĩ ĩkausũwʼa nĩ kũmũmanya Yeova, o tondũ manzĩ mekunĩkĩlye ũkanga.” (Isaia 11:9) Ngai akatũmanyĩsya ũndũ tũtonya kwĩkala na mũuo na tũtekwananga nthĩ na aitũmanyĩsya maũndũ angĩ maingĩ. Ngai aĩtye atĩĩ: “Ninyie Yeova Ngai waku, ũla ũkũmanyĩasya kwaĩla, ũla ũkũtongoeasya nzĩanĩ ĩla waĩle kũthi nayo.”—Isaia 48:17.

Endwa maitũ ala makwie makathayũũkwʼa: Ĩla Yesũ waĩ kũũ nthĩ nĩwamũthayũũkisye mũnyanyae Lasalo. (Yoana 11:1, 5, 38-44) Ũu waĩkĩĩthisye kana akeanĩsya maũndũ maingĩ ĩla Ũsumbĩ wa Ngai wĩsumbĩka kũũ nthĩ.—Yoana 5:28, 29.

Kũkeethĩwa mũuo na ũlũngalu tene na tene: Ĩvindanĩ ya ũsumbĩki wa Klĩsto, kũikethĩwa ũtũli wa mĩao. Nĩkĩ? Nĩkwĩthĩwa Yesũ nũtonya kũsoma ngoo, akethĩwa atonya kũsilĩla ala alũngalu na ala athũku. Ala makalea kũalyũka maiketĩkĩlwʼa kwĩkala nthĩ nzaũ ya Ngai.—Savuli 37:9, 10; Isaia 11:3, 4; 65:20; Mathayo 9:4.

Tweemanyĩsya maũndũ o manini katĩ wa maũndũ angĩ maingĩ me Mbivilianĩ ala mawetete ĩũlũ wa ĩvinda yũkĩte ĩseo. Ĩla Ũsumbĩ wa Ngai ũkethĩwa ũsumbĩkĩte nthĩ, kũkeethĩwa ‘mũuo mwingĩ’ tene na tene. (Savuli 37:11, 29) Maũndũ onthe ala matumaa andũ mathĩna makavetwa vyũ. Tũi na nzika na ũndũ ũsu nũndũ Ngai we mwene aĩtye atĩĩ: “Sisya, nĩngũtwʼa maũndũ onthe meũ. . . . Ndeto ii nĩ sya kĩthito na nĩ sya wʼo.”—Ũvuanʼyo 21:5.