mosũngĩo ma makũlyo ma mbivilia

Nĩkĩ twaĩle kũvoya?

Yeova Ngai endaa twĩw’e twĩ na ũthasyo wa kũneena nake ĩũlũ wa maũndũ ala meũtũthĩny’a tũteũtĩĩa. (Luka 18:1-7) Nũtwĩthukĩĩasya nũndũ nũtũthĩnĩkĩaa. Nũndũ Ĩthe witũ wa ĩtunĩ nũtũthoketye tũvoye, vai kĩtumi kya kũlea kwĩka ũu.—Soma Avilivi 4:6.

Mboya ti nzĩa ya kwĩtya ũtethyo tũ. Vandũ va ũu, mboya nĩtũtetheeasya kũmũthengeea Ngai. (Savuli 8:3, 4) Kũtavya Ngai ũndũ tũkwĩw’a nĩkũtumaa twĩthĩwa na ũnyanya wa vakuvĩ nake.—Soma Yakovo 4:8.

Twaĩle kũvoya ata?

Ngai ndendaa twinĩlĩĩle mboya kana tũtũmĩe ndeto sya kwĩyonany’a ĩla tũũvoya. O na ti lasima tũvoye tũilyĩ ũndũ mũna. Ĩndĩ we endaa tũvoye kuma ngoonĩ. (Mathayo 6:7) Kwa ngelekany’o, Aana, ũla waĩ Mũisilaeli, nĩwavoyie ĩũlũ wa ũndũ mũna wamũthĩnasya mũsyĩ. Ĩtina, ĩla thĩna ũsu wesie kũthela na eew’a e mũtanu, nĩwatũngĩie Ngai mũvea mboyanĩ.—Soma 1 Samueli 1:10, 12, 13, 26, 27; 2:1.

Ũsu nĩ ũndũ wa mwanya ta kĩ! Atĩ no tũmũthengeee Mũmbi witũ tũkamũtavya mathĩna maitũ. O na no tũmũkumye na tũimũtũngĩa mũvea nũndũ wa maũndũ ala ũtwĩkaa. Vate nzika tũyaĩle kũvũthya ndaĩa ĩsu tũnengetwe.—Soma Savuli 145:14-16.