Ngai Nũkũsiasya

KĨLA KĨTUMAA AMWE METHĨWA NA NZIKA: Kwosana na ũkunĩkĩli ũmwe wa mĩtũkĩ, nthĩ yitũ yĩ kĩkundinĩ kya ndata (galaxy) kĩla kĩthĩawa na ndata (planets) ta mbilioni 100. Ĩla mũndũ wasũanĩa wũmbi ũsu ũndũ ũnenevete nũtonya kwĩkũlya, ‘Mũmbi mwene vinya w’onthe nĩwĩsa kũtindĩa kũsisya o kĩla andũ mekaa me ĩũlũ wa nthĩ ĩno ĩnyivĩte ũu?’

KĨLA NDETO YA NGAI ĨMANYĨASYA: Ngai ndaaũlwa nithyĩ ĩtina wa kũtũnenga Mbivilia. Vandũ va ũu, atũĩkĩĩthasya ũũ: “Ngakũtaa itho yakwa yĩkũketeee.”—Savuli 32:8.

Kwasũanĩa ĩũlũ wa mũndũ mũka ũmwe weetawa Akali, ũla wekalaa myakanĩ ya 1900 mbee wa kũsyawa kwa Klĩsto. Akali ndamũnengete mũnene wake, Salai, ndaĩa. Nũndũ wa ũu, Salai nĩwamũthĩnisye nake akĩĩa weũnĩ. We Ngai nĩwaekie kwendeew’a nĩ Akali atĩ nũndũ nĩwavĩtisye? Mbivilia yaĩtye ũũ: “Na mũlaĩka wa Yeovaa amwĩthĩa.” Mũlaĩka ũsu nĩweekĩie Akali vinya ĩla wamwĩie atĩĩ: “Yeova nĩwew’a thĩna waku.” Ĩtina wa ũu, Akali eeie Yeova: “Nue Ngai ũla wonaa.”—Mwambĩlĩlyo 16:4-13.

O ta ũu, “Ngai ũla wonaa” nũkũsiasya. Kwa ngelekany’o: Inyia wa syana wĩ wendo nũsianasya na syana syake ila nini, nũndũ o ũndũ kana kanini, now’o kethĩawa kaĩlĩte kũsũvĩwa nĩ mũsyai wako. O ta ũu, Ngai nũtũsũvĩaa, na mũno mũno ĩla tũũthĩna na tũte na vinya. Easya atĩĩ: “Nĩkalaa vandũ vatũlu na vatheu, vamwe na ũla wĩ na veva wa kwĩlila na kwĩnyivya, nĩvuũkye veva wa ũla wĩ na wĩnyivyo, na kũvuũkya ngoo ya ũla ũnũkwĩlila.”—Isaia 57:15.

O na vailyĩ ũu, nũtonya kwĩkũlya, ‘Ngai anziasya ata? We ekaa kũnzilĩla kwĩanana na ũndũ nonekaa nĩilyĩ, kana asiasya nthĩnĩ wakwa akamanya ũndũ nĩilyĩ?’