MOSŨNGĨO MA MAKŨLYO MA MBIVILIA
Andũ ala makwie tũkamona ĩngĩ?
Kĩkwʼũ no ta too nũndũ ĩla mũndũ wakwʼa ndethĩawa esĩ ũndũ o na wĩva, na vai ũndũ wĩthĩawa atonya kwĩka. Ĩndĩ Mũmbi ũla woombie syĩndũ syonthe ndaemwa nĩ kũthayũũkya andũ. Nĩwaĩkĩĩthisye ũndũ ũsu ĩla wamũnengie Yesũ vinya wa kũthayũũkya andũ kauta.—Soma Mũtavanʼya 9:5; Yoana 11:11, 43, 44.
Nĩ kwa nzĩa yĩva kĩkwʼũ kĩtonya kũelekanwʼa na too?
Ngai nĩwathanĩte kana andũ ala makwie me kĩlilikanonĩ kyake makathayũũka mekale nthĩ nzaũ yĩ na ũlũngalu. Ngai no we wĩ na ũtonyi wa kũthayũũkya ala makwie, na akeeka ũu ĩvinda yake yavika. Ngai Mwene Vinya Wʼonthe e na mea ma kũthayũũkya ala akwʼũ.—Soma Yovu 14:14, 15.
Kũkeethĩwa kũilyĩ ata ĩvinda ya ũthayũũkyo?
Andũ ala makathayũũkwʼa nĩ Ngai makeethwa matonya kwĩmanya, na makeethĩwa matonya kũlilikana anyanyae moo na andũ moo ma mũsyĩ. O na kau ĩla mũndũ wakwʼa mwĩĩ wake nĩwoaa, Ngai akeethĩwa atonya kũmũthayũũkya na aimũnenga mwĩĩ ũngĩ.—Soma 1 Akolintho 15:35, 38.
No andũ avũthũ mathayũũkawʼa makekale ĩtunĩ. (Ũvuanʼyo 20:6) Ĩndĩ ala aingĩ makathayũũkwʼa mekale vaa nthĩ yĩ valatiso. Asu makeethĩwa na mwanya mũseo wa kwĩkala nesa, me na wĩkwatyo wa kwĩkala tene na tene.—Soma Savuli 37:29; Meko ma Atũmwa 24:15.